Zomite’ Telkhialh Thu Tomno ~ Pu Zokhai

Zomite’ Telkhialh Thu Tomno ~ Pu Zokhai

Thu-in Gui nei-a, La-in Taang nei-hi. Suutsuut taleng suutcing theilo, khaubang suutzom laai-ning! Nana ngai in!

Minam ahilopi minam akisa awsuahtuam azanghkhawm mipawlte (Tuhun Zomi khangthak honkhat leh keimah-in Zomi kacih-uh anuai-a namzingteng ahihi):

• Zo or Zou
• Siyang or Sihzang
• Dim or Dim
• Saáizaang or Saizang
• Teizaang or Teizang
• Losaáu or Losau
• Khuano
• Paite or Paihte (Lamka Huam-ah)
• Simte (Lamka Huam-ah)
•  Vaáiphei or Vaiphei
•  Gaangte or Gangte (Lamka Huam-ah)
•  Thado or Thahdo
•  Kuki
•  Thangkhaál (Lamka Huam-ah Huam-ah)
•  Ngawn
•  Kawm or Kom
•  Tedim

Hihte minam min hilo-hi. Minam-zong hilo-hi.

Khawk, kuam, munlehmual (geographical context) bih-a awsuah kibang azangh mipawl tuamtuamte hi-a, tua mite awsuah akidang mahmah (thei-zong akithei khollo: lakpakding [lpd]) Siyang leh Zo hih nih sung-ah Samte Beh leh Suante Beh bekbek et bekbek-inzong Siyang-pen minam hilo, Zo-zong minam hilo cihpen numei naupang nangawn-in atelbaih mahmah thu-hi.

Lpd: Zo I-cih awsuah tuam azanghkhawm sanggamte minam tuam-khat cihtheih peuhmah hilo-hi, banghanghiam cihleh amau amengcip mipil khenkhatte’ suutdaan hizenzenleh:

“Pu Zo’ suanlehkhaakte ……” (himah cipak mai-ni)
Tua ahihleh Zohaám azanghte’ sung-a Suante, Samte, Gualnam cihte Pu Zo’ suan hiding-in, Dim awsuah, Siyang awsuah, Losau awsuah, Teizaang awsuah sung-a Samte, Suante, Gualnam cihte Pu Zo’ suan hilo cihding gui leh baal nei kilkel lo-hi. Thu-in Gui nei-a, La-in taang nei-hi.

Tedim awsuah adiak-in Kawlgam lamkaai-a Laamzaang awsuah akizangh taangpi-pen Tedim awsuah kici-a, hih awkaih azanghteng Tedimmi aci ki-omhi. Khial-hi cipah keihang, ahizong-in “mi” cih-tawh akizop ciang-in minam-tawh kizom tosuak denhi. Lpd: Thado or Kuki akici awtuam azanghte’ lak-ah Haukip, Kipgen cihte behbul hi-a, hih Laamzaang awsuah (Tedimmi akici khial) lak-ahzong Kipgen, Haukip cihte phungcing tak-in omhi.

Atung-a awkaih/awsuah genna gui 17-te peuhmah minam hilo-in Pu khat-ciat sungpan-a piang-zong hilo, mihing min khatbeek omlo-hi. Atung-a awsuah kidang mipawl kilawhna minte thuneu hilo-in thupi mahmah-hi. Minampi khat sung-a hiangte ahihman-in thupi-hi, ahizong-in awsuah kidanpihte-tawh nam-tuam kisa zahdong liang-a ngaihsutna-pen akhonkheng haina (extreme stupidity) ahihi kaci-nuam phial-hi.

Telnop mahmah napi-in banghang-in kitello saksak I-hihiam cihleh Huaihamna (Greed: a form of idolatry)’ ziak bekbek hilel-hi. Huaiham, duhhop, meetpak nading bekbek mitsuan, khangsawnte’ ading khuallo, mulo, donlo, awlmawhlo hihte’ ziak bekbek hilel-hi. Chin-bel kei-tawh kisaikei; Chin vaai gen-in nei vetkeng., Zomi vaai-hi! Zomi-pen Zomi hi-a, beh nangawn-in mat laai, leikiat-a ateeng namdangte nangawn-in Zomi hihna pomthei, kiimlehpaam-tawh nungta khuasa theibuang ei abangci lawmlawm I-hihiam?

Bangbang ahizong-in Zomi sung-ah aki innteek saktuam honkhatte’ angsung huaihamna hang-in Tedim, Siyang, Zo cihte kitukalh khin-a, ahizong-in unau sisan khat I-hihna tu-in kahong pholhkhia leuleu-hi. Pate’ khang hun-ah kitukalh-in khasiat muiisiatna a-om lehzong abeisa hunte siikcip-in maailam’ ading khangthak NANG leh kei-in tuibang luankhop dingmah mitsuan zawloding I-hihiam?

Minam min hilopi khat buaipih lozaw-in, tuibang gawm theih nading omsun ZOMI-ah baanzaal ziat suankhawm le’ng-a, pheiphung suankhawm lehang hiloding-hiam? Bang-in hong daaltan-a, bang-in hong lausak ahihiam? Eiteng suihlung kihual maciang suankhawm lehang kua’n hong zawhthawh dinghiam? Bangding-a uai tentan laaiding I-hihiam?

Zomi Pasian’ Thupha!

Zokhai
60 Narr-Maen Drive
Croydon Hills VIC 3136
Melbourne, AU
Tel: +61 39723 0460