New York City pan ISIS galkap tumsawm mi 3 te

New York City pan ISIS galkap tumsawm mi 3 te

New York City khuapisung ateeng mi 3 te’n ISIS galkap tumding in ki thawisawm uh cih thuthang Fox News pan kiza hi. Hih mi 3 te US gampan apaikhiatma in kiman uh a, 2 te pen Uzbekistan Citizenship hi uh a, adang khatpen Kazakhstan Citizenship ahihi.

Hih mi 3 tengin Syria gamsung ah zinkhiatsawm uh a, tuapan in ISIS Militants tetawh aki zopsawm uh ahihi ci’n US Justice Department in Wednesday ni in genkhia hi.

Thumte lakah khatpa pen President Barack Obama athatding in sawlna a ngah hihtuak sawnsawn hi.

ISIS galkap tumsawm akiman te ii amin apuam pen anuai abang ahihi.

1. Abdurasul Hasanovich Juraboev kici minneipa pen kum 24 bek pahpan a, Uzbekistan Citizenship ahihi. US gamsung Brooklyn, New York khuapi sungah ateeng khat ahihi.
2. Akhror Saidakhmetov kici minneipa pen kum 19 aphapan, Kazakhstan Citizenship ahihi. US gamsung Brooklyn, New York khuapi sungah aom khatmah ahihi.
3. Abror Habibov kici minneipa pen kum 30 phakhin a, Uzbekistan Citizenship ahihi. US gamsung Brooklyn, New York khuapi sungpanmah ahihi.

Saidakhmetov leh Juraboev tegel pen Wednesday nitaklam in Brooklyn aom Federal Court ah thusitna thuakkhin uh cihzong kizakbeh hi.

Nungdiak mahmah inzong Malaysia pan numeino kum 14 aphapan khat ISIS galkap tumding in Syria gamah zinkhiatsawm a, thunei te’n ahunlap in Malaysia International Airport pan mankhia uhhi. ISIS te gamtat pen lipkhap huai mahmah hinapi in, apanpihnuam leh tha apia mahmah mi honkhat na om veve mawk hi. ZD Sawltak #zomidaily