Malaysia Zomi Khuado 2014 Ka Siimna – 2
Ka veilam ka hekphei leh paungaihna (sound system) a saite pawl tutna gei ah hunzeek dingte gel a Zopuan uh silh in a dingkhawm linlian ka mu hi. A paupau kawm un nunglam a kongkhak pan mipi hong lut ziahziah in lutna kongvang thum bang a om pen a dim metmet in mite hong lut ziahziah a, a innpi sung kimvial a kidawhsang tutna te ah mipi hong tu dim ziahziah hi. Mipi kiphu lua leh cih a encik ding a kicial sawltangzang ‘rela’ te zong a puan uh eng deldal silh in kongvang teng ah om uh a, mipi hoihtak in lutsak diamdiam uh hi. Tua bang kawmkawm mah in hun hong cingta ahih manin hunzeek ding te gel mipi maia dawhsang (stage) tungah kahto in puanpi kikhai liah ah lutsuak uh a, bang hih dinga lutsuak uh hiam ci a ka khuadak laitak, a nih vua khut khat tuak lamto sa in hong kidawk khia kik vat in, “Zomi Khuado ah na vekpi un kong muak uh hi,” ci a kiko in mipi in khutbeng ziahziah hi. “Na geivua tute kiangah ah, ‘Khuado Thupha’ ciin na kikhutlet un,” a cih khit uh ciang mipi te zong kinohset, kikhutlet ziahziah hi. A kiu khat a tangvalte bel Zolia hong pusuak pah dingte nohset nuamzaw le uh kilawm sa ing…! he he he
Mipi khempeuh dingto in Zomi te lametna leh thungetna, mailam kalsuanna a kibehlap ding deihnal leh khantohna, thupha sannate Topa
tungah om hi cih phawkna, thungetna lasakna nuamtak a kineih khit ciangin Rev. Thang Do Khen in hun leh vai khempeuh Topa tungah apna hong neihsak in mipi in AMEN a kicih khit ciangin ZAM President Sia Hau Suan Khai in Vaidawnna leh Thukonghonna thu hong gen a, mipi kilawp semsem hi.
Malaysia Zomi khempeuh kipawlna ZAM makaipipa in sak leh khang pan hong pai – a diak in Singapore, UK, Kawlgam, India pan hih Zomi Khuado hong siimte muakna leh vaidawnna, hong kihel theih man vua a lungdamna uh leh angtanna, hih Khuado a thupisakna leh a zahtakhuaisakna te hong gen masa a, tua khit ciangin Malaysia ah Zomi te nopna dahna hunte ah a kipawlkhawm, a sem khawm, kua mah a kitaisanlo ahihna thute zong gen to suak hi. Pupa khang pan Zomi te gal mai, sa mai ah a kitaisanlo hi in a kihuh, a kihong te hi hang cih tel theih dingin hong genkhia khawm pah hi. Tu laita Zomite dinmun, a diak in Malaysia ah, a haksat mahmah kawmkal ah mipi khempeuh a pankhop ciangin hih bang Khuado hong thupi in hong nopci mahmah hi cih a gen kikkik hi. Mun tuamtuam a Zomi Khuado a zang khempeuh tawh lungsim kikhat a kalsuan leh kiphawk ciat hi cih a pulak khit ciangin tuni a hong pai khempeuh tungah lungdamna ko bek hilo in mailam ah zong gam leh minam adinga semkhawm, pangkhawm den dingin vaikhakna gen hi.
Malaysia a Zomi makaipipa thugen thupi mahmah leh kicing, zahtakhuai mahmah ban ah a seppihte tawh a kithutuakna leh a hanciam khop ziate uh ka muh ciang nopci ka sa a, enghuai kasa phial hi. Zomi sitset 27,000 val makaih cih mawk pen District nih bang a kem suak mawk ahih manin Moses in Israel mite a pikhiat ding laia sehnel gam ah a sunghpa Tuu a cin masak tawh ka mimal lungsim ah ka na tehkak kha mawk hi.
Sia Khai a thugen khit ciang itna leh deihsakna tak tawh Zomi te adingin hong sepsak leh hong pattah Madam Tania thugen dingin sam hi. Amah pen Zomi te hih gam a tun ciil pek pan a kisapna khempeuh ah lunghiang hetlo, lungkia hetlo, lungduaitak leh itna picing tak tawh na a sem ngitnget hi a, Zomi khempem adingin ‘theihloh gam ah tuunnu’ ciin ka ciamteh pak mai hi. Malaysia a bung a beng a tungte nangawn a kisapna uh a muh leh na huh in, a pilna ding uh sanginn na phuhsak in, tagah te nangawn nek ding dawn ding na vaihawmsak in, ZAM ah makai khempeuh thakhat thu a palikte in a mat a thongsung, gamgi a denna laitak un zong amah mah pai ngiatngiat a va honkhia, sum leh pai bei a diang ahi hi. Zomite adingin Samaria mihoih bang hi. Zomi te adingin Pasian lim leh meel hi. Pasian eite tawh hong omkhawm a cih banga Zomite haksatna khempeuh ah hong omkhawm, hong huh hong dal amah ahi hi.
Madam Tania thugenna ah ka phawk velval pawlkhat om hi. Zomi te haksa takin na theih ngeiloh gam hong tung uteh, hong hehpih ung, hong huh nuam ung, na thuakna uh hong telpih ung. Ahi zongin tu in hih gam ah hong tung pawlkhat, tu in na ut bangin gamta hi uh teh – biakinn lam zuan nawnlo, thungetna nei nawnlo hi uteh cih ka thei hi, ka mit tawh ka mu hi. Tua pen dahhuai kasa hi. Hih banga na om uh leh lamgei lampam ah zu dawn zukhawm peuh in om vakthap kha ding hi uhteh. Na gam uh zong damdamin hong hoihta a, hih banga a kalsuan toh zel leh UN in zong gamdang hong puak nawnlo in no gam ah hong ciahsak kik zaw kha ding hi. Tua ahih manin ciahkik a kul leh zong a ciah kik dingin kimansa un. Banghang hiam cih leh hih gam ah na theih uh na muh uh thute, sepna te uh na gam vuah na tunkik uh ciang na nekzonna uh gina tak hong suak kha ding hi. Tu in Thai gamgi ah UN te in minkhum nawnlo hi, na gam uh a hoihtoh zel man hi. Hih lai ah zong bangtan kikhum lai ding cih kigen khol thei nawnlo hi. Tua manin mi zattak hi dingin kisek unla, ei Christian te in i Pasian mah i mangngilh loh ding thupi pen hi. Ken hih zahta kong huh hangin keima sum pek khat zong omlo hi. Mi hong huh nuamte ken a zeeksak bek ka hi hi. Kawlgam ah tagah huhna mun 20 val ah ka nei a, naupang ka kep uh a vekpi 7000 val hi. Tua manin hihte a om den ding sa kha kei un, a nak kang thei hi. A nak kang leh noh leh noh na kikep zawh nadingin un kisin khol un.
Hih banga deihsakna thu hong gen pen tam khollo ding hi. I nu leh pa bek in hih bangin hong hilh uh hi. Deihsakna tawh hih bang thu hong gen thei ‘theihloh gamzang ah Zomi te tuunnu’ hilo hiam ka ci mai hi. Topa in amah zong damna leh thahatna hong piaksak hen la Zomi leh Zogam bek hilo minam khempeuh adingin thupha a suak semsem dingin thupha hong piaksak hen.
(zop lai ding)
Hau Za Cin
Phuitong Liim
www.hauzacin.blogspot.com
Comment piaknop aomleh...