Malaysia gamah lungphona neite kipankik leuleu

Malaysia gamah lungphona neite kipankik leuleu

Nov. 19, 2016: Malaysia Prime Minister Najib Razak in 1Malaysia Development Berhad (1MDB zong a kici) sum dangka ama meetna ding bek in $700 million a kizat lohna ding pi-in zangmang (embazzeled) ci-in July 2015 in thu a om manin nekgukna langpangna thu a tangkopih pawl (anti-corruption activist) Bersih kicite makaihna in mi 20,000 kiim in Aug. 2015 panin lungphona na nei uh hi. Bersih kici pen Malay pau hi a, siang (clean) a cihna hi a, Najib Razak in ama deihna bek tawh gam ukna (authoritarianism) khauhsak semsem hi ci-in hih lungphona neite pen leitung adingin democracy kician a deih kiphinna – global pro-democracy movement hi ci-in zong kiciamteh ta hi.

Tu nipi kal tawp (weekends) panin Bersih ten puan eng silh in lungphona neih kipan kik nawn uh a, tu ni-in hih lungphona nei ten Prime Minister Najib Razak a kitawpna dingin phu uh a, Malaysia gam tangthu adingin tu ni-a lungphona pen mi tam ni pen hi kici hi. Lungphona neite lak-a khat in Malaysia pen gam hoih mahmah khat hi napi-in tu-in nekgukna leh sum ah politics kizatna (money politics) hangin gam kisia gawp khin zo a, kicimtak lua ta hi ci hi.

A beisa kha 15 a kipanin lungphona na kipan ta a, kumpi in civil society tampi bengdai in, kumpi gensia (critics) tampi a matna hangin Bersihte tawl khat hong daih pian hangun tu nipi kal bei a kipanin lungphona neih kipan kik ding hi ung ci uh hi. Malaysia gam bek hilo-in leitung mun tuamtuam a om Malay ten amau omna gam teh uh-ah lungphona na nei kawikawi ding uh hi.

Bersihte Chairperson, kum 60 mi Maria Chin Adbullah in mipi lungkim lote uithak vei bang ta uh ahih manin kidai om mawk nawn lo ding hi ci hi. Nung kal in lungphona a makaih manin thah dingin vauna tampi tuak hi ci-in World Organization for Torture in gen a, zan nitak in zong parliamentary democracy nasepna nawngkaisak hi ci-in ngawhna tuak a, kiman hi ci-in local media in suaksak hi. (A man leh man loh bel kitel lo hi).

Nazib Razak in PM za 2009 in a let in sum leh paai bawlna lamsang (economy) leh minam leh ngeina tuamtuamte kituak takin a teen khawm theihna (multiculturalism) ding kamciamna na nei hi. Ahih hangin sum negu in a kingawh banah (aman bel nial hi) suakta takin thu suah theihna ding leh thukizaksak theihna (freedom of press) beng dai in, print media, TV, leh radio station tampi kumpi ukna nuai-ah koih khum hi. Wall Street Journal leh London pansan investigative website Sarawak Report Najib in IMDB panin ama’ personal bank accounts ah sum $700 million koih hi ci a, WSJ in report a piak kikna ah a sum koih pen $1 billion val hi ci kik hi. #MalayZomite bangzah na va kihel vua? -TIME MAGAZINE/ Thang Khan Lian