Etlawm Mual Kuam Len Nupa ~ Dr. Dongno

Etlawm Mual Kuam Len Nupa ~ Dr. Dongno

A hoih ih Zogam: Ih Zo gam sung ah amaa thu aa apiang Pasian ong piak mun hoih gam hoih om kawikawi napi, ih gam ki zawng lai-in khangto nai lo ihih manin kipuah, kikem cing zo nai lo hi. Hih mun leh gamte ih hih theih zahin ih puah ihkepcing ding leh midangte theih dingin ihthansak ding thupi hi. Mipil leh akhangto gam haute-in tua bang munte hoihtakin kem uh aa, ava en mi tampite kiang panin sum ngahin kivaakna nasep lianpi suah uh hi.

Mual kuipi, keen sangpi, tuizeu, tui li, kua-hawmpi, cih bang munte, nuamtakin mi tampi-in ong et theih dingin bawl leng hoih ding hi. Amau pian ngei ciat bang, ahi bangbangin koihin, susia lo aa, akiim-apam ah sing phuk lo, lo kho lo, gam hal lo, sa beng lo in ih kemcing ding hi. Ganhing vasate lauthawng sak, patau sak lo-in lungmuang takin agamtat nading uh leh abuk akhawl, a bu bawl nang uh, singkung lopate ih susia kei ding hi.

Len Nupa Omna Mun

Ailam kici mualpi dawn, Kaptel khuakhung tai thum agamlatna mual dawn nih kituah hilhelna, mualkuam zaang khat hi aa, Kaptel gam kumpi waing ( Reserved forest ) huam sung ah om hi. (Tedim Land Records zum ah kumpite ciaptehna gamlim om hi ). 20.03.1992 ni-in pa Pau Za Khan panpihna hangin mualsuang khat thungetna tawh kiphut hi Hih a lamdang, mun hoih thu, limtakin athei nai lo mi tampi ki om lai hi. Tedim khuapi panin tai sawmnih bek gamla aa, lampi nuam ahih manin hun nuam zangh dingin Len Nupa ah ki pai thei ta hi.

Len Nupa thu Ciaptehna

Falam gam Hualngo gam leh Mizo gam dong aa minthang, LenNupa thu en ih theih loh ding pamaih lua sa ka hih manin, Jan 3, 2010 ni-in Kaptel khua AG sia Rev. Song Sian Pau kiang ah “ Len Nupa tangthu laibu khat ong bawl in; azaknop huai thu lamdang tampite ciapteh huai banah, a thei nai lo mi tampite theih sak ding thupi hi. “ ci-in ka cial hi. Tua ni mahin Hausa pa Do Za Tuang kiang ah,”Len Nupa pai nading mawtaw lampi na zong un la, Len Nupa akiim-apaam ah sing phuk lo, lokho loin gam hal loin sa zong nabeng sak kei-in, kumpi kyu-waing, ngaat takin na kem un “ci-in ka ngaihsutna ka kikuppih hi.

2011 kum sung mahin Teltui Zingsol ( Vol. 2 ) sung ah azaknop huai Len Nupa thute cing takin ong hawm khia pah uh aa, tu-in tua laibu siksan kawm in magazine sungah kong at hi. Kaptel pan Len Nupa lampi zong tu kum March kha sung in azai zawin lam tawh kipan khin ta uh aa, tai nih val tun khin zo uh hi.

Etlawm mualkuam Len Nupa

Ka neulai-un Len Nupa thu akigen ka za ngei uh aa, “ Hoih lua ahih manin tua lai va tung leng kiciah kik nuam lo phial hi ” ong ki cih tudong ka mangngilh thei kei hi. Len Nupa ah apiang thu lamdang tuamtuamte hangin, ‘ Si-khate khua ‘ hi ding hi, ci-in taanglai-in ki –umin, kilipkhap mahmah hi. Falam gam, Hualngo gam leh Mizo gam ciang dongin aminthang mahmah, alamdang mun khat a hi hi. Falam gam ah khanglui mite-in ‘gamsa-te apianna mun leh a-uk, acing, angakte omna mun’ ci-in um uh ahih manin gamsa ngen dingin ong pai thei zel uh hi.

