2017 UK General Election kipanta ~ Nantalsuan

2017 UK General Election kipanta ~ Nantalsuan

A leimaitang in a neu hang, leitung zeelzo laiveve aa, leimong daaipam a kikoih gam pan Zosuan pawlkhat te in zong belhtaak a sak uh’ UK gam a hihziak in, 2017 UK General Election muak dih ni.

2016 UK Referendum ah mipi in European Union pan taikhiatding (BREXIT)’ a teelna hang in David Cameron pen PM pan tawlnga in Therasa May in PM mun a hong luahto hi. A nunung pen kiteelna pen 2015kum hi-a 2020kum ciang termbei panding hi mah leh, kuamah upmawhloh laitak PM Theresa May in UK General Election ding 2017 June 8 ni ci-in a hong taangko khia hi. Zingciang hong hi ta hi.

UK ah a mun zui in, political parties pawlkhat a om hang in, Party golpen nih a hi’ Conservative(Tory) leh Labour party te in, kumpi semden zaw a hihi. PM May in kiteelding a taangko hunlai-in, Conservative Party lo-ngal kumpi semzo ding a omlo aa, ki ngaihsunphial himah ta leh, tu’n kiteelkuan ciang in, thutuamtuam hong kibehlapna hang hi ding hiam?, Conservative leh Labour ki sikim phialphial in ki ummawh a hihi.

Bangthu teng om hiam?

2015 Kiteelna a ki-et kik ciang in, Labour te mun’ gamlukhunglam leh gamlaizang lam mun58 sung a om mipi te in, Brexit na teelmawk uh hi. A khua in a ki et ciang, Labour in vote 428 bek tawh Conservative te a zawhna Halifax khuate bang in, Brexit a na teel uh hi.

A dang ettehna khat leuleu, 2015 kiteel lai in, Conservative te’n Brexit deih ngiatlo Liberal Democrat te mun a laksakna khuate a hi Lewes leh Twickhenam te lelkik-khathei ding uh kici hi.

A tung aa bang thutampi biaibuai kawmkal ah ih theihsa bangin,thusia tuamtuam leh paukhialhna tuamtuam hang in, Conservative te’ maimial in lam-etna sang thaneemzaw mahmah ki ci hi.

A beisa in, Conservative pen mithupi, miliam, mihau te kipawlna in, kimu aa, tu-hun ciang in, mi nautaang lak pan zong Conservative a deih leh a panpih kitam mahmah ta leuleu a hihi. Tuadung zui in, mipi nasepnei lak pan 43% bang in Conservative vote sawm a hihi.

Labour pen nasemte kipawlna in kiciamteh a hizong, nasep hoihzawdeuhnei lak pan 24% leh na-hamzawdeuhsem lakpan 26% bek in thapia laita ki ci hi.

A taangpi in a kigen leuleu ciang bel, tuhun laitak a hih leh, milian zalian, biakna, nasemnei/lo nautaang cihbang (Class) kikhen nawnlo in khangham/khangno kum (Age) tawh kizui in vote kipia ki ci hi. Tuamah bang in khangno kumtawm lak ah Labour in 19points bang in makaih aa, Uham kumtam lakah Conservative in 49points bang in mataizaw ki ci hi.

Tua hi aa, vote pia ding in, kuabang te’ kuankhia cih in thugen ding ki ci a hihi. Kua in, UK kumpi hong sem hiam? June 8 ni result ngak dih ni. Nantal’suan (UK General Election 2017 muakna tawh) (Etkaak lakna: http://www.telegraph.co.uk/news/0/general-election-polls-latest-tracker-odds accessed on 07/06/2017)