Naungek suakcil ending in napai ciang theihhuai pawlkhat

Naungek suakcil ending in napai ciang theihhuai pawlkhat

Naungek suakcil aom ciangin meltheih tanau leh lawmleh gualte’n lungdam pihna in nau ending in kipai ciat hi. Hihpen leitung gamtuamtuam, muntuamtuam ah akizang ngeina hoihmahmah khat cihtheih ahihi. Leitung ah mihing khat aki behlapsak anu pahtawina leh leitung ah tungcil naungek vaimuakna ci’n anu leh naungek mitsuan in akipai cihtheihzong ahihi.

Ahi zongin naungek suakcil pen aci asa ngeklai mahmah ahih manin, zato ahih keileh inn ah nau ending in napai ciangin theihhuai thu pawlkhat cidamna kiukhat panin ihki hilhsawn, theisaksawn nuam hi.

1) Nausuak nupi te pen gim mahmah uh ahih manin, ahihtheih nakleh atawmpenpen nai 24 sung tawlnga sak hithiat phot in. Cihnopna ah nausuahzawh nai 24 sung nau ending in paipah saisai kei in. Ngim mahmah uh ahih manin, Phone tawh hopihpih dingzong ngaplo khading uh a, SMS tawh Message khakziauphot mailecin hoihzaw hi.

2) Ahih theihleh nahawhma in Phone hiam, SMS hiam tawh hopih in dongmasa in. Anu maw, naungek maw khatpeuh adamlo omkhaleh theikhol saklo in nabingpai ciangin alungsim uh nawngkai sakthei hi. Tuaban ah nikleh puan abuahbang laitak in na bingtun seisai ciangin kilaih manlo uh ahih manin, nopmawh hongsa mahmah khathei hi. Tacil nupi tebang zumbaih phadiak uhhi.

3) Naungek suakcil pen mi tampi in umcih henhan zong hoihkhinlo hi. Adiak in adammello te naungek ending in paihetlohding hoihzaw hi. Bukvei, nattun cihbang adamsianglo tepen ih muhtheihloh lungno pawlkhat naksung ah omthei a, tuate pen naungek te’n thuaklah mahmah uhhi.

Adiakdiak in khacinglo in asuak naungek te natna kilawhbaih phadeuh ahih manin, kidop huai mahmah hi. Tuaban ah ICU (Intensive Care Unit) ah akikoih naungek khawng etnop, khoihnop citciat sese kullo hi. Gim mahmah ahih manin ICU ah akikoih cih phawk huai hi.

4) Na ending in nahawh laitak naunawkpiak tawh akituahleh ki hemkhia phot in. Nupi tacil nei pawlkhat te’n naunawi piakpen mimuhna ah nuamsa hetlo uhhi. (Gamdang atung nupi pawlkhat leuleu Bus Stand khawngah mikhempeuh ii muhtheihding in nawi pia hithiat uh a, etlawm hetlozel hi) Pawlkhat nupi te’n lengna aneih uhciangin nawi piasuak ngamlo uh ahih manin, nau nawkpiak khawlsan uhhi. Nang hawhhang in naungek in an ngawllawh cih phawk in.

5) Agim akhauh “Zimui” Perfume khawngtawh nau ending in paikei in. Zatep khitphet in naungek gei ah nehkei in. Naungek in thuaklah mahmah dinghi.

6) Photo nazaih nopleh khuan ngenmasa in. Naungek amit ahah laitak Flash tawh Photo zaihpen naungek mit in thuaklah hi. Gamdang muntuamtuam aom zato sungte ah Photo kizaih theilozaw hi. (Zato ah cina gimmahmah, ICU sungah alum likliak, Accident sisan naisan tawh akidim, misi kikhuang deldal, etc… cihkhawng Photo azaihnuam phadiak pen Zomi te hisam kenteh mate 🙂

7) Naungek suakcil pen abiangkhawng namnam sedah in. Na biangmul, na mukmul, na khua ul te naungek in thuaklah mahmah dinghi. Nakam paninzong lungno kilawhthei hi. Naungek ka etciang katawiloh ka lungkimkei cihkhawng gamkhangto te’n zangkhollo uhhi. Nang’ nausuah hunlai ahih keileh, Zogam ah lokuan in nau kisuaklel cihte tawh tehkak pahpah ken, hun tampi kikhelzo hi. Anu apa te’n hong gennam lohhang in dik sakhin khollo theihi.

8) Nau en in napai ciang gamlum henhan sakkei in. Nakpau lala kei in. Naungek suakcil te adingin ihmut pen thupi mahmah a, amau adingin thahatna Vitamin namkhat ahihi. Naungek suakcil pen hak kelkakden cih omlo a, ihmumu zaw uhhi. Nawngkaisak khaken.

9) Nau et nadingin kimawlna leisak ken. Nausuakcil te adingin kimawlna pen kimanna aomloh banah alupna tungah koihleng lauhuaizaw hi. Na leikhit phiallehzong agolciang, aki mawltheih dingciangin piapanzaw in. Gamkhangto te ah nau etna in nautawdap, Diaper khawng kipiazaw hi.

10) Nau en in napaiciang sauveipipi tutkho teta kei in. Nailang val tutpihding kisamlo hi. Anu leh anau tawlngak hunding kisam hi. Ref: Child Health Myanmar

Naungek suakcil ending in napai ciang hih atung a thute ngaihsun zelzel in. Nupi naungek nei nahihlehzong hihthu te phawk huai hi. ZD Sawltak #zomidaily