Philippines ah huihpi nawkna hangin misi kibehlap, asi 43, amangcip 45

Philippines ah huihpi nawkna hangin misi kibehlap, asi 43, amangcip 45

Philippines gamsung ah huihpi guahpi nawkna hangin misi kibehlap toto a, tulaitak asi 43 phakhinta cih AFP pan kiza hi. Mencim leitolhzong nasia mahmah in, amangthangcip akimuzo nailo zong honpikhat omlai ahih manin, tuate adingin ki lunghimawh mahmah hi ci’n tuni Tuesday ni in Authorities te’n genkhia uhhi.

Hih “Tropical Storm Kai-Tak” akici huihpi guahpi pen Monday ni in South China Sea lamsang zuanin damdamin ki heikhiatasam cihi. Ahi zongin Central Philippines gamsung tengah abeisa kalsungin anawkna hangin innsia losia tampitak omhi.

Government’s Disaster Monitoring Agency te genkhiatn ah anunung akiza misi pen akigawm in 43 hi a, tuateng bekthamlo amangthangcip zong mi 45 bang omlai cimawk hi. Tua amanthangcip, aki mukhiazo nailo tepen leisung ah aki vulhnelhcip khawngzong hithei a, ki lunghimawh mahmah hi.

Rescue Team te’n ahihleh zoncitak in zongkawikawi in, Operation khawlbawl cih omlo hi. Ahi zongin amuhkhiat sunsunte pen anungta kuamah omnawnlo, asisa vive in ki mukhia cihi. Ahi zongin amangthangcip tepen lametna lianpi tawh kizongzonglai, anungtalai in muhding ki lamen mahmah cihi.

Manila City panin 500 Kilometer (310 Mile) agamlakna aom Biliran khuasung ah mencim leitolh “landslide” tuamtuam hangin innbup in aki vulhnelhcip tampi omhi. Tuate pen Bulldozers tawh ki nilkhia in, amangcip te kizonsanlai hi. Tua khuasung bekbek paninzong asipen mi 30 bang phading kici a, amangcip zong mi 31 bang phading kici hi.

Video: Philippine storm toll rises to 43 as hopes fade for dozens missing

Philippines Government thunei te genna ah hih khuahun siatluatna hangin ataikhia, belhbuk tuamtuam ah aompen mi 100,000 valbang hi a, tuate lakah alangbangpen tudongmah Evacuation Center ah omlai, kikemlai cihi.

Tua belhbuk aom tepen Christmas hun hongtungding hita a, amau ii Christmas zatziading ih ngaihsutsak ciangin lungzuanhuai, khasiat huai mahmah hi.

Philippines gampen leitung ah tuahsiatna atampenpen “disaster-prone areas” inzong aki ciamteh gamkhat ahihi. Philippines gamsung ah mihing Population akigawm in 100 Million valbang aom hi a, kumsim in Typhoon leh Storm huihpi guahsia akigawm in 20 vei bangin nawkden hi. Atamzaw pen Pacific tuipipan in anawkphei ahihi. Sawltak #zomidaily