Pu Pau Za Suan Gualnam (kum 64, Laitui)

Pu Pau Za Suan Gualnam (kum 64, Laitui)

Kawlgam lam-a Zomite thamlo, India lamkaai Mizoram leh Manipur adiak-in Lamka Khuapi nangawn dong-ah “Mihau-a Min Kiza” Pu Pau Suan-in 08/09/2018, ziingsang nai 8:05 hun-in mual hong liamsan-hi.

Pu Pau Suan-pen sisan kinaaina lam-ah ka’ Pa’ nu ka’ Pii-pen Pu Pau Suan’ Pa’ Niipi ahihi. Kihal khin cihtheih ahihi.

Akhangno-a kipan-in ka’ Pa thudot mahmah-in azahtaakbawl mahmah khat ahihbaan-ah alawhcin khitnung ahzong kumsim-in puanteen thak, maltova, olive, cikhum bawngnawi-tawh hongbaang tangtang mi thupi khat ahihi.

Mual hongliam takpi ciangdong nangawn ama’ hauhna akithei cian zolo dinmun-ah Zomi amin za-ngei khempeuh-in lamdang asak mituam mahmah khat ahihi. Hau-hi, aci-tawh, tuaci peuhmah kenteh aci-tawh atheician, agensiang thei taktak omlo zahdong-in kidop siam-in kikep siamhi.

Ama’ hun nunung ahihman-in ama’ pianna Laaitui Khua ciangbek hilo, Zomite leh Mizote’ lak nangawn-ah amin hong kizaakpih ahihman-in mipi’ theihding-in Pu Pau Suan’ tungtaang khangthakte’ ciinding ahoih-in akiseh theiding ama’ thu nengcik-tawh kahong minsial-hi.

Keima’ theihna ciang-ah,

Pu Pau Suan siamsinna lam-ah danh 10 B-tawh zo-in A-tawh zawhding akihaanthot ciang-in, “Hih danh 10 A-tawh kazawh man-in hau tuankei-ning, ka’ hun paammaih” ci-in sumzon sumbawl akipan ahihi.

Sumzonna-ah mi’ lak-ah neeklehdawn alim a-al, aminthang nonote kin-in nei lo-in, kidop lam-in mapang zawden-hi.

Kizepna lamsang niikteen puansilh peuhmah ahoih zeuzau, akilangh liatluat peuhmah zangh lo-in kidawm denhi.

Palik leh custom te’ kiang-ah sum tawmno ngahpak nading-in amipihte’n tamveipi lehheek taleh kiman ngeilo-hi (Silchar-Shilong-a akimat longal)

Hauhtat ngeilo-in kidawm leh kiniamkhiat mahmah-a, ama’ thu akikum ngeingai khangno sumhau tepawl langbawl cihbangte nei ngeilo-in tuate’ anneekman-khawng nana piaksak ziauziau zeel-hi.

Suangbawl kiman hong-om ciang-in,
“Amau leéng khatkhawng nei-a, kizeempah laulau thong-a” ci-in awi hetlo-in awlmawh mahmahhi.

Ahauhna zah ahihkeileh azawnna zah kuamah-in atheihloh zahdong-in citak-in kikeemsiam milamdang mahmah khat ahihi.

Lamka pan-a Zaákna

1998 Kum-in Lamka ka-tung to-a, Lamka Zomi papite’ tungpan-a ka’ zaákna-ah:

Moreh-ah Pu Pau Suan mat nading report kipia (kilehheek) ahihman-in Palik leh Kastom te-in Pu Pau Suan’ tuanna Jeep mancip-in check uhhi. Mawtaw-peii tyres nangawn hongkhia uh-a bangmah mulo-in paisak-uh cihi.

Report pia mite’ kiang-ah, “Van manpha/ vankhaam omlopi” acih ciang-in, tua mawtaw tung-a tupeek khempeuh leh mawtaw taangbaán khempeuh Baw akici siiknip manpha vive ahihlam kithei panhi.

Tua-a kipan Pu Pau Suan-pen hauh cihtak-a ahau-in amin kiza vungvung ci uhhi.

Mizoram pan-a Zaákna

Pu Dinglian (Ex-CID: MNF) genna-ah,

YMA te-in Sangchi’ innpi maai-a lamkabom-ah Kawlgam Zomi nih vua zuahzuah uh-a, Sangchi Hotel sawng lii-na veranda pan-in Pu Pau Suan hong tuaksuk ciang-in mipi-in daaitak-in en gega uhhi.

Pu Pau Suan-in, “Hih mite tuaci vauk nawnkei un” ciziau-a, YMA te-in vua nawnlo-in paisak uhhi.

Lengpui Vaanleeng Tual-ah khatvei Mizo mihau mahmah khat-in Pau Suan’ diamond amanzah dong-a, “Sangchi’ Hotel bang vive 5 kiim-tawh aman kikim ding” ci-in tua mihaupa-in genhi.

Hihte-pen Kawlgam pualam-a mipihte’ hong theihpihna hi-a, maan-hiam khial-hiam cihbel keizong katelcian kei-hi.

Upmawhthu ahihkeileh theina ciangkhat nei-a genna hitaleh 1980 – 1990 kikaal mihau thu akigen naakleh Pu Pau Suan hiden-a, ama’ nung-ah ahau mahmah Zomi khenkhat hong-om saam hang-in amah zah-a akigen, akilungluut Zomi mituam mahmah khatbeek akinei naailo ahihi.

Lawmte khat-in, “Pau Suan si ahihleh ahau lopi aive” ci-a, keibang-in lamdang kasa vat-hi, banghanghiam cihleh hau mahmah-a asi, khanglaai mah-a asi tampi om ahihman-in hauhna-inbel sihna daal zoding ka-um keihi. “Pu Pau Suan hau mahmah-hi” kacihna-zong hituanlo-in thu-omzia kacihna ahihi.

