Hampha Lua Hang!
Tuma kum bangzah hiam khat lai-in, America gam ah nupi khat in a ta pasalno ngeklai khat don zawh kep zawh ngap nawn mahmah lo ahih manin ta dinga a deih a om leh a kilak theih nadingin state agency-te ap hi. A sunga piang ahih hangin, a it a ngaih mahmah hangin, a nuntakna haksa lua, tua tangek a kem zo ding dinmun ah om kisa mahmah lo ahih manin tua banga a hih ahi hi, kici hi.
Tua nu mahmah in ahi zongin, midang khatpeuh in ahi zongin a lam-et ngam loh ding thu khat hong piang hi. Tua nu in kep zawh ngap nawn mahmah lo a, a deih peuh in kem lel hen, ci-a a paihkhiat tua naungekno pen California state sunga teng nupa khat in a ta dingun la lian uh hi. Tuate nupa pen mihau lua mahmahte hi uh a, a innsung vuah kum khat sumlut pen $1,000,000 pan 1,500,000 bang a pha ngiatte na hi uh hi. Tua ban-ah a neihsa uh kinelhsiah lua mahmah a tanghauhte na hi sawnsawn uh hi.
A kisam khempeuh vaihawm-in, tua naupang a ngah theih nading vua kisam laidal khempeuh min a thuh khit uh ciangin, kha 15 (kum khat leh kha thum) a pha pan tua naupang pen tua nupate’ neihsa $20,000,000 a luahpa dingin kiciamteh hiauzen hi. A nu in kem zo lo a a piakkhiat, bangmah thei nai lo naupang, a theih ma hel-in mihaupi suak mawk hi!
“Hampha sam ei, tua naupang!” Hampha mawk mah ei, tua a luah ding hauhnate a hoih lamin zanga thupha a suah takpi ding deihsak mahmah hang.
Tua naupang “mi hampha” a suah zawh kum nih kum thum khawng bek pha pan hi. Tua zawh Christmas nihvei thumvei khawng bek kibawl pan hi. Tua mihau nupate in tua naupang adinga tuma kum nih kum thum lai khawnga a sep bangin Pasian in nang leh kei’ adingin Christmas masapen ni zan-in hong sepsak khin-a, Pasian’ hong sepsak pen thupi zaw lua mahmah sawnsawn hi! Christmas ni-a piang na lamdang tungtawnin Pasian takpi mihingin hong piangin, naungekin hong suaka, Pasian’ innkuan sung mi i suah theih nadingin Pasian in lampi hong honsak hi. Tua Christmas thupha hangin a man a kiseh zo ngei lo ding, a kigen khin zo ngei lo ding, a sim zo ngei peuhmah lo ding tawntung hauhnate a luah nu/pa i suak thei zen hi. Hampha lua hang!
Laisiangtho in siangtak teltakin hong hilh hi – ei mihing tate i pianken-in Pasian’ tate hi peuhmah lo hanga, “thangpaihna/hehna tate” i hi zawsop hi (Eph. 2:3). Ahi zongin tua Laisiangtho mah in hong hilhna ah, Christmas masapen ni zanin, “tapa hihna i ngah theih nadingin ( that we might receive the adoption of sons) a kicin hun a tun ciangin, Thukham nuai a om mite a tankhia dingin Pasian in a Tapa hong sawl-a, numei sung pan piangin, thukham nuai ah hong suak hi….Tua ahih manin note sila/nasem na hi nawn kei uh hi; tapa na hih mahbangun Khrist tungtawnin Pasian gamhluah na hi khin zo uh hi” ci-in hong hilh hi (“Gal. 4:4,5,7).
Christmas masapen ni-a piang thu hangin nang leh kei Pasian’ tanu tapate i hi ta hi. Pasian’ gamhluah – Christ tungtawnin – i hi laizen hi. Christmas message- Lungdambawl thupuak a cih tua ahi hi – Khrist hangin i dinmun kikhel-in Pasian tate i suak thei ta hi!
Pasian’ innkuan sung ah hong kisan ciangin, vantung hauhnate a nei nu/pa i suak pah sawnsawn hi: i mawhna hong kimaisak, dik hong kitangsak, hong kisiangthosak, Pasian tawh kilawmtakna nei thei-in, a khawnkhong, a dim, a kicing nuntak tawntungna hong kipia hi.
Pasian’ Tapa leitung mihing tapa khat-a hong pian manin tuni-in nang mahmah vantung’ tapa na suak thei hi! “Hampha lua hang – nang leh kei!
“Ama’ zawnna tungtawnin mihaute na suah theih nadingun amah a hau ahih hangin note adingin mizawng hong suahna i Topa Zeisu Khrist hong hehpihna na thei uh hi” (II Corinthians 8:9).
(2009 kum December kha-a kihawm, Tedim EBC Khangnote’ EBY Newsletter adinga ka gelh ahi hi.)
Rev. Zam Khat Kham
Comment piaknop aomleh...