Australia Immigration Data’ ading athupi khat

Sanggamte,

Zaanni huanggawl bawl-tawh mopawi siimtawh mangngilh pak-ing. Ahihtheihleh asimkha te-in Zomi groups leh ANZ Groups ah kiluut kimlo ahihman-in biakinn ciat-ah nana pulaak thei le-uhcin (hun-awng ahmaw) lunggulh-ing.

Athu: Zomite-in Toptawm (adopted) tapa/tanu aneihzia

Queensland Immigration Officer khat-in hong hopih-a,

“Zomite anu asi naupang khatpeuh anuno, ani cihte-in atoptawm tanu/tapa-a akep-pen na’ ngeina uh-ah om takpi mah-hiam?” hongci-hi. “Adopted by his/her own auntie (both from the sides of mother and father”.

Hihpen namdangte’ ngeina-ah apiang thei khollo, apiang ngei khollo ahihziak leh QLD ah Zomi khat-in, “Ka’ nu asih ciang-in ka’ nuno-in hong toptawm (Kawl – Mwey Saa)-hi, ka’ nuno sam nuam-ing” acih man-in kei hongdong ahihi (ka’ contact angahzia-uh akisapleh hong damgen ning-in).”

Namdangte-pen toptawm tanu/tapa aneih uhleh amau’ meeltheih sung peuhmah pan-in kiphal lo-hi. Zomite ahihleh toptawm (adopted)-zong kici selo-in nu-in ngeeklaai pan-a anusiat nau-pen pa-in ziikiik aneih ngialhleh anii, anuno, apii cihte mah-in tanu/tapa mahbang-in akeem tosuak hi-a, tua-pen English te’ migration law sung-ah (Adopted Child – Toptawm Naupang)-mah akicih man-in amau’ ading-in Zomite’ Ngeina-pen up-huailo khat hongsuah ziak-in hongdong ahihi.

Ka’ dawnna-pen Rule and Regulation of Immigration File sung-ah koihnuam ahihman-in ka’ limkaih (signature) akihel thuahbelh laaidal-tawh hongngen uhhi. Ka’ dawnna-pen “Kawlgam minam khempeuh’ ading akizangh-hiam?” hongci-a, “Kawlte-pen khangto zawdeuh ahihteh tellian keng, Tribal Groups khempeuh-ah ataangpi kizangh” ci-in ka’ genkiik-hi. Hih-pen Zomi khempeuh-in theihkholh ciatding thupi leh kisam sa kahihman-in hong taangko pak-ing.

Hong kidotleh gentheih ding:

Zomite’ Ngeina-tawh kizuui-in,

Neulaai-a nu-in anusiat nau-pen anuno., anii., apii te-in akhanliat ciangdong keem-in khoi uh-a, Zomite-in toptawm nau (adopted child) acilo bek ahihi. Hihpen English te-in toptawm nau (adopted child) ci uhhi.
Kinaaina tuamkhat’ ziak ahihkeileh anuno, anii te khatpeuh-in ta aneihloh man-in nau akhuatheih ciang-in anuno, anii cihte-in keem tosuak thei-a, Zomite-in toptawm nau cihbang-in seh hetlo-hi. Hihpen English te-in Toptawm Nau acihmah-tawh akibang ahihi.
Dotnop aneng-atawng zawdeuh a-omleh anuai-a phone malsiamte-tawh hong zasak un. “Ka’ nuno sam nuam-ing” aci-pen sanggamnu inzong hong zasak theileh kilawm khading-hi.

Zomi Pasian’ Thupha!

Zokhai

T. Zokhai ITNA-IN GUABANG HINNA-HI
60 Narr-Maen Drive
Croydon Hills VIC 3136
Melbourne, AU
Tel: +61 39723 0460
Mob: +61 420 800 560