Gilsunga Dawilut tawh kisai

Gilsunga Dawilut tawh kisai

Kristian biakna ah i melma a lian pen Satan ahi hi. Dawi mihing gilsungah lutin buaina bawl thei hi. Zomite bek thamlo in namdang ten zong mihing sunga dawilut na buaipih peuhmah uh hi. Mihingte tungah siatna khatpeuh a tun ciang in Satan, Dawi leh Sikha nasep ding kisa kha zel hi. Tua pen a tak tak in ci leeng theih tell oh man hi zaw. Natna khenkhat epilepsy, hysteria leh schizophrenia te khawng peuh sunga dawilut in ki ngaihsun thei hi. Tuabang mite dawilut kepin a kikep tak ciangin a lungsim uh siatlawh zawsop thei hi.

Laisiangtho sungah Dawi in mihingte a buaisak na thu kimu hi. Topa Jesu mah mah in zong mihing sunga dawi om hawlkhia hi. Satan kici kammal pen Hebrew pau ‘adversary’ pana kilasawn hiin melma,gal cihna ahi hi. Pasian melma lian pen in kiciamteh hi. Pasian vantungmite lak pan a lian pen ahi hi. Ahizongin hazatna tawh Pasian do ahihmanin van pan in a nungzuite tawh leiah kikhia hi. Tua pan in Pasian langdo tawntung den hi. Pasian leh Satan kido tawntung cih pen Khristiante upna hi. BC 6 kiim pek in Persian gam kamsang Zarathustra kici Zoroastrian biakna mukhia pa in a laibu ‘Avesta’ ah na gelh khin hi. Tua laibu sungah lei leh van bawlpa “Ahura Mazda’ leh khagilo ‘Ahriman’ te aki lehdo thu uh kigelh hi. A tungin Pasian leh Dawi kido den cih upna pen thuthak khat hi. Ahizongin Judaism thu-upna khat hong hi in tudongin Khristian te’ upna khat hong suakta hi.

Kum zalom 18na hunlai in Europe gamah khantohna nasia takin om hi.Tuahun pen “Age of Enlightment” kici liang hi.Tua hun akipan mihing gilsunga Dawi lut(possession) tawh kisai upna zong hong kidang ta hi. Dawi nasep a kingaihsun pen mi khenkhatin mihing lungsim sub-concious mind hang hi cih upna hong nei uh hi. Lungsimin sunga dawi om danin a ngaihsut man hi kici hi. Tua banah natna epilepsy, hysteria leh schizophrenia veite zong gilsunga dawilut dan in om thei cih kitheikhia hi.Tua manin a kep a khoi dan zong hong kilamdang to zel hi.Christian Theologians tampi ten dawi “devil” pen symbolic dan bekin ngaihsun ta uh hi. Catholic Church lam ten bel Devil a om lam kiptakin um uh hi.Khristian biakna a tamzaw ten zong gilsunga dawi lut pen lungsim ngaihsutna tawh hong piang tawm hi dingin um theilo uh hi. Pawlkhat bang Satan nasepna mah hi dingin ngaihsun uh hi. Tua manin Catholic Church te bangin dawi hawlkhiat dan a nam tuam tuam nei uh hi. Dawi hawlkhiat a siam phadiak siampi te pen “Exorcist” kici hi.Dawi hawlkhiat zia ding zong kum 1614 in Pope Paul V kician takin “Rituale Romanium” laibu sungah gelh hi.Tua pen Pope Leo XIII in puahpha kik hi.

“Rituale Romanium” sunga kigelh danin gilsunga dawi lut takpi te pen a gimnam leh biakna tawh kisai a launa pan un kithei ci hi. Laisiangtho bang lau cih takin lau uh hi. Tuabang miten amau thei ngeiloh paute siamtakin pau thei uh hi. A uphuai lo zah dongin thahatna nei uh hi. Dawi hawlkhiat siam siam “excorcist” ten dawilut te’ tungah khutnga in, kammal khauh tak leh tuisiangtho khawng banah singlamteh ciamtehna tawh dawi hawlkhiat sawm uh hi.Tuhun ciang bangin mawk hawlkhiat sawm pah lo uh hi. Dawi lutna mihing pen limtakin Psychitrist te tawh endik masa phawt uh hi. Tua ciang Doctor kiangah a om lai mahin a dawi excorcist ten hawlkhia uh hi.Gilsunga Dawi om hawlkhiat ding ciangin pilvan mah mah kuul hi. Mawk maingap ding hi deklo hi. Kum 1997 in Newyork khangno Amy Burney a nu leh a pi in a sunga dawi hawlkhiat sawm in ammonia , cayenne pepper, vinegar leh olive oil gawmin nesak uh hi. Tua khitciang a dawi a paikhiat theih nangin naakpi takina bawl ua leh dawi veinu si ziau hi.

Dawi aki hawlkhiat ciang a kiim naiah om loh ding hoih hi. Dawi a paikhiat ciangin a kiima midangte sungah lut thei hi. Excorcist ten Dawi a hawlkhiat ding ciangun ni 7 bang ann tangin thungen masa phot uh hi. Mawk maingap ding hi lo hi, lauhuai hi. Catholic Church te ciapteh dan in Dawilut a kingaihsun 1000 lakah 14 khawng bek a tak taka dawilut ahi hi. American Director, William Friedkin-in 1973 a ‘The Exorcist’tih film a bawl akipan dawi thu tam tuam kici hi. Germany, Austria leh Switzerland khawngah zong dawilut thang peuh mah hi. Gens amah bangin dawi hawlkhiat ding ciangin pilvan kuul mah mah hi. Jesu nungzui ten nidanglai in naupang sunga dawi hawlkhiat sawmin hawlkhia zolo uh hi. Bang hang hiam cia Jesu kiangah a dot ciangun Jesu in “Na upna uh tawm lua(Matthai 17:19,20)” ci hi. Thungetna lo tawh kihawlkhia zo lo ding cih zong gen hi(Luka 9:29).Upna lamah picin kuul mah mah ding cihna hi.

N.Pautunthang