Amanpha Nu ~ Jam Daniel

Amanpha Nu ~ Jam Daniel

Nute khempeuh Topa’n thupha hongpia hen! Nute pen Pasian tawh kaal ah athupi mahmah panmun anei nute nahi uhi. Pasian in leitung vantung abawl khit takteh mihing ganhing zong nabawl hi. Ganhing khempeuh bawlin hoihsa hi. Bukim sa hi. Ahi zongin mihing a bawl khit hangin bukim sa theilo a akisam khat omlai bangin ngaihsun hi. Mipa (Adam) bek amuh ciangin bukim salo hi. Tuahangin Pasian in numei pen bawl dingin atuam vilvel in alungtang ah ngaihsutna nei hi.

Numei abawl nadingin pasal ihmu sak a tua sungin pasal nakguh khat pen numei in bawl hi. Tua ahih manin numei khempeuh pen pasalte nakguh nahi uhi. Tua nakguh loin leitungah bangmah kisem theilo hizen hi. Nasepna khat peuhpeuh numei kihel loin piang thei hetlo himawk hi. Ansai kihong le numei (waitress) loin pianglo hi. Zum nasem ding kizong le numei loin pianglo zel hi. Pawlpi sung makai ding kitel leh numei loin pianglo zel hi. Lengla do dingin zong numei mah omleh picing suah zaw se hi.

Tua ahih manin numeite nangloin leitungah bucinna omtheilo ahih man in mi thupi mi manpha mahmahte na hi uhi. Tua hi a amanpha mahmah nute numeite na hih manun kong phawksak nop thu om hi. Gentehna in suangmanpha pen manpha mahmah hi. Ahi zongin amanpha mahmah tua suangmanpha in ama manphatna zui-in akizat theih ding thupi mahmah hi. Paunak 31:10 “Zi hoih pen suangmanpha sangin manpha zaw pek a..” ci hi.

Amanpha mahmah suangmanpha sangin a manpha zaw khat om a tua in numei-zihoih ahihi. Tua ahih manin numei hihna nong zat siam nak uhleh leitung a bucing sak Nute/Numeite na hi uhi. Amanpha mahmah Pasian hong bawlna I muhkhiat theih nadingin anuai a thute kiphawksak nuam hang.

1. Nute mun masa pen in inn sung ahihi.

Nupi khat in ama inn sung sangin a vengte inn sung nuam hongsak mawkleh innkuan sung cidam huai hetlo hi. Bang bang inn sungah na om ahi zongin nangma inn sung mah nuamsa in. Na inn sungah teek tang in. Hoihna le siatna namkim hong kipat khiatna masa pen inn sung ahihi. Nute vakvaka tate bek inn ah na nusiat khakleh na manphatna tawm mahmah ding ahihi.

Banghang hiam cihleh:

(a) Inn sung pen kimakaih masakna mun hi. Thugenpa khat in ‘nute pen inn sung ah sangsia masa pente hi’ ci hi. Sangsia asem khatpen naupangte nuntak nading maban lamlakte ahihi. Nute pen innkuan sung lamlak dingte ahihi. Zingciang na tate pai nadingah bangci om ding lamlahna na nei hiam? Mi lakah a ut bangin aomleh nangma mawhpuak ahihi.

Inn sung nute in sangsia (makai) himawk na hih manun kiginkholhna tawh nasep kul ahihi. Zingsang thawh hun dinga na thawh kei leh na mai zum ding hi. Inn hah manloin na vakkhiat pah leh mizahtak huai khat hong hawh le namai zum ding hi. Na tate anneek hun dingin na neeksak kei a, sang kahna hun nalapsak zawh keileh mite mai ah na manphatna hong tawm mahmah ding ahihi.

(b) Inn sung pen kivaakna mun hi. Inn sungah pongman na omnakleh na tate gilkial hun na thei ding hi. A vaak-hat nupi nahih lebel nang nagil avahnakleh na innkuanpihte zong a gilvah ding mah in na ngaihsun khading hi. Tua bang hun sungin na tate gilkial in na om ding uh a, zingciang neek dinga na koih na khatpeuh na ne sim thei ding uhi. Hun maan a an nekloh pen simtatna tawh kizom a guktakna tawh khangto hi. Na tate na gilvah sak hiam?

An ne a thahatna pen a tuam hi a, thu ne a thahatna pen a tuam khat mah ahihi. Gilkialna sangin thu le la ah gilvahlo te hehpih huai zaw hi. Na inn sung pan in na tate a kipan na pasal vaikuan nasepna ah, na tate sangkahna ah sun tawntung alawm agual mai ah lungtai takin a om theih nadingin Nute tavuan ahihi. Thulimci na muam hiam? Na lungtai sak hiam? Hithei hileh inn kong dong kha hamtang lecin lungkim huai hi. Tua in sun tawntung tha guan hi. Na innkuan pihte an leh thu tawh na vaak kham hiam?

(c) Inn sung pen kimuhkhiatna mun hi. Kimuhkhiatna cih ciangin leitung nuntak nading maban cihna ahihi. Leitung a mipil ulian tampi takte ii thugenna I ngaihtakteh tuaciang dinmun a tunna uh pen inn sung pan nakipan ahi uhi. Inn sung pan in amasuan nuntak nading uh na mukhia uhi. Tua ahih manin tate maban ding pen kum 5 a phak ciang hipan lo hi, tan 10 a tunciang hipan lo hi. Tumah mah hun a kipat ding ahihi. Inn sung pan koici bangmi hiding cih kipatkhiatna mun ahih manin Nute tavuan mah hizel hi.

