Gambia President thak Burrow agam ah ciahkik ta khongkhong

Gambia President thak Burrow agam ah ciahkik ta khongkhong

Jan. 27, 2017: Kum 22 sung Gambia gam uk Jammeh a gam panin nung Kiginni in tai khia hi. Dec. 1, 2016 kiteelna ah President thak dinga kiteelcing President Adama Barrow a galtaina Senegal gam panin Gambia ah ciak kik ta khongkhong hi. A ciah kik ma-in nung Thursday in Senegal gam-a Dakar khua-a Gambia Embassy ah President ding kiciamna na nei khin zo hi.

Burrow pen January 15 in Senegal gam-a galtai ahi hi. Zan in a zite gel tawh a ciah kikin puan ngo leh lukhu kang khu a, vanleng panin a kum khiatin Senegal leh Nigeria galkapte tampi in cing uh a, Gambia gakap uliante leh senior members ten Banjul vanleng phual ah na muak uh hi.

Gambia gam pen gam neucik khat hi a, kum tampi tak British ten a gamkeek lai un na la-in British colony ahi hi. Suahtakna a ngah khit a kipanin gam makai Yahya Jammeh in kum 22 sung na uk a, December 1 kiteelna ah Burrow a cing hangin thuneihna na pia khia nuam lo hi. Adama Burrow in tu-in thuneihna len ta ahih manin Gambia gam tangthu adingin mi a tamzaw deihna tawh kiteelcing (democratically elected) kumpi kilaih masak penna hi lai hi.

Adama Barrow Banjul vanleng phual a tun ma-in amah gum pawl mi za tampi in na ngak uh a, khuangtumte leh lasak siamte zong a hun khop in na muak ngeingai uh a, Burrow muak mipite Nigeria leh Senegal galkap ten en giaugiau bek uh hi. “Burrow in gam puahpha kik ding hi. Amah mi hoih hi a, mi that hilo hi,” ci-in Burrow gum Adja Kombeh in ci hi.

Gambia gam mi ten Jammeh in sik-khuttum (iron-fist) tawh hun sawpi hong uk a, tu-in suahtakna kimai-et ta hi ci uh hi. “Burrow pen na khempeuh ah kilamdang hi. Kum 22 sung mi khat deihna bek tawh ki-ukna nuai-ah na ki-om a, inn ah ihmu dingin a kiciah theih hangin khuavak ma-in hong kimat ding bek lautawngna tawh tawh ki-om den hi,” ci-in pensioner Ibrahima Gaye in ci hi.

Gamvai buaina veng siang nai lo ahih manin a nuntakna lauthawnghuai lai ahih manin Burrow a inn ah omcip lai dinga, State House in kum 22 gam uk Jammeh thuneihna hong len in cih ngak lai ding hi. Buaina a piang kik khak vat leh cihna tawh West African galkapte Gambia ah 4,000 kiim kikoih lai hi. Jammeh nung Kigiinni in kumpi sum $11million leh luxury cars a hunkhop tawh (Rolls Royes car nih kihel in) a gam panin vanleng tawh Equatorial Guinea gamah taimang hi.

Taimang lo hi leh gam 15 kipawl khawm Economic Community of West African States (ECOWAS) in galkap 7,000 sawl lut in aana tawh thuneihna laksak sawm uh hi. Burrow administration thakin Jammeh in a taimangpih luxury cars khempeuh a neih den theihna dingin thukimpih a, $11 a guk manin dan piak ding vai pen national assembly in vote two-third majority tawh thukimpihna a piak kul hi. Source: Al Jazeera and news agencies/ Thang Khan Lian