Mizo gam panin Len Nupa ahoihna en dingin akum akumin mi tampi ong pai uh aa, hun nuam ong zaang zeel uh hi. Mangkangte-in zong amun agam om lopi, ngaihsut-tawmna tawh azaknophuai dingin abawltawm uh, fairyland, ci-in dawi gam dan tangthu tuamtuam nei uh hi. Ei Zomite-in amun, agam ngiat in, tuni-dongin ih muh theih, ih et theih ding ‘ Si-khate khua ‘ kici, thu lamdang tuamtuam apianna, Len Nupa nei ihih manin, ih hampha hi.

Len Nupa, acre10 val ding zai-in, tuipi mai pan pi 7,256 asanna ah om hi. Mual sang dawn ah om ahih manin, huih vot siangtho nung hiauhiau den aa, len paak leh lopate huang ngeelngeel hi. January pan May kha sung teng lenpak asan, adum, pak zihziah aa, akiim- apaam ah gam Maang tulakin umcih in, van dum tawh ih etden ciangin etlawm mahmah in lungzuan huai hi. Tua lai mun zaang ah kawi-kithuk ngiiu-ngeeu in tui luang khat om hi. Tungtun lianpi bangin mualbo om litlet kawikawi aa tua mualbote ah lothang peek mihing khut tawh kisuan lo, agualgualin po hi.

Nidang lai-in kawltu zong po ngei aa, tuhun ciangin bei ta hi. Nahlun kici sing kung namkhat zong po aa a gammangte bekin mu thei uh hi, ci-in kigen hi. Akiim-apaam ah vasate khuang liingliingin ong lungnuam sak hi. Sun kamh gamdaih hun ciangin gamsate’n tui ne dingin ong pai khiankhian uh aa zan ciangin sapite ong pai thei uh hi. Innka dol pek kidawh bangin suang aziing aziingin azaangtaam khat om aa “ Suang innka “ ki ci hi. Tua suang innkaa adung pi 10 sau in, a vai pi 15 zai hi. Len Nupa panin India gam Aizawl khuapi leh adang khua tampi zong ki gal muh ci-i-cia-i thei hi.

A kigen thu lamdangte

Tang lai-in azaangtam aa tui luang a naak lam ah, mi alua bangin a-awk kum simin thum vei ta bang kiza thei zel ahih manin, khanglui mite-in ’ Lua Zang ‘ ci-in min na pia masa uhhi. A phual ah, “ Len Nupa“ ahih kei leh, ” Luazang kici- ngam lo aa ”Hausapi “ , ahih kei leh,” Ih pute Khua,” kici ngam bek hi. Suang Innka zong ‘ Hausapi Innka’ kici aa tua hi kei leh kigam -mang thei hi. Len Nupa pen ‘Si-khate Khawlmun ‘ zong ki ci hi. Khanglui mi te in, mi asih ding uh ciang in a mang sung uh ah kilangh kholin, “ A kha uh Len Nupa ah kikha tektek ung “ ci-in Mualpi khua aa ateng khangluite-in gen uh hi.

Nidang lai-in Khuado ciangin, misite kha in ong siim uh aa, zankim lai-in ong tungin zu ne, sa ne in omin zingsang phalvak kuanin Len Nupa lam ciah to uh hi ci-in, maangmu thei mite-in gen uh hi. Vankah mi pawl khatte-in Len Nupa ah, lungmuan tui, zuan loh tuidam luang aa, misite kha Luazang atun uh ciangin gam ngakte’n tua tui na tulh uh ahih manin, a- inn lam uh phawk sak nawn lo uh hi, ci uh hi.

Khat vei lai-in Kaptel khua pu Phawng Gin,a Bungzaang lo ah giak aa zan ciangin Len Nupa gei, Pangding mual dawn ah naupang hon khat in hi bangin la sa uh hi. “ Lawm aw na nu na ngaih aa leh lungmuan tuidam ong dawn aw,.Nu lah ngai keng ee, pa lah ngai keng, huan khang kawltu ka teep na’n ka ha san singseng “. ci-in la asak uh ciantakin za hi. Sabengte khat veivei gammang thei uh aa, zan ciangin Len Nupa ah khuang leh zam ki tum zan thapai in za uh hi.

Khatvei sabeng pawl khat Len Nupa kiim ah giahbuk sat in om uh hi. Khat pa awnghawh dingin pai hi. A lawm te’n” Ki dawm awo, gammang kha ni ciai” a cih leh “ Gammang cih bang om lo ee” ci vial hi. Ong ciah ciangin giahbuk kim teng kiimvel kawikawi in apaina ding thei lo hi. A lawmte’n buk sung panin en gige uh aa asawt ciangin , ‘ Ong ciahin, hih lai ah ‘, a cih uh ciangin thakhatin a mit kihongin ciah thei pan hi. A gen nop loh hangin amit humsakin akai kawikawi khat om hi ding hi. Khatvei leuleu Len Nupa ah mi nih sabengin giak uh hi. Mi pau za uh aa azon pah uh hangin kuamah amuh loh uh ciangin abil uh lei ah phah in angaih uh leh lei sungah apau za uh hi. Tua pen ‘ Lei pau ’ ki ci hi.

