Lampi nih bek om
Eikhatciat ih kigawmciangbek in, innkuankhat, khuakhat, gamkhat a omtheibek a hihlamthu, ih phawk ding hi. Banghang hiam cih leh, mikhat ngaihsutna, thukhentatna leh gamtatna hang in, mitampi in noptuam lawh, thuaklawh, sihlawh uhhi. Eikhatciat ngaihsutna,khentatna leh kalsuanna hang-in zong, mitampi nuntakna kilamdang sak hi.
Zogam leh Kawlgam mailam ding, gamsung gampua aa om mite khempeuh in, eidinmun dung zui-in, kalsuantheihna hun khat kinei kimciat hi. Tutung ih kalsuanna in, tu mahmah leh mailam khatciat nuntaakna sung ah munla-in, hong khoihkha-tek ding a hihi. Thudik leh thupoi (Heaven or Hell) lamkaabom a ki omlaitak in, koilam pialzaw ding ih hiam?
Nisim ih nuntaakna ah, utthu leh ngaihsutnop-thu zong hilo-in, mihingte lungsimtawng(conscience) in a khentel sitset theih, a sia leh a pha khatzaw teeiteei ih teel kul den hi. A pha ih deih leh a sia nusiat ding hihamtang hi. Tua ih lungsimtawng’ ih dotna tawh kizui in, sia leh pha ih muhna zong kilamdang thei hi.
Lungsim tawdap dungzui-in zong, ih nuntaakna leh ngaihsutzia kilamdang theilai hi. Bangzah in, leitung pilna,a sangpi’ zozo mahleh lungsim kawileh a toi pawlkhat omthei veve hi. Lungsim tawng ki-entel ngeilo te-in, tamveipi khialta leh a khialhlam phawklo uh aa, a ngeina sata uh hi. Tua khialhna te leitungpilna laitan tawh dinpihzaw behlap theilai uh hi. Tuabang mite a thahat ciang in, mitampi in gimna leh sihna a ngahpah keilehzong, kibuaipih mahmah hi.
Tua hi aa, “Lungsim siangtho vaabang pilding” pen, pianna pupa leh biakna upna laigil in, hong hilh thumanpha a hihi. Thangho leh Liando in miimtang, taangtang phelhawm ih cih mah bang in, Christian te zuihding kamciam alian pen zong, “Note khat leh na ki-it un” cih kamvai khaak a hihi. Tua thuvaikhaak kamciam te a tangtung sak pen, kipiakkhiatna hi ngeu hi. Tutung in, ih nuntaakna vekpi, ih piazokei zong-in, a langbeek phelhawmzo leeng cih ngaihtuahna a hihi.
Genhaklo na pi-in, gamtat lakhiathak mahmah a hih man-in, a gahzong limci in, mawkbei lo hi. Tua a gah in, ei mahmah hong angtang sak in, a tawntung nopsakna lampi hong puak leh hong guan zong hipah hi.
Mitphiak khatsung bek hunpia in, khuadak pakleeng, vasate leh gamsung ganhing te’n lokholo in, puuksi hetlo hi. A hizong, mihing te’n bel, gilpi aa ding, nisuah nitum in kibuaipih taleuleu hi. A zawng a hau gilpi khatciatbek mah kinei aa, lupna khattungbek ah ki ihmu lel hi. Tomkal nunsung a langphial ahi , ih ihmut hunsung, leitung kimu nawnlo hi. Tuabang hi mah leh, ngaihsutna kizang khial thei zeel in, a puatham bek tawh thu kikhentat ziau thei hi.
Ih dinmun ih theihna ding in, ih lungsimtawng ettel ding a hihi. Tua hileh a sia leh a pha khen haklo ding aa, kei koilam zuan cih ih tel sitset ding hi. Bang sem in, kua panpih, bang lampi zuiding cih theihhaklo nuntaakna ih neih leh Christian upna ahi, Pasian teenna innpi-pumpi ih neita hi. Tawntung nopsakna ih ngah nading in, a sia leh a pha koilam panpihding, a teelthei kimciat ding in Sian in hong siam tahen. Nantal’suan
Comment piaknop aomleh...