Leitungbup numeite ni 2011
Zingciang March 8, 2011 pen Leitungbup Numeite Ni (International Women’s Day) hi leuleuta ahih manin numeite thu tawm gen ni. Numei cih i zak peuhmah leh mi tamzaw lungsim ah, “Oh! Numeite tua bang hi. Numei ahih leh tuabang hi uh, tua bangin om uh, tuabang hi, tuabang hikei, tua… tua…” cih om hamtang se hi. Ahi zongin tua banga ngaihsutna om khempeuh hikim khollo ahihna, a kimuhkhialhna thu pawlkhat gen ni.
1. Numei Sum Deihlua Den: Mi tamzaw ngaihsutna ah numei leh sum thu a kigen khak nak leh amau pen a huaiham diak, sum a deihlua diak, pasal sang a huaihamzaw diak banga ngaihsutna ompahpah hi. Tua pen hi khin tuanlo hi. Numeite in sum duhlua zawzen uh hi cih a kitehna om tuanlo hi. Pasal zong numei zah mah in sum deih uh a, numei mah bangin deih ngaungau veve uh hi. Ahi zongi pasal te in a deihna uh ki-ip theizaw deuh bek hilel a, a deihna zah uh numei tawh kikim veve hi. Sumzat nop asak dan uh zong numei leh pasal kikim hi. Numei in a sum zatna khempeuh uh gengen leh nuamsa a, pasal in gengen khollo bek in a zatnop zah uh, a zatnopzia uh kibang veve hi.
2. Sum Thu ah Lungkia Baih: Numeite sum thu ah patau baih, lungkia baih diak hi cih pen diklo hi. Sum a zon uh ciang a meet ding vive in ngaihsun uh a, a sup khak uh ciang lungkia pah demdam uh hi cih pen dik khinlo, maan khinlo hi, kici hi. Pasal zong a lungkia lua peuhmah hi a numei bek hipeuhmahlo hi. Numeite a sup uh ciang, a meetloh uh ciang a lung uh khamlua in mite kiangah lungkhamko, kilaak pah hi tuanlo hi. Amau mizia limlim ah thusia hi in thupha hitaleh pasalte sangin genkhia baihzaw, pulak manlangzaw uh ahih man bek hi a, sumbawlna ah sumzonna ah a sup man uh, a meetloh man uh bek hituanlo hi.
3. Numeite’n Sum Muhzia Ding Ngaihsun Siamlo: Numeite summet bawl siamlo, ahih kei leh sum muh pahpah dan ding ngaihsun siamlo zaw cih mipi ngaihsutna om pen dikkhinlo hi kici hi. Sum muh dan ding tuatkheh siamlo uh cih upna diklo kici hi. Tua banga mipi ngaihsutna om hangin numeite lungsim ah kimuanngamna kiamsak ahih man bek hi kici hi. Sum tuat, sum sim lamah numei zong pasal zah mah in kiva lua mahmah a, a siamneel taktakte bang pasal sangin kimuangzaw uh, khentatna manlangzaw, koih ah meetbawl ding cih ngaihsun manlangzaw uh hi kici hi. Tulai sum meetbawlna tamzaw pen investment ahih manin numeite in koi ah invest ding cih ngaihsun siamlua mahmah lel uh hi kici hi. Tua pen, nidang sangin numeite in koi ah summeet tam kingah, koi ah kingahlo cih thutheihna (investment information) a neih semsem man uh hi kici hi. Nidangin bel pasalte bek in sumbawl lam sai uh a, numeite pen inn nupi (house wife) in kikoih tamzaw ahih man hi.
[Leitungah ‘mawnlel’ tam semsemta cihna hilo dia… he he… ciamnuihna hisam e, tua bel]
4. Numeite in Summetbawl Cimtakpah Ding Hi: Numeite pen sum zat haat, sum zat manlang leh hangsan a kigen ahih manin a zon lam taktak ciang a lawp keei pong uh hangin a sawtna ciang cimtaakpah ding uh hi cih upna om hi; tua pen zong dikkhinlo hi kici hi. Sum a muh ciil uh nopsa ding, lawp ding uh, ahih hang a sawtpi ading taktak ciang utlo in cimtaak ding uh, a zat lam mah nuamsa zaw ding cih ngaihsutna om pen hituanlo hi. Pasalte zong numeite mah bangin sumzon nuam a sa hi a, a zat zong nuam a sa hizaw uh hi. Numei leh pasal a kibatlohna taktakzaw bel numei in ‘meet ding hi’ cih a tel mahmah masiah summeet dingin sem ngamlo a, pasal te in bel ‘meet ding hi, meetlo ding hi’ cih zong tel mahmah takei leh hihsukgawp nuam zel hi kici hi. Tua sungah numei pen a dawilokzaw tawh kibanga, a taktak in a pilvangzaw uh na hi gige hi!
Leitungbup Numeite Ni hong tung ahih manin Zomi numei khempeuh tungah itna leh phawkna, leh kalsangzaw suan ciat dinga deihsakna kong khak hi.
Happy International Women’s Day!
Hau Za Cin
Phuitong Liim
Comment piaknop aomleh...