Indonesia ah gutakhat khuasung mipi te’n vuagawp in meitawh hallum

Indonesia gamsung ah gutakhat khuasung mipi te’n vuagawp in meitawh hallum

Indonesia gamsung ah pasal kum 30 gualpawl khatin Mosque kikhopna ah akizang Amplifier guksawm ahih manin, meitawh kihallum cih Jakarta Post pan kiza hi. Indoensia, West Java, Bekasi Regency, Suka Tenang aom Mosque khatah Tuesday ni in thupiang ahihi.

Suntangpi in Mosque panin Amplifier 3 tak gukkhiatsawm in, tualian laitak in khuasung mipi te’n bingtuahlian uhhi. Gutapa zong khuasung mipi te’n amuhlam atheih ciangin taikhiapah vingveng in, Suka Tenang leh Muara Bakti khua kikal ah aluang luisung khatah tuaksuk cihi.

Ahi zongin Muara Bakti khuasung mipi te’n alanglam ah napang uh a, namanpah uhhi. Amatkhit uhciang in benggawp, vuagawpphot uh a, tuakhit ciangin datsi “Gasoline” apumpi tungah buakgawp in, meitawh hal uhhi.

Tua meikuang tengtawh thuakzolo in aphualmah ah gutapa sisuakpah hi.

Police Chief khatin agenna ah apumpi khempeuh 80% bang meikanggawp ahih manin, tua meikatna tawh asi hi ci’n genkhia hi. Aluanghawm pen Est Jakarta aom Kramat Jati Police Hospital ah kipuaksuak cihi.

Video: Man burned to death for stealing mosque amplifiers

https://www.youtube.com/watch?v=4nzkuwCr8aE

Police te’n athupiang teng dongpah uh a, Amplifiers tengleh gutapa ii zat ahiding in aki ummawh Motorcycle khatzong mankhia uhhi.

Related: Indonesia President inzong Drug Traffickers te thautawh kapkhuan piata

Khuasung mipi te’n amauthu in gutapa athahlup, ahallup uhpen Police te’n diksalo uh a, Indonesia gamsung ah thukhun Laws omdimdiam ahih manin, khuasung mipi te’n nomau thutawh thu nakhentat kei un ci’n Police Chief khatin genkhia hi. Sawltak #zomidaily