Zomi in bangciang huam hiam? ~ DK Khup

Zomi in bangciang huam hiam? ~ DK Khup

1. Zomi in bangciang huam hiam?

“Huam” cih kammal pen nuntakna neilo te genna-a i zat ciang ( Gtn. Gam-gi) kiciantak in ki gen thei zaw hi. Nuntakna nei-te i gen ciang kituahna, gampeemna cih bang-a a hunhun in a om theih man gencian dan hamsa thei hi. Tu hun teh mun tuamtuam, gam tuamtuam ah Zomi akici-te om, teng uh a hih ciang leitungbup huam ci leng dikpen kha ding hi.

2. Chin, Ku-ki cihte Zomi mah ahi hiam?

Minam vai ah, kua minam na hiam? Na minam min at in cih bang in mimal tungah dotna kinei zaw in thei ingh. Kei leh kei Zomi ki-ci ingh. “Chin, Ku-ki cih-te” na cih mite tungah Zomi na hi uh hiam? ci-a na dot ding hi zaw lo hiam? Na midot khial le teh kilawm ei.

3. Zomi, Chin, Kuki cihte aki bang hiam?

Bang lam in maw? Amal gawm nong dot hi lo ding ci leng, kateldan in hong dawng kik leng. Amasa in, Zomi, Chin, Kuki cih tawh kisai a kinial lo, kithukim khitna thukhat tek hong gen leng. Chin, Kuki hi ung ci-a amau leh amau a kiciamteh masa om lo a, minam dang te hong lawhna, hong sapna, hong ciaptehna hi a ci tek leh Zomi ki cihna siksan ding in gam thu akan masa Mikang te Sir Henry Yule(1508), Father Vincentius Sangermano (1783), Col T.H. Lewin (1871), Dr. Francis Buchanan (1835), Bertram S.Carey, H.N. Tuck cih bangte laigelhna siiksan, bulkip kician aom na cih thu hi.

Hih mikang te in tu hun aa minam vai a gelh pawlkhat banglo, guptuam, paihtuam, deihkaihna ding thu om lo a, a kigen, a kipulaak bangbang in a at uh ahih ding pelmawh hi. Tu hun in hih mikang-te’ laigelh-te online ah free in ki sim thei hi.

Tua ban-ah, hi thu ah mi nam nih ki om a, minam dang te hong lawhna, hong sapna, hong ciaptehna “Chin, Kuki” cih thei na pi, a pu, apa uh amau leh amau ki cihna ahi “Zomi” ki cih ding a gamlo, ameidawi a Chin kicihna a nial gam nai lo lai pawl khat leh a pu, apa uh amau leh amau ki cihna ahi “Zomi” cih hangsan tak in a len a, minam dangte lawhna, ciaptehna a nial gam, a deihlogam pawl khat ki om hi.

Nong dotna hong tom dawng leng, Zomi cih pen koh leh koh kicihna hi a, Chin, Kuki cih pen minam dang te hong sapna a hihna tungtawn in Zomi, Kuki leh Chin kibang ki ci thei lo hi. Mimal muhna pan, Pa Do Khan Khup