Hello Tedim (3) ~ Hau Za Cin
Khoppi siim dinga paite khuamual a suak lian uh leh sangnaupangte in kituak diamdiam a a sak uh pil sinna la: Hanlungciam ni seino lia leh taang, Sian sinthu anglai pai bang pom in, Vaimang siamsil siam bang in sin leng, Namcin zata tawh tan bang kim ding, Nunnuam in i leng ding Zolei ah awging kiza ciaiciai hi. Tua bek tak in Zomi te tuanna dinga Japan mipilte bawl mawtaw sung pan kumsuk in Zogam leitang sik in khe tawh khuasung lamdung siang kiuhkeuh zui in pai pheiphei uh a, Lawibual, Khuapiveng, cihte tung phei in Zolengthe Naipi Tau dong amau dawnte tawh a ton uh hi.
A ngawng vua vum viatvuat a kiawksak pakkual tawh lamdung tengah mipi khutlet phei kawmkawm in a pai man un Zogam khuapi khat ahi Tedim sung nuam asa mahmah uh hi. Zin muakte tawh Zolengthe Naipi Tau a tun ciang un mipi tam lua mahmah ahih manin miksi bu holh bangin so nainai lianga, makaite pawlkhat in zinte lamkhanga Zomi niangtui zuakna ah a lutpih uh hi. Zogam Coffee namtui veuveu khu veuveu in sa hithit a, a dawn ma un a nak uh na tai zota hi.
Ni hong kai deuhdeuh a, Tedim khua lamdung khempeuh ah Zosuan Tuailai Khawmpi sim dingte kipelh naunau uh hi. A kimu ngeilo kimu ciil lah tam a, a kimu ngei khin kum tampi kimu nawnlo tampi mah kimu kik in lamdang sa in a kimuhloh sung vua a nuntak dante uh kikum in nuamsa in a khitui uh bang luang liang hi. Zomi khawmpi in Zomi tampi sak leh khang pan hong kaikhawm in, hong kimeltheihsak a, a kimu ngeilo Zolia Zotaang te nangawn ‘kikhen nawn kei ni aw’ cih kamciam tawh ki itna khaici na tuhtuh uh hi!
Naupangte in nuamsa in, khangnote in metpih in, nu leh pa in khuamuhna behlap a, pi leh pute in a hunlui uh ngai in ‘lakik thei leng maw’ ciin khangthakte na eng keei uh hi. Amau hun a nuam asakte uh hong gen uh ciangin khangthakte in theihna tampi kibehlap a, phawk ding tampi hong phawksak in, ciamteh ding tampi hong theisak hi. Nu leh pate in a tate uh a pattahzia ding uh hong mu tuam a, khangnote in a mailam hun hoihte uh bangci zat ding hong thei tuam in, naupangte in ‘ka gol ciang ka hih ut hihte hi ei’ ciin a ut uh, a deih uh, a thupi a lian a manpha tampi hong theita uh hi.
Zogam aklui khempeuh lah lungdam in na khuangkhuang uh a, akpi nokaite in lah a note uh na khawm liailiai in a note in zong a nute cihna peuh na mang diamdiam uh hi. Zogam hoihna pak namcin lah etlawm takin mualcin bawm in na pak ziziai a, a hiang dawn ah Zolawkta leh Zophualva te in nuamsa in nunnuam zaila na awi uh a, kuamah englo in a kawi ngaihno uh tawh na khawl khawm uh hi.
Singcih pak bawm vasa namcin in sak leh khang kawm in na leng diaidiai uh a, nunnop zailate sa in na gualnuam diamdiam uh hi. Hih zah a Zogam hoihna kitawi kua in mu ngei hiam! Zogam pen mi khempeuh, va khempeuh, singkung khempeuh…. na khempeuh adingin : “len len len len lenna vangkhua” himai hi.
Zogam nuamlo hileh mikangte in England khuapi London pek panin hong delhto lo ding uh a; Japante in Tokyo khuapi lianpen pek pan hong zuansuk lo ding uh hi. Zogam a teng Zomite bek hilo in leitung mipil masa English te leh Japanese te in zong a lunggulh gam uh Zogam na hi veve mawk hi. Zomite sanga a gam uh a khangto masazaw, a vanzat uh a tangzang masazaw minamte in zong Zogam lunggulh in nuamsa uh ahih leh Zogam pen nuam takpi hiding hi.
Zomite gamdang a tun uh hangin zong Zogam ngai in Zogam thu mah za nuam uh a, Zomite nuntakzia mah thei nuam den uh hi. Hih in Zogam leh Zomi a it-huaina hong kilangsak hi. Mi’n zong a gam uh ngai, en zong i gam a ngai hilel hang cih baih mahmah hi. Gam ngaih ding a neilote in a ngaih ding uh om hetlo ding hi. Tua manin gam ngaih ding a nei a hong bawl Zomi Pasian tungah lungdam ko den ding hi hang.
Tua banga mite in nuamsa a Zolengthe Naipi Tau kim tengah a kilehsuk a kilehtoh ziahziah laitak un tung sunni zong mual ah tum dingin hong kiasuk diaidiai a, ak gil kah dingin hong kithawi diamdiam in tua tak ciang bel Zomi lasiam Lengtong Pauno in:
- Ka neulai in khuamui kuan in,
- Ka lawmte tawh ka kimawl thei zel a,
- Huih nung in thete hong khuan ciang,
- Inn pan ka tuun aw nem in hong sam ciaiciai e
a cih hun hong tungta ahih manin naupang kimawlte leh upate, khangnote zong amau inn lam ciat zuan a nitak anne dingin a ciah liailiai uh hi. Khua hong zing a, nitak ann nek khit ciang bel Zosuan Tuailai Khawmpi kipat nitak ahih manin a Honna ah kihel dingin Zopuan silh in paknamtui kinuh in a hoih pen a kizem vive khuasungah kizui diamdiam leuleu a, khuasungah paknamtui bungpi a kibua bang liangin a namtui veuveu hi…
Zolia leh Zotang a lawmngaihte tawh a tukhawm kha, a kizuikha te mah hampha – khangkhat nuntak ciatciat! Hun pai lo in dinkhawl den leh ut mai unteh…ahih hang Zomi leh Zogam in mainawt in a pai zel kul hi. (zop lai ding) Hau Za Cin
Comment piaknop aomleh...