Tuma kum tampi hunlai in, Zomi te’n ngimna tupna ih neih theih nading in Zomi mipil misiam tampi te’n kikup khopna leh kimuhkhopna tamveipi ih nei a, tu in ih kiciamnate ih tangtun sak theih nading ahun hong tung hi ta hi.
Kawlgam in Democracy taktak ih ngah ni mah in, midang namdangte a ihmu phial uh zongin, Zomi te ihmu lo a nuntakna maan leh suahtakna maan taktak tawh ih kipat hun hi ta hi. Zomite tangthu sungah a kiciing ngei nai lo, tangthu thak sungah ih luut a, nuntakna lui pan nuntakna thak sungah a luut ih hihi. Tua hunthak pen Zogam leh Zomi te khantoh nading leh nuntak nopsak zawk nading in kipumpiak a nasep hun hi a, eibek hi lo mihing a kici kiimlehpaam a ei liim hong beel mi khempeuh nuntak nopsak nading lunggulhna tawh nasep hun hong tung ta hi.
Kum tampi sung Zogam tunnu in a ngimna leh a ngaihsutna tuamtuamte tangtun zo lo, lungneu thaneem in a kha kunkun hang, Zota te’n Zogam tunnu aw neem za a, a minsialna kammalte ciamteh in tha ih saan ciang Pasian in hong khihcip siikkhauhual te hong vat tat sak a guallelhna kahlei niampen panin gualzawhna kahlei a sangzaw lamah hong kahtosak in hong dom toto ta hi. Zomi te’n kaamsiatna khempeuh nusia in siiksan in nei a gualzawhna kahlei tung a siik kha ih hi ta hi.
Tuni ih gualzawhna te Zogam khuapi mun tuamtuamte ah ih lawm hi. Lungdam huai mah hi. Ahizongin hih bek tawh gualzawhna sangpen kahlei atung ih hi nai kei a, hunhoih hunlem gam leh minam ading nasep theih na kahleii kal khat a suanto zo pan ih hih lam ih phawk ding kisam hi. Gualzawhna lianzaw, a tangzai zaw lawhcinna, a nasia zaw matut gualzawhna ih ngah theih nading in, hunlehni, kumlehnai, minute leh setcan te’n hong ngakngak lai hi cih ih phawk den ding kisam hi. Democracy taktak ih ngakma in, nisa khasa nuaiah nuntakna ding zongin haksakna tampi ih thuak khin ta a, tuate hangin nunglam nuntakna te ih nung hei kik ciang na sa in ih kapkap zo lai hi. Tua lungtang natna te tuni ciang dongin ih puapua lai hi. Ban bang ahizongin a beisa hunte a beisa hi a, mailam kalsuanna dingte ah Pasian leh gamlehlei makai te’n ih gam leh ih mipi nuntakna a hoih a phazaw in hong kikhelsakna ding uh amau tungah ih mailam nuntakna khempeuh a nga ih hihi.
Suahtakna leh minneih zaneih, vangneihna in a langlam ah tavuan tampi nei hi cih ih phawk ciat ding kisam hi. Ih mailam nuntak kalsuan nading pen paak bekbek a kiphah lampi hong hi het lo ding a, ih gentheih ih haksat laiin ih kiciamna thulehla te a tangtun zo taktak Zomi mipil vang ih hih zawh nading hanciam leh sep taktakna ding tawh hong kidimzaw ding hi. Tua nasep hoihte ih sep zawh nading in tuni in zong ih kiciam phatphat hong kul ding hi. Dinmun nuam tutmun nuam ih ngah ciangin gentheih haksatna te a mangngilh mihing kitam kha thei mahmah a hihmanin kidophuai hi. Zomi te ading in nasem ding ih cih ciangin Zogam mualdawn ah teng in zawnlehngauna tawh ankhing tuikhing kham zo lo a, khitui nul in a kapkap, a genthei Zomi te nuntak phattuam nading nasem in, amaute khitui a nulsak ding cihna hi pah hi. Zomi te sungah Zawnna leh hainate bei sak a, mihau milian cih deidan nei lo in, nasep silbawl sum thalawh pai thalawhna te ah, mikim in a kibang in hunlem a ngah kim theih nading uh vaihawm sak ding hi hang cihna hi.
Zomi te ih khang tangthu sung en kikkik lehang, hong nusiasa mipil misiam ih pu ih pa te ngimna bulpi pen a luangkhia khituite nulkeu sak ding cih hi a, tua pen ei khangthakte ading in olvat lo mah ding hi. Ahizongin mite gentheih thuakna a om laiteng ih gam ih lei ih mipihte ading na ih sep a lawhcing zo nai lo hi hang cih ih phawk tawntung ding kisam hi.
Tua a hihmanin Zomi te taang belhtak muantak a hong kiteelkhia kumpi tuamtuam te’n na panmun tek uh ah ma hong pang un la, gam leh minam deihna, geelna lunggulhna te khempeuh a tangtun taktak zo na hih nading uh sep cihtak sem in hong hanciam un. Hih ngimna leh lunggulhna pen Zomi te bek hi lo in , leitung mi khempeuh lunggulh leh ngimna bulpi a hihi. Tua ahihmanin kilemna (peace) ,suahtakna (freedom) leh Khantohna, hauhna(prosperity) pen cikmah hunin kikhen thei ngei lo hi.
Long live Zomi and Zogam
Francis Lamthang
Comment piaknop aomleh...