A (3) veina ZBCA – America Khawmpi nuamtak kizo

A (3) veina ZBCA – America Khawmpi nuamtak kizo

Ani : July 10-12,2015.
Amun: Agape Mission Church, Nashville,TN.
Theme: Palh khiatna . Late 92:13.

ZBCA Lungtup thu-4:
(1) USA gamsung a om Zomi khempeuh in anungta Pasian biakhawmin ih phatkhawm theih nading.
(2) USA gamsung a om Zomi ten ihihna Identity limtak ikep den theih nading.
(3) USA gamsung a om Zomi te sungah adiakin dahna hatsakna hun ah limtakin ki panpih theih nading.
(4) USA gamsung a om Zomi ten kipawlkhawm in Topa gam adingin Mission na sepkhop theih nading.

Khawmpi vai atomkim pulaakna:
1. Khawmpi sim pen gam 4 pan ki pai- Australia, Singapore,Myanmar leh USA.
2. USA gamsung khua 35 pan khawmpi sim ki pai a, nisim in zin tung den a, zin vekpi 500 val pha hi. Kikhawm mi 1000 val pha den hi.
3. Innteek pawlpi in Hotel leh innhoih nono sungah zin hongtung sak a, an lim mahmah tawh hong vaak lai uh hi.
4. Ordination ngah thak mi 4 om hi, Rev. Hau Suan Mung ; Rev. Thang Lian Mang; Rev. Suan Khan Mung leh Rev. Cing Sawm Sang te.
5. Zomi Lasiam mi 13 bang kihel thei hi, Sia Kapmang, Sia Tuamung, Suanno, Sanboih, Mahciang, Khaipi, Cingpi, Sianpi, Mungpi, Zambawi, Esther Sian, Sanpi, leh Paalnu te.

6.Pasian kammal pulaakna – Rev.Dr.Suan Za Pau ( GS – Myanmar AG ), Rev. Tuan Khan Mung ( President -ZBCM) leh Rev. Pau Khan Khai ( Vice President,ZBCA) te.
7.Speech piakna- ZYA pan leh Rev. Hen Khan Go te.
8. Dr. Gin En Cin bawl Labu ( Zokam leh English ) zong Topa tungah apna kineih sak hi.
9. Lungdamkoh thugenna : Tennessee Baptist Convention pan nei uh a, innteek pawlpi zindona dingin $ 5000 zong pia uh a, pawlpi(Church) 3200 aitang leh SBC pawlpi (Church) 50,000 aitangin lungdampih thugenna hongnei uh a, Pastor omthei teng laibu hoih mahmah nih ta pia khia uhhi. Athugenna ah: “Zomi te hangin America gam in Kha leh taksa ah cidamna leh suahtakna ngah dingin kalam en mahmah hi, note pen kote adingin khaici hoih na hi uh hi,” cih thu zong gen hi.
10. ZBCA mintawh Zomi All D ngah akipahtawi te lak ah kum 2008 a kipahtawi Tg. Tuangpi te innkuan zong om thei a, lungdamkoh thugenna leh interview na kineithei hi. Tu laitakin Harvard University ah MD leh Ph.D join program tawh asinlai ahihi. ZBCA nasepna khaici apo khia ahihmanin kilungdam mahmah hi.

11.Khangno te bawlung suih kidemna om a, ZBCM of Tulsa in akhatna ngah in Cup hoih mahmah tawh ciah liau liau uh hi.
12. Kidemna tuamtuam- Laisiangtho , Solo, Quartet leh Nupi Action om a siam thei mahmah hi. Akhatna pan thumna ciang letsong limtakin kipia hi.
13. Innteek pawlpi in zinmuakna leh zin khakna la hoih mahmah sa uh a, mipi lungsim no suak mahmah hi.
14. Praise and worship sungah mi khempeuh kihel kim a Zomi te hong ompih Topa tungah lungdamna kiho ziahziah hi. Cina tampi tak in zong Pasian minphat sung in damna ngah uh hi cihthu kiza kik kik hi.
15. ZBCA Delegate kah sumzui mizui in mi 80 val pha a, thukhensat thupi mahmah te in: ZBCA huamsungah Donghu kipawlna abeisa a kinei pen kizom toto dinga, mikhat in hong nusiat leh Pasian nasem te leh pawlpi miten adelh ban ah Donghu fund panin $ 15000 ta piak dingin kikhen tat hi.

16. ZBCA tawh akizomsa pawlpi 18 te leh akizom lai ding ten sawm ah khat ngahna pan 7 % tawh kizopna khauhtakin din kip dingin kithu kim mahmah hi.
17. ZBCA tawh akizom nuam te pawlpi A pan Z kikal kuamah deidan omlo in kisang thei ding hi .
18. ZBCA gamsung a Degree ngahthakte, High School zothak te leh pahtawina sangdeuh angahte pahtawi kikna kinei hi.
19. Zomi Idol kum 2008 a mipi tampi theih dingin abawl Rev. Tuan Khan Mung pahtawina kipia hi.
20. Myanmar Uplifting Mission aphuan khia – Rev.Kap Khan Mang , Rev.Dr.Tun Cin Kap leh Rev. Tual Khaw Mang te pahtawina kipia hi.

21. Zosiam nasepna apankhia Rev. Pau Khan Khai pahtawina kipia hi.
22. ZYA nasepna pahtawina kipia hi.
23. Tate patahna ding tawh kisai in Siamah Helen Cingpi in nupi te tungah thusinna neisak a tha kingah mahmah cih thu kiza hi.
24. ZBCA mintawh Zomi All D ngah te thupi takin ks. 1,000,000 ( One Million) tawh pahtawi tohtoh dingin kingaihsun hi.
25.ZBCA mintawh Kawlgam leh Zogam ah Kha lam, pilna lam leh khantohna tuamtuam mailam ah sepzawh zahzah sep ziahziah dingin kingaihsun hi.

26. Maikum 2016 ZBCA pawipi mun ding pen Denver ,CO khuapi dingin kigeel hi.
NB: ZBCA in Zomi kipawlna tuamtuam te khut kilen a akisam bangin ma pankhop dingin kilunggulh mahmah hi.

Ka phawk pak teng konggelh pak hi.
Lungdamna tawh,
Sia Pau Khai.
July 14.