Inn sung pan in Nute in tate ii maban ding galmuh khiatsak theih ding thupi mahmah hi. Apai nading uh lampi na muhkhiatsak theihkei lebel pum paiding uh a pum nuntak ding uhi. Tui luan nading tuilam na bawlnakleh na bawlna munmun ah hong luang ding ahihi. Na tate kibangci muh ding cih na ut bangin lampi na bawlsak thei hi. Tua in Nute ii tavuan ahihi. Tate’n lampi maan tawn le Nute’ manphatna kilangh ding ahihi.

Nuten innsung ah sep ding bangin nasem aa om ding bangin nong omciatnak uhleh inn sung ah bangteng om a bang teng kisem cih na tel ding hi. Na inn sunga van koihna teng na tel hiam? Koi mun ah bangom cih na tel ding ahihi. Innkuan ten bangsem a koimun ah kua in bangsem uh hiam cih na tel ding ahihi.

2. Nute mun pen leitung bup ahihi. Leitung bup ii 50% pen numei ci hi. Nasepna lamsangah sehli suah sehthum (3/4) pen numeite sep hi ci hi. Leitung bup khasum khem peuh sehsawm suah sehkhat (1/10) bek ngah uhi ci hi. A leitang mahmah zong sehza suah sehkhat (1/100) bek ngah uh ci lailai hi. Leitung nopsak theih nading le akhantoh theih nading asem pen numeite ahih hang’, ngah nading ah a tawm ngah pente hi ci hi. Banghang hiam cihleh numeite in ngahnopna lungsim bek tawh nasem lo uh a, kasep ding ka tavuan hi cih atheihsiam man uh hi ci hi.

Tua ahih manin Nute in leitung sum le paii te sangin ITNA bek mah lunggulh pen uhi. Suaikhi suangmanphate sangin ITNA mah deihzaw uhi.

3. Nute mun pen biakinn ahihi. Jesuh singlamteh pua in Golgotha zuan in Rom galkapten a paipih takteh anungzuite kuaman zui ngamlo uhi. Tua bang lauhuai dipkuat hun laitakin Golgotha mual dong anazui-ngam pen nupite ahihi. Jesuh akivui khitteh dai hawh dinga apai masa pente zong nupite mah ahihi. Jesuh thozo ci-a ataangko masa pen zong numeite mah ahihi.

Tuni nupite in zong Jesuh mah azui tintente ihih zawh ding thupi mahmah ahihi. Pasalte vaikuan nasep kalin, tate sangkah kal in na om nading mun thupi pen in biakinn sang athupi-zaw mun dang omlo hi. Biakinn mah zuan tangtang in. Biakinn sang’ mun dang nuam nasak zawk leh zingciang noploh nasakna mun hong tunpih thei hi. Lawphuai pah takeileh biakinn zuan a napai tantan na in na mit tawh na muh theihloh Jesuh nung a zui higige nahih manin a sawt loin thawhkik ni hong tung ding ahihi. Tua ni ciangin ‘Jesuh han pan thokikzo hi’ ci’n lungdamna thupha sangin tecii napang ding hi.

Na om nading mun ah na om hiam? Na om nading mun ah na omleh gen ding a kilawm thu mah na gen pah ding hi.

Na innkuan sungah amanpha nu hi in. Na pawlpi sungah amanpha nu hi in. Na nasepna mun ah amanpha nu hi in. Na veng na paam ah amanpha nu hi in.

Amanpha mahmah NU ahi dingin Topa’n thupha hongpia hen!

Phawksaknop Thu Nih

1. Puan silh:

Nang tawh kituak teel siam in: Puankhuite’n zong na mawk khuilo uhi. A kum tawh kituak ding, agawng athau tawh kituak dingin size tuamtuam color tuamtuam na bawl uhi. Nupi na hihkhit zenzen hangin om niaa-nua ding hilo hi. Sai na paitak teh na silh ding puan ahi zongin niik ahi zongin nateel siam ding thupi mahmah hi. Nang size leh color tawh kituak ding teelsiam ding zong thupi mahmah hi. Athupi pen khat in a color zong phamawh masa kei: Nupi kum 30, 40, 50 bang hikhin in nungakno kum 15, kum 20 gualte puanbawk style nam khat dan nong silh uh ciangin omgiapguap na hih manin hong mu khate adingin aanahuai mahmah a omdan nuamsaklo hi. Na hoih nopna, na style nopna pen thupi hi. Ahi zongin nang kum tawh kituak ding teel siam in.

2. Pheituam tom/sau:

Tuhun ciangin numei pasal kilamdanna omlualoin pheituamsau/tom kiteng ciat hi. Nupite in pheituam sau ahi zongin atom ahi zongin nong ten uh ciang asungten akhap kilangh zo ciang donga apa (thin) tenloh ding hoih hi. Atom naten uh ciangin zong atomlua liang pen etlawm peuhmahlo hi. Nangkia, no innkuan kia om a naten pen phamawh kei. Ahi zongin lengla neih hun ahi zongin, biakinn paina cihte a kipan midang tawh kikholhna ah a kilawm akhuhkim mah zat ding thupi pen hi.

Mi minthangte silhdan na-een mawk lehbel amau tawh na mel kibanglo, na size uh kibanglo, na duang uh kibanglo ahih manin amau tung a kilawm mahmah pen nang tungah na ban teh a tuampi khat hi thei hi. Tua ahih manin I gennop thupi pen in nupi nahih zenzen hang puan kilawm mah silh in. Pheituam teng nahih leh akilawm ciang mah akhuhte teng in. Atom letlat khawng teng kei zaw in. Leitung thu tawh mi minthangte’ vanzat dan I et mah bangin biakna lam mi minthangte vanzat dante zong en in zui zaw leng etlawm zaw hi. Jam Daniel