Kata aw, inn ah hong ciahta in

Kata aw, inn ah hong ciahta in

Nu’ te Ni hong nai ta in, kaphawk mahmah Zogam la bupi, Lengtong Pauno la khat a hi ” Kata aw, inn ah hong ciah ta in hong ci, hong hil ngei kei ning ei ka Tuunu’ aw khawm, ka bil sung ah ka Tuunu nem in hong sam ciaiciai ka mangngilh thei lo hong it ka Tuun Nu….” Zomi la phuak siam te sung pan Nu te a ki phuak la te lah ah a ngaih mahmah khat in ki hel ding in ka um hi. Kawl la phuak siam minthang khat a hi, Htoo Ein Tin in zong, Inn ka ciah lo lo kum thum sawt ta hi, Ka mawh na te hong mai sak in la, ka Nu khiang ah kong ciah ding hi cih la zong a khiat na thuk sa mah mah ing.

Ei Zomi te tampi tak Nu te inn, Nu te khiang pan kum thum val a ciah lo Zomi ki tam mahmah ding hi. Nuntak na hamsa ki sa tek in’ mun tuamtuam ah Zomi te ki zin khia hi. Inn a ngai lo ki om lo ding hi napi in, Inn a ki ciah zolo hi zaw hi. Khangno laphuak siam Tg Vai in zong Nu’ Inn mah nuam hi, ka Nu inn mah lungnuam na hong pia cih in la hoih tak na phuak hi.

Nu’ te itna la tam pi tak ki phuak ki sa in himah leh Nu’ te hong itna teh pih thei lo in lian zaw, thuk zaw lai hi. Tua mah bangin, Nu te inn leh Nu te a ngai lo kua mah om lo ding hi.

Tangthu kaphawk khat, nidang lai in, Vietnam tangval khat USA ah sum tha lawh ding in vapai in, kum tampi va om hi. Inn a, a Nu zong sum kha sim in khak den hi. A Nu in ngai lua a hi man in hong ciah in ci in, vai khak zel hi.

Kum tawm vei khit ciang in tangval pa zong a Nu’ khiang a va ciah le a Nu na si khin ta in, a Inn vuah a ma sum khat te, a khak zah a Nu in zang ngam lo liang in a koih na mu hi. Nu’ ten sum ki sam kha mah ding hi, a hi hang Nu’ ten sum sang a tate uh hong caih leh ngai zaw ding hi. Ih Nu te in hong sap ciacia beng kha in zamah le Nu’ te Ni in lungzuang tak in a om Zomi te a ding in hong thei siam un.

Indai gam Nagaland State Kohima khuapi sung a World War 2 hun lai a a si galkap te han mualsuang tuang a, a ki gelh lai a pai ngei ten ih mukha ding hi.Tun mun ah bang ki gelh hiam cih leh,

“When You Go Home, Tell Them Of Us And Say, For Your Tomorrow, We Gave Our Today” Galkap ten a mipi te mai lam a, a nungtak thei na ding in, a mua hih na sup lawp in gal phual ah a nungtak na uh pia hi. Ei Zomi te zong tuhun a ih galpi a hi, sum le pai ham sat luat man in sum nu sum pa zong in, Zomi te mun tuamtuam ah, ki tung koikoi hi. Zomi sung ah Zogam pan a zin zawh Inn a ciah nai lo ki tam peuh mah ding hi.

Ciah nuam lo maw, ciah zo lo maw, ciah sawm lo maw, a hang tampi te lah ah, galphual a, a nungtak na apia kha a, a si te mah bang in, ei Zomi tam pi numei pasal in, Inn lam a U te Nau te Nu le Pa te innkuan pih te khual na tawh sum zong na gal do in gal mai nawk ki tam mah mah hi. Nu’ te sap na aw, “Kata aw inn ah hong ciah ta un”, cih za mah ung, Nu Inn mah nuam hi, cih ciang ko ciah zo tam maw Zogam aw. Topa’ Nu te khempeuh le a tano teh khem peuh thupha hong pia ta hen. Happy Mother’s Day! Kap Cin