Ni khat, sabengte-in tui luanna akawi ngiiungeeu a ki mat kik dekdekna alei sawn khia-in a tui kigawm sak uh hi. Mun dang apai kal un angeina bangin na om kik aa lamdang sa uh hi. Susia zel uh aa na kibawl kik zelzel hi. 1962 kumin Thuklai khua, Sia Mang Thawng, a sangnaupangte tawh Len Nupa en dingin pai uh hi. Len Nupa gei ah ‘ buah, mengkeng ’ thau tawh kapin a uum-uum uh hangin man lo uh hi. Tua zan a mang sung uah numei no khatin “ Ka akte uh nong kap sak uh ka pa heh mahmah ahi maw ! Man le uh cin ka pa’n ong dawm lo ding hi, ong kap sak nawn kei un “ ci-in gen hi.

BUANNEL pan LEN NUPA

Pu Thuam Thawngin Saizang khuapi panin Kaptel khua, kum 1867 kumin sat hi. Tual gal om lai hun ahih ciangin gal dal dingin Suangzang khua leh Tuitawh khuate naphut hi. Galvilnate zong kumsimin thumvei ta a-encik dingin pu Kai Tuah, Galthukan Mangpi in koih hi. Ni khat pu Kai Tuah galvilin apai leh mual dawn zaang mun nopci mahmah khat mu aa, tua lai ah khua sat ding ngaihsun hi. Ni khat gam vel pha dingin upate tawh vapai kik uh aa, khua ong mui ciangin naupang lasa, mi pau leh khuang leh zam ging ngeei-ngaai azak uh ciangin, khua sat ding khawl kik uh hi.Tua kuam zaang ah apai uh ciangin buan nel dikdek khuk ciangciang pha ahih manin, pu Kai Tuahin tua lai mun, ‘ Buannel ‘ ci-in min phuak hi.

Ni khat pu Kai Tuah galvil dingin tua lai ah va pai kik aa, mihing khekhap athak mu in a tui luang zong nin lai hi. Suulzuih pah a, pasal thatang hoih khat tui luanna gei ah sunsiah ne amuh ciangin pummat hi. “ Nang! ka gam ka khua Kaptel ong sim nuam aa ong ensim hi teh, kong man ding hi “ a cih ciangin, tua mipa-in, “ Kei Bocung mi ka hi aa, ko hih lai, Len Nupa ka ci uh hi. Gamsate pianna mun hi kaci uh aa, gamsate a uk leh hih mun angak, Tonu, Lalnu, Chawng Tin Leri kiang ah gamsa angen dingin ong pai ka hihi; pute aw, ong man kei tapeuh un “ ci-in thum hi.

Pu Kai Tuah in zong limtak ngaihsun pha kik aa, “ Ih kimat, ih kithah hangin phattuamna om lo ahih ciangin lawmta, zawlta-in kiman ni “ ci-in akip sak nadingun akituahna uh mun min lawhna ki khek dingin thukimna bawl uh hi. Falam, Mizote leh Hualngote’n tua lai mun, ‘‘Len Nupa” acih min pen “ Buannel” min tawh kikhek uh aa, tua ni aa kipanin, Len Nupa kici hi. ‘ Mual Nupa’ cihna hi-in alang tuak aa mual khat anu, khat apa ci-in kiciamteh hi.

Hih thu ih et ciangin tua hun pen galmat, samat kidem hun lai hi aa, pu Kai Tuahin Galthukan Mangpi ahih mah bangin a ut bangin bawl theih nang thu nei hi. Tua pa manin, thatin gal-ai leh gualtung tuangin minthang ding hi. Ahih hangin mawhna om lopi mihing kipummat, kithah cihte thu hoih hi lo, haivai thu leh mihing ngaihsut dingin dik sa lo, pha sa lo-in khat leh khat ki it ding thupi sa zaw hi. Mi thahna in a-it a zi a tate, a nu a pate leh a sanggamte dahna, khasiatna leh thangpaihna apiang sak thu hi lelin, thu pha hi lo, thu sia hi cih na mu thei khin hi.

