ZAM Thupuak :: 24 April 2016

ZAM Thupuak :: 24 April 2016

US gam atungsa azi apasal te’n Visa 93 ahih keileh I-730 Form tawh asap uh ahi Applicant mi pawlkhat US Embassy ah Interview ding ani ki theicianta hi. Ahi zongin pawlkhat Contact ki ngahthei nailo ahih manin, Malaysia gamsung aom US Embassy pan ZAM Palai te tungah hong zasaksawn uhhi. Zomi veve amin gelhzia atuamtuam zong omthei ahih manin, avekmah in hong suaksak ung. Hihsung ah ih theihkhak aomleh na zasaksawn unla, ZAM Office or Phone 018 354 2927 ah hong Contact kikpah nading un na gensaksawn un. Petitioner cihpen USA pan asamte min hi a, Beneficiary cihpen Malaysia gamsung aom Interview alutding te ahihi.

ZAM Member te ading nasep pawlkhat

The Loaf Bakery ah nasemding mi kideihbeh

KLIA vanlengtual aom “The Loaf Bakery & Bistro” kici mohtuamtuam bawlna leh ansai ah nasemding mi kideihbeh leuleu hi.

Dal Sian Mang atheikha ih omhiam?

Sanggampa Dal Sian Mang pen Johor Bahru, Pakanana Camp ah om cih Kawlgam aciahkhin thongkia te khatkiangpan ki zasawnkik hi. Amahpen Kawlpi Tai 9 ah om cihciangbek kithei a, anu apa akhualui cihte ki theibanlo hi. Hih sanggampa pen thong akiatzawh kuamahtawh ki thuzakna neivetlo hihtuak a, asanggam tanau te’nzong a thongkiatlam theikhalo himaithei dinghi. Tua ahih manin, Tai 9 veng ah aom Dal Sian Mang cih minnei atheikha ih omleh ZAM zum or Sia Tuangpu tungah hong zasak pah un. Ph: 016 256 6093

Thang Lian Khup atheikha ih omhiam?

Sanggampa Thang Lian Khup pen tulaitak Bukit Jalil thongsung ah om cih kiza hi. Amah pen Tuikhal khuapan hi a, hih Malaysia ah athongkiatzawh meltheih tanau kuamahtawh ki thuzakna neilo hihtuak hi. A Body Number pen 17065 ci a, a meltheih tanau te’n hihvai tawh kisai ZAM zumah nongkan nading un kong zasak uhhi.

Thang Do Mung atheikha ih omhiam?

Anlun khuapan Thang Do Mung zong tulaitak Semunyih Camp ah aom laitak ahihi. A tunzawh kumkhat valkhin a, kuamah tawh ki thuzakna omlo ahih manin, ameltheih tanau khuapih te atheikha peuhin ZAM ah hong zasak pah un.

HIV natna Free in ki Check sakthei

Damsiang theimello in lunghimawhna tuamtuam naneih
leh ACTS ah HIV natna sum beilo in ki sitsak theihi. Monday, Tuesday leh Friday zingsang nai 9 pan nitaak nai 3 dong ki sitsak theihi. Contact theihding Sia khual Mobile: 016 267 9248

Cidamna tawh kisai theihhuai pawlkhat

TB tawh kisai zaksakna: TB pen ih theihsa mah bang in huihlak pan a kilawh thei nam hi. TB neite’n kam leh nak tuam hamtang thei leng midang kilawh lo zaw deuh hi. TB zatang ih neek nakleh mit leh kal leh lungtang hong sukha cih phawk ni. Zato na pai ciangin na omna Address aman tak pia in. TB zatangh na nek zawh kal khat ciang in na omna inn ah zato pan palai hong pai in na innkuanpih te’n TB neih leh neih loh sit ding uh hi. Naupang kum khat bang in aneih leh kha thum sung zatangh ne sak uh hi. Tuap TB pen kha guk sung ne in, guh TB pen kha kua pan kum khat bang ne sak uh hi.

