Lai tawh Pasian na sepna ~ Jacob Mung

Lai tawh Pasian na sepna ~ Jacob Mung

Pasian thuthuk a thei mipil misiam Thomas A Kempis in lai tawh kisai hi bangin gen ngei hi. “Tuisik haikhat piakna tawh thaman ngah ding ihih leh tawntung nuntakna a pia ding laibu a veng a pam, a lawm a gualte khut sungah a tun nading a semte in thaman ngah loin omthei ding ahi hiam” ci ngei hi. Hih in eite ading a ngaihsuthuai mahmah thu khat ahi hi. Lai nasepna in Pasian’ teel (elect) le sap (call) mite sep ding ahi hi. Lai nasepna a thupizia a nuai-a bang ahi hi.

Thu Khatna: Pasian in laibu thupisa hi

I Lai Siangtho mahmah pen “Laibu”, “Laizial” cih bangin Lai Siangtho bu 34 sungte ah 180 vei bang kimu thei hi. “A kigelh mah bangin” “hih thute gelh in” cih bang kammalte 400 vei bang kimu hi.

A beisa thute, tuhun thute le mailam hunte tawh kisai thu le late laibu ah kiciamteh hi.

Piancil 5:1 “Hi laibu in Adam khang tangthu kiciaptehna hi” ci-in gelh ngeuzen hi. Mangmuhna a lian 22 i a nunungpen tang lite sungah “laibu” ci-in gelh ngiat hi. Hihte i et ciangin Pasian in laibu ahih keileh lai nasepna thupi sa-in tua tungtawnin hong hopih hi, cih thu kimukhia thei hi.

Laibu in mite thapiakna, pilna piakna, lamlahna le thalak nading a kigelh kibawl ahi hi. Jesu in a nungzuite kiangah vantunga laibu sungah na min uh a kigelh manin lungdam un (Luke 10:20) ci hi. Cihnopna ah a kiphiat nawn lo ding, a kip, a kician thute i ciaptehna-in lai ahih keileh laibu kizang hi.

Mailam hunte tawh kisai mite in i theih nadingin Pasian in laibu sungah hong ciaptehsakin tua tungtawnin a theithei ihi hi.

Tua hi a, laibu le lai nasepna pen Pasian in thupi a sak a zat mahmah nasepna ahi hi. Tua ahih mah bangin Pasian a um mite ading lai nasepna thupi hi.

Thu Nihna: Mite lungsim zo hi

Russia gam ah communist hong kipatkhiatna makaipa ahi Lenin (amin taktak pen Vladimir Ilych Ulyanov) in mipi kikhopna mun 20 ah thu ka gen sangin hih laidal khat hawmkhia leng ka thu in bunzaw ding hi a cihzah khatin, 1907 in mi 17 tawh communist upna hong dinga, 1917 tak teh 40000 ngahta hi. 1990 Berlin kulhpi hong kicip taktak ciangin leitung bup ah mi 5 ah 1 communist upna nei mawk hi. Communist upna a pun a khan nading Soviet kumpi in kum khatin sum dollar trillion thum bang zang ziahziah ngam mawk uh hi. Pasian thumaan a thei, a nei thu-um mite in hihte nasepte tungtawnin ngaihsuthuai le sep le bawl ding a thupitziate phawkhuai mahmah hi.

A beisa kum 150 kiim pawlin American mi Daniel Webster in hih bangin gen ngei hi. “Hih gam sungah Pasian thu in hong zel lo hileh siatna in bangci bangin mun la-in gam sungah siatna om ding cih pen kingaihsun thei hi” ci ngei hi.

Ngaihsut piakna, upna thute telsak theih nading lai nasep in a kicianpen le a muibunpen ahi hi.

Thu Thumna: Tangthu Kikhelsak hi

Laibu hoih i cihte in tangthu kigelhna cih bang bek hi loin mite ngaihsutna puahpha in, kikhelsak hi. Leitung tangthute sim lehang Thuciam Lui sunga Josiah, Thuciam Thak sunga Jesu cihte a kipan a hunzui-a kikhelna lianpite in lai nasepna hang ahi hi.

Tu khanga mite ngaihsutna, upna, uplohna, kikhelna a bulpi in lai nasepna hang ahi hi, ci-in Billy Graham in gen ngei hi. Laikung in namsau sangin vanglianzaw hi, cih paunak in manpha mahmah hi.

