Malaysia golhguknek akankhia zumpi MACC ah Najib ki paipihta

Malaysia golhguknek akankhia zumpi MACC ah Najib ki paipihta

Malaysia gamsung ah abeisa in Prime Minister asemlui Najib Razak pen 1MDB (1Malaysia Development Bhd) sumvai tawh mattheih nadingin aki hanciam laitak ahihi. Tua akankhiading in 1Malaysia Development Bhd (1MDB) Special Task Force cihzong kiphuankhin a, tuni Tuesday akipan nasep kipantading uh cih theStar pan kiza hi.

Najib Razak tungpan inzong Statement Record kibawlnuam ahih manin, tuni Tuesday (May 22) zingsanglam 9:45am hunin Malaysian Anti-Corruption Commission (MACC) Headquarters ah ki paipihta hi.

Hih thudot, thusit, thukanna ah Investigating Officer bangzah kihelding cih ki pulakkhialian nailo a, naibangzah sawtding cihzong kithei nailo hi. Ahi zongin abeisa Case te abatleh thudot thusitna “Questioning & Investigating” pen nai 10 sungbang ziakaithei kici hi.

1MDB Scandal vai, sum neksimna vaitawh kisaipen 2015 kumpekpan akipankhia ahihi. Ahi zongin tualai in Najib Razak pen Prime Minister aseplaitak hi a, bangmah khialhna kaneikei hi ci’n Najib in nialcipden hi. Tuaban ah 1MDB vai akansawm Malaysian Anti-Corruption Commission (MACC) makaite pen Investigation abawl hangin khakcipsak pahpah kici hi.

1MDB sumvai tawh kisai in Najib in ama mimal Personal Bank Account sungah RM2.6 Billion (US$681 Million) lutsak kici a, tuavai akikan ciangin Saudi Royal kumpi te’n Donation apiak hi cihtawh khupcip sukziau hi.

Tu’n Dr. Mahathir in Prime Minister hongngahkhiat, hongsep taktak ciangin tua 1MDB vai hoihtak in aki kankik theipanding ahihi.

Najib ii Lawyer te’nzong nasep khawlsanta

Abeisa in Najib Razak ii Lawyer asem ahi Datuk Harpal Singh Grewal leh M. Athimulan tezong Najib ii Legal Counselor panin khawlta cih NST pan kiza hi. Hihvai tawh kisai in Harpal Singh Grewal tungah akidot ciangin, kakhawl tamah hi. Najib tawh Jalan Langgak Duta aom ama innah kaki kupkhit uhciangin khawlding akhentat hi ing ci’n genkhia hi. Hihvaitawh kisai in Lawyer tepen amauthu in akhawlngiat uh hi a, Najib in nasep atawpsak cihbang hilo hi ci’n NST te’n genkhia uhhi.

More: Thai gamsung aom Myanmar Refugee mi 93 te ki ciahsak

Najib ii abeisa sumvai tawh kisai 1MDB gamtatna vaipen tulaitak hoihtak in aki kanciansan laitak hi a, tua Result tungtawn in Najib pen thong akiatleh akiatlohding ki khentatding hi ci’n Dr. Mahathir in genkhia hi. Abeisa in mattheih taktak nading mawhmat kician, Evidence kician taktak kimu nailo himahleh tuni akipan 1Malaysia Development Bhd (1MDB) Special Task Force cih kipawlna in mawhpuakla in Najib ii sumvai limkansawm mahmahlai uhhi. Sawltak #zomidaily