A ngaihsut huai leh a dahhuai thutak ~ Feedback

A ngaihsut huai leh a dahhuai thutak ~ Feedback

Ataktak thupiang ahilo, laigelh siampa in apiang theiding agelhkholh ahihhang, ciin ding, theihding, theihhuai tampi om sa ing.

1. Na vawh bang aa a at kik na hihi.
2. Hun khat lai aa na Nu leh na Pa thuakteng athuak, anawk, athei na hihi.
3. Nu leh Pa ateek khitciang aa akisap in sum leh paai hinawnlo in akiim apaam, agei ah a tu, a ta te cih ong phawksak hi.
4. Sum leh paai bekbek thupi asa Zomite ong thuhilhna ahihi.
5. Na Nu leh na Pa ong lunggulh lai, a lunglen lai in nasep taan ding, sum ngahloh ding launa tawh na ciahsan ngam kei aa, tu’n na lakik thei nawn kei hi.

6. Nu leh Pa in amau gel sang sum thupi sazaw tapa nei kha uh ahihi/
7. Sum leh paai, nasep pen i hatlai teng kizong theilel aa, Nu leh Pa in hun ciangtan nei hi.
8. Pasian in a vawh bang aa a at kikding aa akoih khat pen taangtang vawh pa aa ding ahoih hang tanghum, kiak vawhpa aa ding baih loding ahihman in na thunget nading ahoihpen in ong piangsak Pa’n ong laak mengmeng nading ahihi.
8. Khatvei ngaihsut khialhna in khang tampi ki gui zuih ding ahihman in, na mawhna thuneu hilohi.
9. Hibang aa ngaihsun khial tampi akigawm ciang Pitek, Putek kepna akisam ahihi. Nangzong kongvangneu aa na dakdak sang tua bang mun, na pawl ding zawn khol, zong khol leteh hizaw dinghi.
10. Hehpih huai hetlo nahihhang, hehpih ding lam in la lehang hehpih huai mahmah, hehpih huai sawnsawn na hihi.

Mimal thuakna taktak hilo thei kahihman in ka utteng ong gelhkhia kahihi.

Hang Khan Lian

A ngaihsut huai leh a dahhuai thutak

Ka nulehpate sunmang kei tungah hong tangtung in Engineering sinna College pan sang ka man a, USA sunga Company thupi khat ah na ka sem kha a, ka lungdam dan pen gen zawh pak ding bang hi lo hi. Kei ngaihsutna ah pen USA ah kum 5 sung nuam takin sum ka khol khit ciangin ka gam Zogam ah ciahkik ding cihpen ka sunmang hi.

Ka pa pen kumpi na a sepna panin penssion khin hi. Kum tampi sung a sum khol teng tawh Tedim ah innneu khat lam zo bek hi. Kei ngimna ah pen ka teek ciangin ka pa sangin neih leh lamh a kicing zaw neih zawh ding ka hanciam hi. Kaalsim in Tedim a om ka nulepate ka hopih den hi. Kum nih sung bang anlim mehlim vive tawh kivaak in, a nuam theithei in ka om hi.

A tawpna ciangin zi neih ding ka khensat hi. Ka nute hopih pah in “Nu aw ni 10 sung bek hun nei ka hihman in tua ni 10 sungin na khempeuh a lem ding in na vaihawm un” cih thu ka vaikhak hi. Vanleng letmat tawmman pente lei in Zogam ah lawp takin ka ciah hi.

Inn ka tun ciangin lawmlehgual teng tawh kithuah in, kaal khat sung ka neulai maan kizaih teng enkik in tuate sung pan ka nute’n hoih ka sak pen khat ka zi dingin hong teel sak hi. Ni 2 ni 3 sungin vai teng hong siang pah hi. USA ah kilehkik hun hong tun ciangin ka nute sum honkhat nutsiat in USA ah ka nupa un ka kilehkik uh hi.

US ka tun khit uh kha nih khit ciangin ka zi lunglen hong kipan ta hi. Nidang in innlam kaal khat in khat vei ka hopih uhpen tun 4 bang bang ka hopih tak uh teh sumlehpaai lam hong kicing pha nawn lo hi. Kum 4 sungin ta numei khat leh pasal ka nei uh hi. Innlam ka ho simin ka nute’n ih kimuh loh zawh sawt lua, ka tute uh zong mu nuam ungh hong ciah mengmeng un hong ci den uh hi.

Ahizongin sumlehpaai kicinlahna hang leh ka nasepna hangin innlam ka ciah zo ngei kei hi. Nikhat innlam pan hong kihopih in ka nulehpa te cina gim cih thu hong kigen hi. Holiday ngah thei lo ka hihman in innlam ka ciah thei kei hi. Kaalkhat khit ciangin phone mah tawh hong kihopih leuleu a ka nulehpate sih thu hong kigen mawk hi.

“Na nulehpa luang hanmual tangsak ding kuamah om lo ahihman in na innvengte un ahithei bangin na geel mai uh hi” cih thu hong kizaksak ciangin ka lungsim na ka sa lua hi. A tute melmu lo in ka nulehpa in hong sihsan uh hi mawk hi!

Tua zawh kum 2 khit ciangin bangbang hileh ciin Zogam khuapi Tedim ah ciahkik ding ka khensat a, innmun logam lei dingin teeng suak ding cih zong ka khensat hi. Ahizongin ka zi leh ka tate’n hong zui nuam lo uh hi. Ka sum neihsun tawh ka leizawh pen inneu khat bek ahihi. Hun hong bei toto in ka tanu in American tangval khat pasal in hong nei hi. Ka tapa in zong American nungak mah hong tenpih leuleu hi.

Tun kei kum 60 ka pha ta a, ka zi in hong nutsiat zawh kum khat val ta hi. Kei bek ka inn sungah om in, kongvangneu pan ka cim luat ciangin ka khuadaak zel hi. US a om ka tate’n kha khat khatvei ta cihkhong bek lai hong khak uh a, amau teng bek leitungah ka kitheihpihte ahi uh hi.

Keizong si hak nawn lo ding hi’ng. Kei ka sih ciangin hong gui ding ka tate lah USA ah om, kuan hong gui mawk ding hiam? Ka vengte mah hizel ding aive maw! Ta nei lo lah hi liang lo ingh a maw!!!! Ka nuntaakna sungah a lawhcing takpi mah ka hiam? A lawhsam hizaw ka hiam? Kei leh kei zong ka kitelzo kei hi! Francis Lamthang (Zomi Quavadis)