Tua ahih manin Pu Kai Tuah’ mi hehpih theihna le, tua hun lai adingin amuhna saupi a madawk kholhna kilang hi. Gal leh sa aa ki la thei ding kimlai lawmta zawlta in kimanin ki-itna apiang sak ciaptehna kip “ Len Nupa” in pu Kai Tuah pilna leh ngaihsut siamna kilang sak hi. Hih bang amadawk ngaihsutna picing, mihing thuneihna, ‘ human right ‘ athupitna Zomite lak ah aphawk masa pen leh azang masapenpen, pu Kai Tuah a hi hi.

Pu Kai Tuahin hih a hoih, a-etlawm Len Nupa min ama ong phuah sak suak ahih manin Len Nupa min ih lawh simin, khat leh khat ki-it ding, ki lawmta ding aa, mihing thuneihna ih thupi sak ding ong vaikhak ahih lam ih phawk ciat ding thupi hi. Amaute-in zong tua kiciamna tuni dong mah na kemcing lai uh ahih manin, Hualngote’n “Buannel Ramdai Cawngtin Leritual henna” kici Buannel minlian tamh sakin laibu bawl uh aa la zong phuakin sasa uhhi. Ahih hangin,‘Buannel’ akhiatna leh apianna thu tu khanglaite-in thei kim nawn lo uh hi, ci-in Tui Trih khua kum za cinna jubilee magazine laibu sung ah ciamteh uh hi. Mizo gam ah zong kumpi sangte ah ‘ Buannel Ramdai “ cih thu ki sinsak hi. Falamte in zong ‘ Buannel Arsi ‘ ci-in magazine laibu tampi hawmkhia uhhi.

Len Nupa pai nang lampi

Kaptel panin Len Nupa pai nang lampi sawtpi pekin taangpi tha tawh bawl ngei uh aa, 2008 kumin UNICEF uliante’n zong tawn ngei uh hi. Tu kum 2012 March kha sungin tua lampi pi 4-6 azai, motor cycle nuamtak aa apai theihna dingin hausapa pa Do Za Tuang’ makaihna tawh kipan leuleu aa, hih lai aki at laitak in, Kaptel pan tai nih ciang to khin uh hi. Zogam Rural Develpment Committee ( ZRDC ) in pa Vum Nang makaihna tawh huhna sum saang nga( Ks 500,000 ) tawh panpih aa, lungdamhuai in kithalawp mahmah hi. Mai lam ah kuamahciatin ih hih theih bangin, ih gam ahoih nading huhna ong kinget ciangin hanciamin tha ih piak ciat ding kilawm hi.

Len Nupa ah napai nop leh

Tedim-Kaptel-LenTang mawtaw lamlianpi pi 12 azai-in tu kum, 2012 sung aa zawh dingin kipuahpha hi. Kawl zaang pan leh Tedim pan apai nuamtein, Tedim–Kaptel–Len Nupa lampi nuamtakin kipai thei hi. Saklam, India gam panin, Laitui-Kaptel-Len Nupa hi ding aa, India gampanin, Mizo gam leh Lamka panin zong kipai thei hi. Khanglam, Falam Haka lam panin Munluah lam tawnin zong kipai thei hi.

Nidang pek aa kipan Mizo gam panin, hibang aa aminthang Len Nupa’ hoihna en ding bekbek in gamlapi khe tawh ong pai uh aa, en thupi ngaihsut lo-in, tu hun dong ih koih mawk pen eima kicinlahna ahi hi. Tua ahih ciangin, aneituam om lo, Zomite’ gamluah, ‘ Etlawm mualkuam LEN NUPA’ limtak keemcingin, ahoihna en ding leh hun nuam zangh khawm dingin Len Nupa ah va pai ni.

Lunglen Kawlpi, Inn Buk mual, Thahpuang Pawn leh a kimu mengmeng lo ( a om takpi ahih leh) Thuam Tuili-te zong ih nei hi. Zalui tung,Ngennung lam ah bak kua hawmpi khat om aa, Thangzang khuataw ah zong Meitei gal lai-in a galkap mangpa kikap lupna, Suangsuang zong a ciapteh huai mun khat a hihi. Tangthu aa kigen Thawm tangvalte, meei pek kidemna mun, Sialkong kan, zong ciamteh huai hi. Hihte thu a theite-in ong gen le uhcin kiza nuam hi. Dr James Suan Za Dong (Sydney, Australia)