Eiffel Tower pen $21.4 Million bei in Bulletproof Glass tawh dai kikaiding

Eiffel Tower pen $21.4 Million bei in Bulletproof Glass tawh dai kikaiding

France gam Paris khuapi ii ciaptehna Symbol khat ahi Eiffel Tower pen thautang in apailetzolo Bulletproof Glass tawh Pi 8 val (2.5 metres) asangin daikaiding, umcipding cih AFP pan kiza hi. Hihpen migilo te bawlsiatsawmna panin kidaltheih nading in aki vaihawm hi cihzong Thursday ni in City Hall thunei te’n genkhia uhhi.

Tuabang in Bulletproof Glass kici maan tawh daikaih nading, umcip nadingin sum US$21.4 Million bang beiding ciliang uhhi. Tuapen leilu leh leitaw (Northern & Southern) lambek hipanlai a, tukumbeikuan lamin zawhsawm uh cih City Hall te’n Statement sungah genkhia uhhi.

Nitumna leh nisuahna (Western & Eastern) lamkiu tepen France gamsung ah abeisa Euro 2016 Football Tournament aomlai in 324 Meter sangin dai akaihsa uh hi a, tuate zong laihding uh cihi.

Ihpu ihpa te’n Piancit gam acihcih France gam ii khuapi minthang ahi Paris pen migilo te’n suksiatding limgeel mahmah uh cihi. France Deputy Mayor Jean-Francois Martins kicipa in Press Conference ah agenkhiatna ah Paris khuapi pen Terror Threat tammahmah a, adiakdiak in Eiffel Tower pen mitsuan in kinei phadiak cihi. Tua ahih manin Security khauhsaksawm mahmah uhhi.

Hih Eiffel Tower pen kumsim in gamdangmi Visitors 6 Million valbang in ahawhdetna munminthang khat hi a, Bulletproof Glass Wall tawh kidalcip hileh lungmuanna tampi piatuamding cihi.

Tuaban ah tulaitak aki umcipna dai kikai sangin Glass tawh hileh pailet in kimu theiding ahih manin khualzinmi te ading inzong etdan nuamzawding kici hi.

2015 January pan 2016 July khasung kikal in France gamsung ah migilo Jihadist te’n mi 238 bang bawlsia uhhi. Tuabang in ngongtatna aomna munte pen French Tourist Sites, Transport Hubs leh Places of Worship omna munte hiphadiak cih kiza hi. ZD Sawltak #zomidaily