A thu a la tomno khat hiphial taleh a deihna, a khiatna kicing le thupi mahmah ahihlam i theih ding thupi hi. Lai Siangtho sunga Topa thungetna, Mualtung thuhilhna cihte in hong bun mahmah hi.

Europe gam sungah Nazite hong thahat tak uh teh, Mangkang mite patau lunghimawhin a om laitakun Winston Churchill in “hite i tuahna mun khempeuh a mual a guam ci loin do ding hanga, lel ngei lo ding hi hang” ci-in a hanthohna lai tawh gelhin hawmkhiatna tungtawnin a gam sungah kikhelna hong om hi.

A kigen thu late lai tawh ciamtehin sepkhiatna tawh tangthu kikhelsak zo hi.

Thu Lina: Nuntakna Kikhelsak hi

Biakna laibu tungtawnin a piangthak mi bangzah om ding cih kisim zo lo ding hi. John Wesley in Luther’ laibu gelh Galati Hilhcianna tungtawnin kikhel hi. John Newton in salzuak nasep semin tembaw tung a tuan laitak, Thomas A Kempis’ laigelh Khris limpha ciinnal (The Immitation of Christ) laibu a simna tungtawnin piangthak hi. Hudson Taylor in biakna lai a simna tungtawnin piangthak hi. George Mac Donald’ laigelhna tungtawnin CS Lewis hong kikhel hi. CS Lewis’ laigelh Mere Christianity laibu tungtawnin Charles Colson piangthak hi. Sadhu Sandar Singh in Thuciam Thak a simna tungtawnin piangthak hi.

Tua hi a, tuni a kibawl laibute tungtawnin a hong tung ding kum 10 le 20 sungah gahpha kimu thei ding hi.

Thu Ngana: Pawlpi Kilamsak hi

Thuhilhkikna 31:9-13 sungah, Moses in thukhamte gelh in, Israel mi Siampite le makaite tungah, “Hih thukhamte, kum 7 a cin simin mite kaikhawmin mipi (numei naupang a kipan) tungah na simkhia ding uh hi. Tua hileh a tawntung Pasian thugente za-in zahtak zia ding a thei ding uh hi,” ci-in vaikhak hi.

Khang khat khit khat Pasian thu tawh mite khangto-in a picin nading laibu in a kul le a kisam mahmah ahi hi. Martin Luther in kipuahphatkikna nasiatakin hong bawlnate ama’ gelh laibute tungtawnin Europe gam sungah hong kizel hi.

Pasian’ Kammal Lai Siangtho hitale, upna laigil tawh kisai laibute hitale, Pasian nasemte tangthute le kha lam tawh kisai laibu, Magazine ah thului hoihte tungtawnin thangahna le kipuahphatna thalakkikna hong piang hi.

Thu Gukna: Sawtpi Kimang hi

Campus Crusade for Christ a phuankhia Bill Bright in hih bangin thugen ngei hi. “Thugen ding le laigelh ding hong kiteelsak hileh laigelh ding teelzaw ding hing. Banghang hiam cihleh thugen pen kimangngilh ziau-a lai ahih leh sawtpi nungta hi.” ci ngei hi.

Lai nasepna in sawtpi kimang hi. Khatvei a kibawl nakleh kimangsuak pah lel hi. Thu le la a ciaptehhuaite lai tawh kiciamteh tangtang hi. Lai Siangtho sungah zong hi bangin hong gen hi. “Lai tawh kiciamteh leh a thu kikhel nawn lo ding hi (Dan. 6:8)”.

Mite in thu a gen uh ciangin ut bangin pau gawp thei uh a, lai tawh ciamteh ding a kicih ciangin a khialhloh nadingun kidawm mahmah uh hi.

Puritan’ laigelh Thomas Brookes in hih bangin gen ngei hi. “Thugenpa in a gentheihloh hangin laibu in mun khempeuh ah gen thei hi. Hangsan takin gen ngam hi. Tua ban ah thugenpa a sih ciangin ah zong gen lailai ding hi,” ci hi.

Thu Sagihna: Mite a lunglut ciang bekin thugen pan hi.