Bangbang ahizong-in khangkhat-sung Zomi mitkeuh masateng-in alungluut mahmah khop-a anungta aganta thei Pu Pau Suan-pen amahbang mi Zomi sung-ah khatbeek om ngeilo ahihman-in naakpi zahtaakna kapia-hi.

“Hau mahmah” akicih hunsung nangawn-in mi simmawh cih peuhmah kiza ngeilo-in, kampau gamtat akidawm zo ngiat, amahle-amah aki-ukzo mahmah Zomi mi manpha mahmah ahihlam ciantak-in kaphawk-hi.

Leitung mipilte-in “eile-ei ki-uk haksa penpen” acih thuciin-pen Pu Pau Suan-in khuplet-in zogawp ahihman-in mi thupi mahmah khat-hi ci-in ka-pulaak phapha-hi.

“Minam sung-ah piakkhiatna lam-ah kilanghlo” ci-in amawhsak-zong omkha dinghi. Tua-pen amahleh piakkhiat nading mun-a mapangte’ kaalthu hilel ding-in ka’ seh-s, ka’ zahtaákna nengcik beék kiam lohi.

Kawlpi Saángkah Hunsung

Kalay College (latter University)-ah kum nihna Chemistry ka-sin hunsung Seih Kann Tha-ah ka ciahsuk zeel-a, holung kumzeel-in ka’omna-uh pan-a kaphawk thu-khat:

Niangtui Sai-ah ziingsang nai 7 kiim-in hong paipih-a, niangtui hong taih-hi. Kei’ adingbek vaaikha ahihman-in nuam salo-in, “Nang’ ading-e?” kacihleh,

“Ken kadawn nai 1 vaal sin-e, dawn ou” hongci-hi. Keizong ki-kawleih sakpian-in haai taw-ah kam khat-khawng ka-vaal seciang-in,

“Gaih ngaáplo neihiam?” hongci-hi. Kenzong “Mi’ ngeina daan aci hihihi” kacihleh ka’ haai la-in aman viik sukziau-a, ka-hehsuak dektak, mi’ muhdinglah kisuang,

“Abangci zaanzaan naleh?” kacihi. Nuui hiuhiau-in,

“Nulehpa’ thupha-tawh niangtui haai-khat thupi salo khading hi-uhteh. Ataktak-in cikhum siikkeu khat bekbek ngen-a I-ngahloh hunte no tuakngei naailo hi uhteh.”

Hih dawnna-in ka’ lungsim hong sukha mahmahhi. Ka’ tutkhawm hunsung hong thugen athupi mahmah-a kasehpen,

“Zomite sum nengcik neileh ne-puukpuuk, dawn-paakpaak, sihguui pahding bang-a kizeempah luatluat, hihte no’ khang-ah zanghkei le-uhcin kibit zaw-hi. Tuabang mite guta sumsutte-in mitsuan uh-a, a-om hiit-hiat, akizeem khollo mite guta sumsutte’nzong kin selo-hi”.

Ciinhuai sa kahih man-in lawmlehgual’ lak-ah kizeem pheuphau, ne zuahzuah, dawn ziahziah cihte ka-kikeem siam-a, ama’ thupha ahihlam kaphawk-hi.

Khatvei, ka’ nau (Naute’ Pa Suum)-tawh aholimna-ah,

“Kawlgam nuntaakzia sung-ah khualzin gamvaak-a na-om uhleh, gentehna-in mawtaw ticket leiding napaileh mawtaw ticket manzah ataangpi na-theihsa om ahihman-in tuul-nih ahihleh tuul-nih kiim bekmah sumbawm-ah guang inla, sum napiak ciang-in mite’ muhna-ah na’ neihteng apia bang-in kilanghsak lecin guta sumsutte hitaleh amau-tawh akizomte hitaleh kuamah-in hong awlmawh nawnlo ding-a, nang abit nahi dinghi. Tuhun-pen ticket zuakte mahmah nangawn guta sumsutte-tawh akipawl-a naseemsim tampi omhi”.

Thupi sa-ing. Sumbawl ahihman-in sumbawlmi khat’ theihding leh zuihding thu thuúktak-in thei kasa-hi. Ama’ masuan thei-in, ama’ mapanna tangtak zuui-hi.

Athupiitna Tampi’ Lak-ah Khat

Khualzin gamvaak sumbawl khat hi-in minam deidanna-zong tuaktuak himahleh ama’ masuan tangtak zuui-in hauhman khawng-a minam kipawlna khawng-ah upa makaai tuh cihbang peuhmah om ngeilo-hi.

Minam kipawlna-a panmun leen ding-in akicial ciang-in, “eima’ lampi ciat thumaan cihtakna-tawh zuuitek photni” cihsan ziauziau-in, hauhna-tawh tutphah meetlaakna nei ngeilo-hi.

Thukhupna:

Ka’ Pa ka’ itna-in ka’ Pii ka’ itna nosuak sak-a, ka’ Pii ka’ itna-in asanggamte zahtaak kahih man-in ka’ Pa’ Pute ko unau-in “Pu” kaci uhhi. Zomi mitvaak masa diakteng-in hong theihpih Pu Pau Suan’ hong mualliamsanna ziak-in ka’ Pa leh ka’ Pii ka’ phawkna khang-in ka’ lung hong leengsak mahmahhi.

Na’ zuatna thangvaan tualnuam tuang vatung in! Na’ tawi vonte Sian-in lumbang sung henla, na’ lungdeih sinthu tuang atun zoding Sian-in siam hen!Khaipi (Pu Pau Suan’ hong lawhna)