Dear Leitungbup a om Zomi ulehnau teng,
Tusungteng leitung a thupiangte i etciangin lungkham huai leh
adahhuai vive ahihi. Pasian kammal sunga omsa mahbangin hihdan te pen
apiangthei ding vive mah hizel hi. Tunungteng Europe gam Zomi te
kiangah Gospel paina thu anuai abangin kongpulaak nuamhi.
THUMASA LEH LUNGDAMKOHNA :
Tutung Europe gamsung ah Gospel paitheihna dingin adiakin Norway
Zomi innkuan te khawmpi Levanger ah Speaker dingin hongseh uha,
avaikhempeuh Norway Zomi makai ten hongvaihawm in sapna lam tawh
kisai in Lillehammer Baptist Church ten hongvaihawm sak in adiakin
Zomi sunga Laphuah leh lasak asiam mahmah khat ahi JK Kam in
hongvaihawm sak deuh hi.Zomi innkuan President Pa Dal Mung leh
JKKam ten adiakin hong vaihawm sakpha deuh uh ahihi.
NORWAY GAM ZOMI TE KIANGAH LUNGDAMNA GOSPEL THUPUAKNA:
June 26 ni-in ko omna Louisville khuapi panin Newyork ah tawmvei
tawlnga in tuapanin Norway khuapi Oslo zuanin kaleng suak a, June
27 zingsang nai 9 hunin Oslo cidam takin katung thei hi.Vanleng tual
ah Pu Kam Sing te mawtaw hoih mahmah tawh atanu Huaipi in hawl in
JKKam tein hongdawn uh a,katawl hongdam mahmah hi, vanlengkuan panin
Lillehammer khuapi pen nainihsung mawtaw tawh kihawllai in
lungdamtakin kapai suak uhhi.Zomi te mawtaw mah tawh Norway gamsung
kazin masakna ahihmanin kalungdam deuh hi.
Lillehammer khuapi sungah kalkhat sung tammasa in Norwaymite biakinn
ah nihvei hun zatna neithei in, ei Zomi te tawh zong hun thum bang
zangkhawmin Topa hoihna tampi kamu uha nuamkasa mahmah uhhi.Hih
Lillehammer khuapi pen kum 1994 in Olympic pawipi tunna hi in tuni
dongin ettheihding mun limcimahmah ahihi.Hih khuapi ah kaomsungin Pu
Kam Sing ten katung hi. Zomi te pen biakpiakna ah nathalawpthei
mahmah uh a, Norway te nangawn in thupi nasa mahmah uhhi. Norway
biakinn ahih hangin Zomiten pawlpi upa bang nasem uh a, kikhopna
hunkhat ah Mangpau, Norway pan , Zomi pau leh Kawlpan cihbangin
kizang khawm in thangah huai mahmah hi.
Zomi khawmpi Norway pen July 4-6 sung Levanger khuapi Pa Dal Mung te
kiangah tunga, tua teng ah Zomi te mun tuamtuam pan mimal 100 kim bang
hongpai thei in nithumsung khawmpi kinei hi, meeting hun, ngeina lam
hun leh Pasian thutawh thalak hun cihbangin hunkizang in thakingah
mahmah a hun tomkisa mahmah hi.Norway gam ten Constitution aneih zawh
uh kum 200 cinlai in JKKam phuah mangla tawh ” God bless Norway” cih
la zong hongsa kik uh a ilungsim hong zomahmah hi. Zomi kipawlna pen
Norway kumpi in theihpihna leh ciaptehna lai na piakhin ta uha,
abulkipmahmah khathongsuak ta uhhi.
Norway gambup Christian gam asuah nadingin Singlamteh tawi sa in gal
ado ahi St.Olav sihna mun kapai kha a, kum 1030 hun laiin Norway
gambup Pasian gam asuahna dingin Singlamteh masuanin gualzawhna alakna
mun pentuni dongin amunlimtakin kiciamteh hi.Kawlgam sung zong
Christian gam asuahna dingin upna tawh gualzawhna akila pah ahihi.
Norway gam pen Zogam tawh kibangin mualtung hi in khangto mahmah
ahih manin lampi leh nuntak khuasak dan nuammahmah hi, asung a om
Zomi te zong na thupi mahmah uha, mimal 202 bangbek aom uh hangin
kumpi theihtham dingin na nungta uh hi. Norway nungak te bangin Zomi
tangval te pasal dingin ngai mahmah mawk uha,akiteng sa leh akiteng
laiding bang om dimdiam uh hi.Mailam ah Norway gama om Zomi te pen
Zogam leh Zomi te adingin pa muanhuai mahmah suak thei dingin
lametna zong ka nei hi.
DENMARK GAM ZOMITE KIANGAH LUNGDAMNA GOSPEL THUPUAKNA:
June 30 ni in Denmark lam zuanin kapaia, Pa Dal Mungte thusiamna
tawh vanleng katuang thei hi. Denmark gam Billund airport katun
ciangin Pa Khen Muan , Peter Thawng leh Sangpi te in Pa Khen Muan te
mawtaw hoih mahmah tawh hongdawn uha, katawlhongdam mahmah pah hi.
