Dimno’ Nu laikhak – 5

Dimno’ Nu laikhak – 5

Kongit Dim,

Dim, nung in ka lutang khawng napian na cih noptuam hi niteh maw! Kei zong tua ni a ngakmeel lo, nasep zong akuan zolo hi veng, a zingciang bel hoih pah sam ing, na aw nem ka zak ma’n ai tam thei sam keng!

Tukum ei kiang ah Khuado Pawi pen kum dangdang bang lo-in nasia tak in ki bawl ding cih tunung laihawm ah mu veng e! Hampha hang ei mate! Hih ci bangin a vaihawm khia khuasung upa-makai te leh hausa te geel siam sa mahmah ing. Amau hangin kei bang angtang tuam mahmah ing. Pawi vai i gen leh ka phawk vat khat hong om in gen kizom lo-in hong gen dihdih ning! Thangpi te unau zong Khuado pawi ah a lawmte teng tawh Aerobics laam alaam dingin ki teel ci hilo hia!

Laam sinding paulam in vedio zung, kunza sai mai teng peuh, lamdung teng khawng ah avakvak i lawmte i thei sa hi ven. Tua bek tham loh laamsiam in laam tawh anneek zonna in anei ei zomi sung bangah ka theih khialh ai kei leh om nai kei hi ci ing.

Laam piah (lak) cih thadah in nidang in ei pawlsung bangah pawlpi mite khatpeuh khuasung ah nitak vak kawm sa-in guitar tum a lasa aom leh pawlpi thukhun tawh ki zui-in tua nu/pa pen pawl pua lam ah aki koih ai aw! Banghang hiam cih leh tua hun lai-in guitar cih te pen khuasung mi gina lo tengin tum in, lamsak lamkhang ah zu nekna sa nekna mun ah tum uh in, sun leh zan nangawn phawk lo-in om uh! Laam zong pen ei tapidaw te ading hilo, lawki te bek alaam ding uh hi ci-in biakinn sung ah ki deih lo, zat ding phal peuhmah lo hi ven! Tun ahih leh bel biakpiak na sungah guitar lo, laam lo tawh biakpiak na aom zolo liang ding bangin hiven…kei zong nidang hun mah pom lai hi ding ka hiam biakpiak na sungah laam lahna aom nak leh bel minute khat sung nangawn a lusu man liang hi’ng. Kong cih takpi hi. Ei i neulai in mipi mai khawng a lasak, mipi mai a din, mipi mai khawng a pai cih pen humpi sahang kihtaak a aki kihta hiven, ahi zongin tuhun naupang te bel popular nuam lua in mipi mai tata, alawm agual te mai tata ah kilang nuam sese ve un mataw! Ka deih taktak ah bel i naute aki dem ding uh Laam hi sese kei in adangdang khat hizaw tapeuh leh ut buang ing! Ai zong ei ateel leh a geel hilo mawk a maw!

Ahi zongin a laam uh ciangin hoihtak hong laamin, hoihtak hong lak thei le uh ut ing. Tuhun amau khangual alaam pawlkhat te mimai ah laamlak ci-in, peuh ki phu tultul, peuh ki sik simsim, ki mit sinsin na mun peuh nei mawk uh. Pawlkhat leuleu in alaam kawmkawm sa-in akam uh khaikhai lai mawk! Tuabang mite muhthadah mahmah ahi maw! Tuabang mite laam vetkei zaw leh hoih sa zaw ing. I naute a lawmte teng tawh alaam sin ciangin a khut vik uh, a kalsuan dan uh, alu hek dan, a awn dan nengneng a kipan ahih khempeuh uh a kituak diamdiam theih nadingin amai uh panin nang’ limtak en-in a kituak loh nate uh na hilh le cin lunggulh pha deuh ing.

Banghangin laam uuk ke’ng ci napi-in tua bang hongsawl sese ai tam na ci kha ken maw! Ka uuk loh ahi zenzen hangin Thangpi te unau leh a lawmte teng laam a kidem tak ciang un aki lak laamteng khempeuh lak ah ahoih pen ahih nading ka deihman hi.

Tunung sialsawm lai-in hih ka omna vuah tukpeng ( football ) kidemna khat na nei ung. Tua ah papi te leh tangval te kidem in kei zong papi te lam ah na ki hel ing. Ka uuk man leh ka siam man hi peuhmah lo-in, a mi ding aki cin loh man; aom loh man in a ki hel bek hi ing. Ka uuk loh dan bel tukpeng na suihnop kei leh kalkhat sung an hong ki ngawl sak ding hi hong kici le zong an ngawl ding mah teel zaw lai ning. Kong uang gen hi hethet kei! Ut lo pipi, uuk lo pipi-in kung (gawl ) ka pang hi. Ahi zongin ka ut loh, kasiam loh leh ka hih ngei loh ka paulap kei-a ka siamtheih tawp, ka hih theihtawp in kakung kapang a, ka tukpeng bawhna hangin ka kiu leh ka khuk liam lawh in, anung ah meimat lawh gawpliang hi. Hong kisial hi zenzen keng.

Naute zong kei hong sut leh laam pen ut valval kei in um ing. Ahi zongin a ut aa, a ut kei zongin kiseh khin ahih man in, asiam tawp, ahih theih tawp in asin ding uh leh a lungsim apiak ding uh pen deih ing.

A khatna ( First Prize ) a ngah pah kei phial zongin mipi mai ah khial luapluap , a khut khawng uh ki vik kha nainai in, a khe peuh uh ki kengkalh in, mipi anui nui sak, hatah a bawl, mi’ ciamnuih bawl na’ng peuh a hih khak ding pen deihkei penpen ing. Kipaakta in, “ siam gawp ei hite…amau tawh ki tuak kei tak ei…ka up mawh loh penpen te heuh hong kimang thei penpen uh ei…” ci-a mipi te aki kupsim ding uh a kawm khat panin zasim nuam ing.

Hongit den,
Thangpi’ Pa

By,
Pau Khan Kap
11 October 2010