Dimno’ Nu laikhak – 7

Dimno’ Nu laikhak – 7

Dimno’ nu,

Dam in lai tawm khat hong khak kik ing. Thangpi te unau zong dam tek in teh maw! Phalbi khuadam hun hong hi ta-in, i naupang te a puanlum ding khawng limtak in gel sak le cin ut ing! Milak khawng ah apai uh ciangin khuadam sa-in, a ling kalkal ding khawng ka ngaihsut ciang ka lungnuam kei!

Dim aw, kong vai khak nop khat om! Tunung in Thangpi in, phone sung panin hong hopih lai-in, kawlpau in, အေဖ… ေနေကာင္း လား။ အေဖ… ဘယ္ေတာ့ ၿပန္မွာလဲ။ ( Pa…na dam hia….bangciang hong ciah ding nai a ) ci-in hong hopih dihdih pen lamdang bang sa vat ing. I inn sung khawng peuh ah kawlpau bekbek in a kipau pihpih heuh na hi uh tam ci-in, ngaihsut huai lo thu tampitak ngaihsun kha ing!

Dim aw, i tano te’n kawlpau peuh a theih loh khak ding na lua man in, i innsung khawng ah kawlpau azangh na hih khak leh khial kha dingin hong um ing. Kawlpau pen a sang kah na, a lawm a gual tawh a ki thuah na-ah ei pau pihpih, ei hilh hilh kul se lo-in hong theih mahmah lel ding ahi maw! Innsung ah khat leh khat na ki ho na-in, namdang pau’ na zangh peuhmah kei un maw! Ei’pau-tedim pau mah tawh na kipau pih ciatciat un!

Kei bangin ei Zomi innkuan khat hi-in kawl ( namdang ) pau peuh tawh innkuan sung ah a ki hopih bualbual se te, a hingtang in amang, mi mangthang taktak hi ci-in, zomi a it lo-in ka ngah sun a, ui in zong amu lo hi ingh! Uang zong uang thei kha mai mah ning! Ahi zongin ka cih takpi hi! Innsung baangkua ah eipau zangh in, namdang te ciangin amau pau ( namdang pau ) mah a zangh te pen pakta ing! Tua bang hilo in eimi hi-in eipau thei lo lailai te bel gen in zong gen vet kei ni, tua bang mite ka muh mahmah ding zong ka mit paammaih sa ing!

Khat vei khanglam pan in hong ciah khat tawh ka ki paupih kha-a, “ke nu pen titeng te, ke pa pen tawzang te aa ve…kaw unau pen khalam pan khan khia in, zawpau pen siam lo ke ve” hong ci-in, “ tua bangdan aa Zopau thei lo-in zawpau bek in pau theih na hih vua leh, na innkuan un Zawpau limtak in sin in, Zawngmi kici un la, na suan na khak teng uh Zawngsuan ci vet in, na behmin ding uh pen Zawngbeh ki ci vet le uh cin,” ka cih leh nuam tuak khol kei! Tua a kipan lampi ah ki tuak le ung zong hong hopih nawn lo-in hong gul-et guauguau!

Biakinn napai uh ciangin Kawl labu, Kawl Lai Siangtho ( namdang laibu ) peuh mah na tawi kha kei un! Tedim labu, Tedim Lai Siangtho bek tawi un! Kawllai, kawlla peuh a theih loh khak ding lau in, Kawlla, Kawl Lai Siangtho khawng tawh na pantah het kei in maw, i ta te! A picin ciangin ei sangin Kawlla, Mangla, Kawlpau, Mang pau te hong siam zaw ngelngel ding ai maw! Ei tawh i ki thuah lai in, ei lai, ei pau limtak a zat aa, a sin theih nadingin nang mahmah in na pantah in maw! Zolai bel sim hak, tel hak, kicing kei, thupi kei peuh naci kha kei o! Zola zong thu thuk kei lua, a khiatna ol lua, baitlua in kawlla khawng, mangla khawng sak huai zaw peuh ci kha thah na teh! Ei lai, ei pau, ei la thupi sa lo-in, zangh kei le hang kua in thupi sa in hong zatsak mawk ding!

I tate ei’ lai, ei’pau hilh kei le hang agol uh ciangin a lawm agual mai-ah Zopau, Zolai thei kei leh amai uh zum in, ka nu leh ka pa in ka neulai un bangmah hong hilh lopi, kawlpau bekbek, kawllai bekbek in hong paupih, hong pantah ci di ahi uh maw!

Thangpi in lai hong khak kik ciangin Kawllai laigual, Manglai laigual khawng peuhmah gual khat zong hong hel nawn kei le ut ing. Manglai, kawllai, namdang lai a theih khak ding, a siam khak ding a deih lo ka hi kei a, ei lai eipau a thupik sak loh khak ding , a theih loh khak ding ka lauh man hi zaw!

Hongphawk den,
Na Utuang
Tuipi Gal Khatpan

By,
Paukap
November 15, 2010