Malaysia sangnaupang khatin RM1 atopsawm leh hawkguam ah awk

Malaysia sangnaupang khatin RM1 atopsawm leh hawkguam ah awk ~ ZD

Malaysia, Klang vengah sangnaupang khatin asum RM1 hawkguam sungah kiatsuah ahih manin, atopsawm leh awkcipsuak cihthu zanni in New Starits Times pan kiza hi. Asum kiatsuahpen pekkhatbekbek hi a, ahi zongin tua pekkhat akiatsuah atawmkikding in akithawina panin hawkguam sungah awkcip hi.

Sangnaupangpa in hawkguam sungah ki awkcip theizah liangdingin mukhollo, ngaihsun khalo ahih manin, asum kiatsuah atopsawm hi a, apaikhiat theihnawnloh ciangin Fire and Rescue Services Department te kisam hi.

Sungai Pinang Fire and Rescue Department pan thunei khat ii genna ah hih naupangno pen kum 8 hipan a, moh leinading in aneih sunsun sum RM1 kiasakmawk ahih manin, atopsawmna panin a awkcip hi ci’n genkhia hi.

Hawkguam sungah alutlam in lutthei himahleh apusuah kiksawm ciangin awkcip cimawk hi. Tuapan in sanginn pan thunei te’n thei uh a, Firemen te kiangah huhna ngetsakpahthei bilbel uhhi.

Firemen te hongpaipah himahleh hih naupangno pen hawkguam sungah Minute 15 sungbang awkcip khaman veve hi.

Firemen te hongtun ciangin hawkguam atungah akisin sikzawl te lakhia uh a, tuapan in naupangpa honkhiathei uhhi.

Firemen te genna ah naupangpa pen bangmah liamna neilo in, sanginn thunei te tungah ki apkik cihi. ZD Sawltak #zomidaily