Huston a Senzum aki khakna a hangtaktak
Nung a i gensa na ah..Sente US langkhat ah a om tentan pen ki muan mahmahna khat nei hi ding hi i ci khin hi. Tu’n US khuapi khat a hi Huston a Sente Consulate a kikhakna a sungthu i gen ding hi.
Sen galkap sunga nasem Juan Tang a kici mipil khatpen US gamah mi mawkmawk bangkhat in na lutsim hi. US te’n zong theivatlo hi. Tua nu pen US te pilna leh thusimte a kansim dingin a kisawl a hihi.
Sen leh US kikal buaina hong liat semsem ciangin US thukan te’n tua nu na mukhia uh a, mat dingin na zongpah uh hi. Tua nu in, mi mawkmawk hi ing a cihhangin Sen gam galkap sungah panmun lian khatah sem in, a galkap puantawh a om sitsetna na mukhia man veve uh hi.
(Himun ah US theihlohkal in Sente’n US te pilna leh thusim bangzah gukhin ding cih ngaihsuthuai hi) Tua nu zong hailo a hihmanin a manlangtakin China Consulate ah na lutpah vingveng hi. US te’n tua nu hong piakhia un a cihhangin piakhialo uh a hihmanin na Sen zum uh tuzawh nai 72 (ni 3) sungin na khakcip un ci in Tuesday ni in US in thupia hi.
Sente’n zong a thupi lai pawlkhat haltumpah hi ci in ki gen hi. Tua nu pen tulaitak San Francisco a Sen zum ah om ding hi ci in ummawh uh a, a kisapleh US in San Franscisco a Sen zum zong khaksak lai kha ding hi.
Hih thu hangin Sen leh US ki zopna hong ki sia semsem a, Sen te’n ‘nong hehsakna uh tamta, bomb nong kiat uh tawh ki bang hi, hong mawkkoih tuan kei nung’ ci in na gen hi. Sen khuapi Chengdu a US consulate a khak nadingin thuhkikna in thu na pia vit hi.
Trump in Sente’n ka pilna uh hong guksak, ka nasep uh hong guksak ci in hehmahmah hi. Covid natna zong Sente bawl hi a cihlaitak Sente’n ‘tua covid natna no US te khutma hi’ na cihsan lel hi.
Hih covid natna vai a kan dingin July kha in mipilte Beijing tungcih i atkhin hi. A ngaihsuthuai khat ah: tua mipilte in Wuhan ah na asepding hun tengin Wuhan khuapi tuikhangcip se hi.
Tuikhanna pen khuahun guahtam hangzong hi ding hi. Ahizongin Sente’n tua Wuhan khuapi gei a, a tuibem (Dam) lianpi khat na hongbeh in tuikhah khia ziahziah sese hi.
Tua tuibem hong a hihmanin Wuhan ah tuikhang a, thukan te’n na aseptheihloh nadingin a bawl hilel ding hi ci in ki ummawh mahmah hi. Sente Three Gorge Dam thu zong tawm i gelhzo hi. Tua zong tulaitak lauhuai dinmun sangin tui letmat 6 sangzaw khin ki ci ta hi.
Sen leh US pen teltakin a ki simdo uhpen en i theihlohhang 2008 kumpekpan na hikhin hi. Leitungah a masa a kici khempeuh Sen te’n a nihna leh a thumna vive in koihsawm uh a, Sente a masa hi ding ci in thautang bangin hong leng zeza a hihi. Tua thautang a kapkhia zo ding omlo a, US bek in a hanciam a hihi.
Sen leh US a ki lemkik nadingpen mualmong etsangin gamla zaw cih ding a hihi. Sengam communist a bei nading hizaw diam? Nitumna gamlamte thuneihna a bei nuam hi zaw diam? khat teitei bel hong hi ding hi.
Thuciin Thuthang sungah Sen leh US thu i limgelhpen hi. Kawlgam leh thu neuneu te i gelhkei hi. US leh Sen pen tulaitak leitungah Top 1 leh 2 hipah uh a, hite buaina in leitungbup buaina hong suak ding hi. Ei te i ki nialnial RC leh C lo vaipeuhtawh buaihuai nai hetlo hi.
More: Taiwan in China gal nan nading in Harpoon Anti-Ship Missile galvan hoihte leisawm
Mi’n Sente mimal million 1400 te bangci ki pumkhatlit ding cihkhawng ngaihsunsun uh a, ei mimal tawm na leilei…i ki ko sepsup, i ki khenkhen te ma zial huai mahmah ta ding hi. Siamsin Library
Comment piaknop aomleh...