Zankhat bek katam hangin Pa Khen Muan ten katung a nitak kikhopna
ah Zomi omthei tenghong pai uha, nuam kasa mahmah uhhi. Denmark Zomi
te athupit mahmah na uhpen Denmark pau pan in Zomi pau ah dictionary
thupi mahmah khat nabawl uha, gah hoih mahmah khat anei uh hongsuak
hi. Denmark gam pen alei tanghoih mahmah in anleh khaicite hoih thei
mahmah hi. Mailam adingin lamet huaimahmah Zomi te hi in kamu hi.
GERMANY GAM ZOMITE KIANGAH LUNGDAMNA GOSPEL THUPUAKNA:
July 1 ni in Pa Khen Muan in amawtaw tawh Germany gam Hamburg ciang
hongkha hi. Hamburg pen Rev.Ciin Sian Khai in Ph.D asinna Hamburg
University omna hi in ama sangah zong kahawh uha thupimahmah hi.
Hamburg khua ah zankhat kagiak a Nu Dim ten nitak khat kikhopna kanei
thei uhhi. Hih khuapi pen kum 1933 in Judah te thahdingin mi 24000
akikhol namun zong nahi in tunidongin amun hoihtakin ciamteh uha,
mualsuang zong phut uh a khasiat huai mahmah lai hi.
July 2 ni in Hamburg panin Sia CS Khai thusiamna tawh thautang meileng
acih te ahat mahmah te hongtuang sakin cidamtakin Frankfurt khuapi
katung thei a, Sia Paul Thangpi in ama mawtaw hoih mahmahtawh
Station ah hongdawn in itawl hongdam tuam pah zelhi. Frankfurt khuap
ah zankhat Sia Thangpi ten ka giak a, nitakin Pa Paupi ten Zomi
omthei teng tawh Topa biakkhopna kinei in Zomite a omthei khempeuh
hongpai in kikhopna hong nuam mahmah hi. Innteek nu Paulun pen
Tedim a ka tansawm kahpihnu nahi in kalungdammahmah hi. Hih Frankfurt
khuapi pen leitung a khuapituamtuam lak ah akizang mahmah
khuapihiin etlawm in hoih mahmahhi. Germany gam a om Zomi te zong
kimuh tuahding ahamsat mahmah hangin hihbangin Pasian mintawh ipai
ciangin hongkikaikhawm tang tang uh a thupi thei mahmah uhhi. July
3 ni in Frankfurt khuapi panin Oslo khuapi zuan dingin Sia Thangpi
te thusiamna tawh vanleng tawh kaleng a cidamtakin Norway gam
Trondheim khuapi nitak nai 6 in katung thei a, Pa DalMung teinnkuan
in amawtaw hoih mahmah uh tawh airport ah hongdawn uh a,Zomi
pawisim ding pawlkhat in zong airport ah hongdawn thei uh a,
hongnuammahmah mawk hi.
EUROPE PAN USA ZUAN IN CIAHKIK:
July 8 ni in Norway gambup Zomi khawmpi panin US zuandingin kaciah
kik a, Trondheim pan Oslo lengkik in nitak nai 4 in Oslo
airport panin Copenhangen khuapi zuanin kaleng kik ta hi. Denmark
khuapi Copenhangen panin alamdang mahmah thu ah,keilei tiket pen
economy class bekhi in ahizongin Denmark pan Newyork kikal pen
Business class 3 C na hongpia mawk uh a nopcihtakin nuam kasa a,
kalei atuam hongpiak uh tiket atuam hi in Pasian hongvaihawm sak
ahihmanin nuam kasa mahmah hi.July 9 ni zingsang nai 11 in ko omna
Louisville ,Kentucky cidamtakin katung kik a, sanggamnu Santa in
mawtaw hawl in kalawmnu tawh hongdawn uh a, cidamin inn atungkik
kahih manin kalungdammahmah hi.
THUKHUPNA LEH LUNGDAMKOHNA :
Tutungin Europe gamsung adiakin Norway , Denmark leh Germany a om
Zomi te tawh Pasian hongitna lungdamna gospel thu hangin kakimuh
theihpen kalungdam mahmah hi.Ih Zomi pih te adingin thungen den
kahhmanin hihbangin anuntakzia uhleh akhuasak zia uh kamuh theih
tehka lungdam mahmah hi, mailam ah kathungetsak dan ding zong katheih
beh toto hi.
Mailam ah leitung gamtuamtuam a om Zomi te tungah Topa in:
1. Cidamna .
2.Khadamna
3.Daupaina
4.Lawhcinna
5.Khansauna leh gualzawhna thupha hongpiak nadingin kathu ngetsakna
hiden den hi.
Topa in hih laisim te tung ah Europe gam nopna leh thupha te hongtungsak tahen,
Lungdamna leh Lunggulhna tawh,
Rev.Pau Khan Khai
Southern Baptist Theological Seminary
Louisville,Kentucky
USA.
443 757 7816 (cell).
Comment piaknop aomleh...