India ah huihpi in nawkgawp leuleu ahih manin mi 70 in sihlawh, 100 val liam

India gamsung ah huihpi in nawkgawp leuleu ahih manin mi 70 in sihlawh, 100 val liam

India gamsung ah sehnel akihel huihpi “Sandstorms” in nawkgawp ahih manin mi 70 bangin sihlawhkhin a, adang aliam bekbekzong mi 100 val bang phakhinta cih AFP pan kiza hi. Abeisa inzong India gamsung ah Sandstorms in nawkgawp theizel a, hihpen Sunday zanlam in anawkkik hi ci’n India Official te’n agenkhiat uh ahihi.

Sunday zankimlam in India gamsung leilu, leitaw leh nisuahna lamah huihpi khauhmahmah in, ahatna naikhat 100 Kilometer (62 Miles) tawh nawkgawp hi. Tuahangin singkung te abul panin kilonkhia in, meikhuam te kipuk a, innzong tampitak kisia hi ci’n Federal and State Disaster Management Agencies pan thunei te’n genkhia uhhi.

Uttar Pradesh State sungah gialpi kia in, huihpi leh khuaphelap kithuah in nawkgawp a, inn kicim, singkung kipuk, mei kisia in, mihing zong akigawm in mi 40 bangin sihlawh uhhi ci’n State Disaster Management Department te’n genkhia uhhi.

Inn kisia bekbek zong inn 40 bang pha a, inn te pukcip ahih manin aliam bekbekzong mi 80 bang pha uhhi.

West Bengal sungahzong Sunday nimah in Thunderstorms hangin mi 14 in sihlawh a, Andhra Pradesh sungahzong kek in adenlup mi 12 bang si uhhi.

May 01 ni inzong Southern State sungah kekkia 40,000 Lightning Bolts veibang om a, mi 14 takin sihlawh uhhi.

Bihar leh New Delhi ahzong huihpi naikhat 100 Kilometers tawh nawkgawp ahih manin mi 2 in sihlawh hi ci’n National Disaster Management Authorities te’n genkhia uhhi.

Huihpi khuahlua mahmah ahih manin Indira Gandhi International Airport zong nai 2 sung ki khakcipsak a, vanleng akigawm in 70 Flights te mundang Airport ah ki tusak hi.

More: India ah Power Plant khat puakkham in mi 16 sikhin, 100 val liam

Abeisa nungdeuh mahmah inzong Taj Mahal City sungah sehnel akihel huihpi “Sandstorm” in nawkgawp ahih manin mi 84 takin sihlawh uhhi. Tuazawh ni 10 khitciangin hibangin tuahsiatna khatvei apiangkik leuleu ahihi. Abeisa kumte inzong huihpi guahpi in nawkzel himahleh tukumzah in misi tamlo a, tukumpen misi atampen Deadliest kum ahihi. Sawltak #zomidaily