Naupangno kepdan: Nuapangno te ih et ciangin cisa, khuasik leh sungpai tam mahmah hi.Nuapang cisa pen 39’C atun leh cisa kici thei hi. Naptui, buk zong tam in hih pen Virus hang hi. Tua bangte Paracetamol pia inla, tui leh nawi atam theithei dawn sak in. Cisa ahih leh puansia tui kawt sak inla cisa lak sak in. Puan a pan mahmah zong silh sak in. Pangka leh Aircon nuaiah lum sak kei hamtang in. Gentehna in a khevot, ci eng, naak haksa cih bang a hong om leh a manlang thei pen in zato Clinic ah paipih in.

Sungpai natna: Nikhat in thum vei sang a tamzaw daileng a, na ek a tui mahmah leh sungpai cihna hi. Siavuante etna ah naupang kha guk apha leh khacinglo a suakte ah tam pha deuh uh hi. Pawl khat pen ni 2/3 ciang dam kik ziau thei hi. Tua ahihmanin siavuan te’n nupite’n naunawi tampipi tep sak ding leh tui atam theithei piak ding hanthawn uh hi.Tua banah ih ekbuk, innkhan sung, anhuanna sung siangtho ding cih zong nak gen mahmah uh hi.

Khuasik: Naupang te 3% pan 5% ah kitam muh pen hi. Kha guk pan kum nga ciang cisa 39’C sang atam zawk leh khuasik hi pah hi. Cisa ah ih gensa mah bangin puansia kawt tawh khuasik lak sak ding, Paracetamol zong pia in ahoih tuam kei leh Clinic ah paipih in. World Heath Organization (WHO) te’n a genna ah nau apian khit zawh naikhat khit ciang a nu nawitep theih ding leh atam theithei a piak ding pen thupi gen mahmah khat uh hi. Tua banah naupang kha guk / kum nih pan tha a om ding anlehtui pia ding. Ni khat 2-3-4 vei cih bang pia den ding. Tui piak zel ding zong mangngilh loh ding hanthawn uh hi. Zomi te’n an mah ih nek pen ahihmah bang in naupang pen buhcim tawh huan khoppih ding mehteh mehgah , aksa aktui, ngasa, be cihte kisam hi..

Tedim Sumkhakna mun kilaih

New Eden Ansai pan Tedim sumkhakna pen amun kilaih a, KL Shewkabar dawl 3 na ah kituah hi. Contact: Pa Khup 011 3343 3031

Na UN vai nakan nuamhiam?

Na UN vai lunghimawh in kannop dotnop nanei hiam? UN Department tuamtuam ah lai gelhsaknop naneihleh ZAM Member te ading in pekkhatzong manngenlo in ZAM zumpan lai ki gelhsak theiden hi. UN Card hongki laksakte zong ngetkikna lai ki gelhsak theihi.

Mawtaw Ki Kawmthei

Malaysia gamsung UN zum, Airport, Hospital cihbang painopna tuamtuam naneileh ei Zomi te mawtaw ki kawmthei hi. Contact: Thangkhek Ph: 017 365 3391

Dahpihna

Tg. That Sian Lian – Hatlangh a suahzawh ni 8 a phakni 18 April 2016 in Sungai buloh zatopi pan hong beisan hi. A mah pen Laibung khua Pa Pau Ling Lo leh Nu Lal Ro Pari te sungpan a piang unau numei khat leh pasal khat lakpan a nautumpen hi. 19 April 2016 in Rawang Zomi Innkuan pawlpi makaihna tawh hehnep hun limtak a kibawl khitciangin Klang Mehru Christian han ah kivui hi.
A nutsiat innkuan pih te tawh kibang ZAM zumpi pan in dahpihna I pulak hi. A lamdang Topa’ Khasiangtho in hong hepsak ta hen. Amen

Ngeina van tuamtuam ki leithei

ZAM zumpi ah ih ngeina vantuamtuam ahi Zopuan Design tuamtuam, Zoniik Design tuamtuam, Puanten, Puandum, Zodial (Silk), Puanlaisan, Zokhi, Tanghciin, Khephiau, Zolukhu, Zothungkuah, Zodial cih te akipan naupang puan tuamtuam te deihzahzah ki leithei hi.

Note :: PDF tawh na simnop leh
Hih link >>> PDF File tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh Zomi Daily website tungpan kongsuaksak zelzel uhhi.