Holy Land thu tawmcik ~ Zomi Quavadis
Holy Land pen Pasian’ nasem a kipumpiakte omna dingin lawp huai mahmah hi. Banghang? Jesu totsa lampi zuihna in Pasian tawh ih kizopna thuuk sak semsem hi. A haksat thu in ahileh baih hial lo hi.
1217 kum akipan Holy Land a kemcing leh a munah Pasian’ na a semte pen Franciscan siampite ahi uh hi. Kum 800 pha khin hi.
Fr. Benjamin Owusu, O.F.M. in CNA te a genna ah, “Holy Land a Franciscan siampi pawl ka zopna a hang pen a leitang tungah Jesu na teeng hi. Tua hangin a leitang ngiat ka it a, a leitang tung ngiat ah Pasian’ na semin mi namkim tungah Pasian’ thu a tangko nuam ka hihi” ci hi. Owusu pen Ghana gammi hiin, Franciscan siampi a suah zawh kum 20 cing khin hi. Tulaitak Washington D.C ah Holy Land tawh kisai Pilgrimage Office ah na a sep laitak ahihi.
Fr. Anathasius Mocara, O.F.M in a genna ah, “Hih mun siangtho ah a pai nuam tam mahmah hi. A mun in vaang nei ngiat hi. A mun a tung khinte lungsim kilamdang zo hi. Banghanghiam cileh Gospel thu khempeuh hih munah mit ngiat tawh kimu hi. Vanglian mahmah hi” ci hi. Fr. Macora pen American hiin galkap innkuan sung panin a khang khia khat ahihi. Jordan ah kum 2 om in, Damascus ah kum 3 a om khit ciang tuni dongin Jerusalem ah om hi. Kum 20 pha khin hi.
Franciscan Siampi pawl pen St. Francis of Asisi in a pat khiat hiin hih Franciscan Order a phuat zawh kum 8 khit ciangin Holy Land a kem suak uh ahihi. 1217 kum akipan tuni ciang dong Holy Land pen Franciscan Order te kepna sungah om lai hi. Franciscan Order pen Catholic institution khempeuh lakah a lian pen khat ahihi. Holy Land a pai khempeuh amau khut sungah om hi.
2016 kumin Holy Land ah Franciscan siampi pen 216 om khin uh hi. Pawl khat Palestine, Syria, Jordan, Cyprus leh Egypt ah zong om kawikawi uh hi.
Macora in a genna ah, “Holy Sepulchre biakinnpi in ka lungsim hong lawng kha pen hi. Hih biakinn pen Jesu singlamteh tungah a kikhaina leh a luang kikoihna munah a kilam ahihi. Hih biakinnpi sungah mi tam thei lua uh a, ciak khengkhang den pian uh hi. Daai hit hiat leh nuam zaw kaan lai hi! Hih munah hong pai pawlkhat bangin Siampite tungah mawhsuutna bawl uh hi. Tuate lakah a tamzaw pen mawh a suut loh zawh uh kum 40 bang pha khin hi. Hih munin ih lungsim hong suk khak dan pen lamdang hi” ci hi.
“Tua banah hih munah vocation (Pasian’ sapna a ngah a kipumpiak siampi) tampi kisam lai hi. Mun siangtho pawl khatte pen mi tam uh ahihmanin kikemcing zo lo dekdek hi. Khangnote in hong ngaihsun dih un, Pasian in nang hong sam hiam, lungngai un” ci lai hi.
Israel gamah Jewishte tam pen hi. A zomah Muslim Arab Palestinian te ahi uh hi. Tunai ciangin Christian tampi hong lut uh a, 2% bang kipha ta hi. Tuate pen Catholic leh Orthodox te hizaw diak uh hi. Holy Sepulchre biakinnpi, Bethlehem a Jesu suahna munah a kilam biakinnpi leh Siangtho Mary luang kikoihna munah a kilam biakinnpite pen Catholic leh Orthodox te aa ahihi.
Palestinian thuneite in East Jerusalem pen amau khuapi dingin deih uh a, buaina om kiaukiau thei zel cih pen ih theihsa tek hi. Zomi Quavadis (Source : Catholic News Agency)
Comment piaknop aomleh...