Dr. Kai Hau Lian Pau in hongnusia

Dr. Kai Hau Lian Pau in hongnusia

Pauno (Dr. KHLPau) aw, dah mahmah ing ei maw. Sawt nong nat luat teh ka nau’ nat zia tawh kibang lua uh cin-a ka diip a kuakua, thu na ngengen hi ve ung.

Na neu tunga kipan kong theih hi, Tedim khuapi sunga inn hoih pen ah a khangkhia hi teh. 1997, 1998 kum Zangkonga sang khat pan Tedim ah nong transfer ciangin zingsang khat hong hawh-in na class lak dingteng i kikuma lai ka hilh ngei sangnaupang khempeuh lakah a pil pen khat-a kong ciapteh na hi hi. Na khutlam-a kipan na khempeuh ah na kiciat sinsenna ka mu a, a ki-organized mahmah mi khat na hihna kong thei hi. Tedim pan sang na zawh ciangin ka nau Si Siingte tawh Bahrat Bible College ah MTh dong na va zo leuleu hi. Tua bek hi lo-in leitung lam ah zong Monywa University panin LLB nong zo lailai hi.

2005 kum Korea pan sang man-a kong ciah ciangin inn ah nong hawh-a, ka sangkahna thute hong dongin kei zong tua sang mah ah kah le teh ci-in kong deihsak bang teekteekin va kah thei-in ThD degree ciang dong na va zo hi. Korea na om sungin kei’ om lai-a i sangte in hong piak uh Gangnam a pawlpi mah ah na kikhop lam zong nong gen hi. I siapa leh i pawlpi mite bangci zaksak mawk ding ka hia? Lawp kei lua ing.

Pasian’ nasepna ah i kithuah kha kika, na kiniamkhiat luat dan in hong maizumsak phial hi. Mangkam, Kawlkam siam na hih manin Kawlkam-a na laibu gelhte mang nawn lo ding, ci-in ka lungnuam tuam hi.

Pawlpi sung leh Laisiangtho sangte ah na laihilhna, lailam tawh Pasian’ na nasepnate a hun a tom tawh a kibat hangin sim tham mahmah, i Topa’ muk panin “Well done, good and faithful servant. You have been faithful over a little; I will set you over much. Enter into the joy of your master” cih kammalte na zak ding bel ka bilkha ah za thei ing.

Eimi sung ah nang banga pilna nei educated taktak Pasian’ adinga hunbit nasem tam het lo a, pammaih kong sa lua hi. Jangshin University banga sang minthang khat pan missiology tawh doctorate zo cih pen a theite in thupi hong sa lo thei lo ding hi. Rev. Dr. Kai Hau Lian Pau BABS, LLB, MTh, ThD aw, khoh theih hi lecin tawlkhat kithuah nuam lai zen si hang mataw! Na zi a tate Topa’n tavuan na la ding ahi aw! Hong ngai ing ei, Pauno aw, nasa mahmah ing. Rev. Zam Khat Kham

Dr. Kai Hau Lian Pau ka phawkna

2001 kuma FBBC ah kei sangkah first year nang pen final hi ngel ni teh. Na inn uh kong hawh uh na လက်ရေး ka muh ciang hoih kasak luat mangngilh thei keng. Ko naupang honkhat ka lasak dinguh na khut ngiat tawh ong copy khiatsak ngei teh. Na လက်ရေး ka muh ciang a bem a hoih mawkmawk hi kei mipil လက်ရေး hi kong cih na thei lai tam.

2006 India M.Th mankhina nang ong tungsuk khin Kawlpi a ka inn gei vuah Sianu tawh inn ongsap na tanu upen suahkhit tung, Sianu in LCEC ah teacher sem, nang inn ah nau kem kawma kei English grammar and composition ci a nong hilh zelzel, ka sia hi napi ci’n lawmta banga nong ki thuahpih, kei LST sangkum 4 na kazawh khit ciang nang Korea ah sangkah ding ci a na application form ih velvel khawng, kei zong apply dinga nong sawlsawl, na Application form ken မိတ်တူ bawl in ka form fill up zia ding zong a veka nong kisin sak. Kei bel Korea ah sangkah khalo.

Mission nasepna phual ah kum 10 ka cin hun uh a, nong hawh, thu nong ngetsak ngiat, ka inn pawlpi te uh ih ban hawh a ka pawlpi mite kiangah ka sia hi kong cih cianga ka angtan dan nang zong thei ni cia.

Na laibu at te bu 25 kong lei cianga a yin ki ngah liamliam pan ei nong cih se. Ko tua laibu te pawlpi mite tawh group a sim khawmzel hi ve ung Sia. Nazi na tate na itzia, kazi ka tate it mahmah dinga nong hanthot ziate kimang ngilh thei mawk ding maw Sia.

Ka motor kalaih ciang ong lungdampih a phone ong set tautau, khua hun hoih ciang ong ciahto vo, na motor hawl ni in gospel pai ni nong cih ken ka sunmanga a geel geel hi veng. Ong ciah leng ken banglawh mawk ding…

“Dr. Kai Hau zong gim” ci lailai cih ka nu tungpan kazak ciang, thu kong na ngetsak pahpah tangtang hi ven, leitunga ong itte’ tha sangin vantungin ong huupna tha khauhzaw ai ve maw..

More: Covid 19 hong laang phasan hi ~ Sia Do Khup

Kong gengen theihloh hang ong it ngel hi veng maw Sia aw.. Khasia kei oo ka Sia. Th.D dong a zo pa hi cei. Mipil mah dingin om cin kum tawmvei sunga nasep ziau teng Khazih le a pawlpi adingin go manpha vive suak ziau hi. Vantungah kong ciahciang kimu ni ei Sia. Sia Suanpu