Laibute a kikoihna mun peuh ah om hithiat lelin mite in a lunglut uh teh kisim hi. A lunglut lo mite tungah zawhthawh thu tawh simsak lo hi. Khatveivei hehsak thei, a zaknoploh thute gen thei hi napi a simpa/nu tawh kizopna hoih den hi. Khatvei simna tawh a tel lote in sim kikkik thei lai hi. Gal le sa hangin Serbia gamsung kisiacip zihziah hi. Tua gam ah gal a ven khit a sawt loin Pasian thu-um mite a zahnih kibehlap hi. Serbia Pastor khat in a genna ah,”Ka gamsung uh ah Pasian thu-um mi tunai-a hizah ta hong kibehlapna pen a beisa kum 500 sunga kihawmkhia laibu zah tunai kum 5 sungin kihawmkhia zo ahih hang hi” ci hi.

Thu Giatna: Pasian nasepna khempeuh panpihin huh kawikawi thei hi.

Radio, TV, Mi cimawh huhna, Thugenna, Thuhilhna, Pawlpi phuhna, Counseling bawlna cihte ban ah Pasian nasepna a kici khempeuh lai nasepna tawh nasiatakin kisemkhia thei hi. Nasep kipatma a thu a late zaksak kholhna, nasep silbawlzia le nasepna khempeuh a nungzui dingin lai mah tawh kician takin kisem thei hi.

Thugenna thupizaw maw, ahih kei leh lai nasepna bek mah thupizaw maw cih dotna ah vanleeng in kha (wing) nih a kisap mah bangin a niha kisam tuak ahi hi.

Khris Pawlpi a khantoh nading, a picin theih nading le gupkhiatna thupha mun khempeuh ah a kizelh theih nading lai nasepna in a kisam mahmah a thupi mahmah nasep ahi hi. India gam sungah Pasian thu-um mi a tawm mahmahna mun khat ahi Orissa ah mite hong kikhel theih nadingin lai nasepna tawh nakpi ka hanciam uh hi, ci-in Amar Jyothi in gen ngei hi. Lai nasepna in mite ading phattuamna, kikhelna, khantohna le picinna neih theih nading ahi hi.

Thu Kuana: Pasian nasepna tangzaisak semsem hi.

Thugenna, thuhilhna i cih in mikhempeuh septheih hi khin lo hi. Ahi zongin mi khatpeuh in laibu hawmkhia thei a, tua tungtawnin mitampite in phattuamna ngahlawh uh hi.

Pasian mizat mi minthang tampite thugente zong kiza kim zo lo a, ahi zongin amau thugente laibu-in hong kibawl takteh tua thuphate tungtawnin hamphatna kingah thei hi. Lai nasepna in khuapi sung bek tuh loin khuaneu khuata lamdung kongzing ciangtanna om loin mun khempeuh ah phakim zo pen hi.

Thu Sawmna: Leitungbup ah lungdamna thu kizelsak hi.

Thu-um mite khempeuh in i theih le i zuih ding thu in,”Note in Jerusalem, Judea gam, Samaria gam le leimong dongin ka teci na hi ding uh hi (Sawl 1:8)” cih kammal phawk den ding hi hang.

Canada gama Pasian nasem minthang Oswald J Smith in leitungbup ah kum 50 val gupkhiatna thu a tangko khit teh “leitung bup ah Pasian hong Gupkhiatna thu a kizelh theih nading lampi khat bek om a, tua in lai tawh sepkhiatna hi” ci-in hong pulak hi.

US center for World Mission pan Pasian nasepna ah a thupipen in banghiam ci-a dotna a kineihna ah Lai Siangtho le lai tawh nasepna mah in muibunpen thupipen hi ci-in Pasian nasemte in kithukim diam uh hi.

Topa Jesu’ Lungdamna thupha leitungbup ah mi khempeuh in a zak theih nading Pasian zat pen khat in “lai nasepna” ahi hi.

Tua hi a, Pasian gamlelei a kikek semsem theih nading lai gelhna, lai bawlna, lai hawmkhiatna le lai simna ah mapang khawma i sep kim ciat theih nading deihna le lametna tawh hih thu sawmte kong gelhkhia hi. Hih thului a simkha a kua mahpeuh i biak Pasian in thupha hong pia hen la, lai tawh Pasian nasepna ah Khris le a Pawlpi a kilamthak nading a khantoh nading a pun nadingin lamkhat teitei tawh hong zang kim ciat ta hen. Amen. Jacob Kham Khan Mung (CLC, Yangon)