Dimno’ Nu laikhak – 12

Dimno’ Nu laikhak – 12

(Lungdam Bawl)
Zingsang khuadam sa pipi mah in tho in Topa Jesu hong suak kik ding sa-in innmai aom i bawngkuang sung khatvei en ngei ta zen ing! Tua hun lai-in ke’n bawngkuang sungah hong suak takpi ding asa hivengh. Ahi zongin khua ka theih zawk deuh ciangin Jesu pen tuma kum tampi lai-in eite gum khia dingin Behlehem khua bawngan nekna kuang sungah mi bangin hong suak khin a na hi lam thei kik pan tazen ing ei, Dim!

‘Tukum lung dam bawl pen Pasian in hong thukim pih leh kumdang bang lo-in nuam in teh’ nong cih ciangin kalung hong nuamsak mahmah hi. Tukum in a thak in Lungdam Bawl ah i lungdam takpi ding lunggulh ingh. Nang’ na ngaihsun kha ngei tam maw! ‘ I Topa Jesu in leitung ah mihing bangin hongpiang in singlamteh tung sihna hong thuak pen, mawhna tha manin sihna hong thuk hi masa zenzen lo hi! Nang le kei hong itluat manin leitung ah mibangin hong piang a, ei sih ding tangin sihna hong thuak hi zaw ahi aw.’

Hih thu hangin lungdam in kipaak takpi ni! Ei innkuan in Lungdam athak in ko pha mahmah dihni! Tukum in hong suak ding Gumpa lungdam takin dawn dih ni! Ken nidang in Lungdam Bawl ciangin Tedim labu ( laimai – 79 ka theih khialh kei leh ) sung a,

♪ Leitung lungdam, Topa hong pai,
Kumpi za ngah ding hi.
Lungsim khempeuh bawl phat sak hi.
Van leh lei la sak ngai, Van leh lei la sak ngai
Van leh, van leh lei la sak ngai. ♪

♪♪ Leitung nuam na’ng Jesu mang hi.
Mihingte’n la sa hen.
Lo lai tuipi, suangpi, mualpi’n
Kidem in ham uh hen, Kidem in ham uh hen
Kidem, kidem in ham uh hen. ♪♪

cih la akisak den pen, ‘bang hang a hih la khawng ki sasa hi dia leh’ ci-in ngaihsun sun hi vengh! Ahi zongin tuin ka ngaihsut kik ciangin Leitung ah Jesu hongpai pen, ‘Leitung a lungdam ding mah, Suangpi Muanlpi te, Singkung lopaa te leh leimi teng zong nuam in, lungdam in a kipaak ding mah na hi mawk hi!

Banghang hiam cih leh eite hong gum dingin Pasian takpi leitung ah mi bangin hongpiang in, hong itluat manin sihna panin i suahtak theih na dingin eite’ tangin Calvary mual singlamteh tungah sihna hong thuak liang hi ven! Akua ta, lungdam lo-in om mawk ding ahia!

Lungdam in kipaak in! La ngaihte sa in, lathak tawh hong suak gumpa ‘Lungdam Bawl’ ah vadawn in va pahtawi dihni!

Thangpi nu, kua in hih mikang lai a, ‘Christmas’ akici pen ei lai-in ‘ Lungdam Bawl’ na ci sese ahi tam mate!‘Lungdam Bawl’ taktak mah hi mawk ei! Nidang, hun dangte ah zong i lungdam ni, i nopsak ni om tekin pawi lian pipi te zong kham ngei tekin nuam samah hang! Ahi zongin tuabang ni te pen ‘lungdam bawl ni kici lo-in, lungdam bawl kha zong kici tuan selo hi.’

Jesu hong suah ni leh kha te pen ‘ Lungdam bawl Kha, Lungdam Bawl Ni’ ci-in min i vawh sese pen hisa lua mahmah ingh! Man sa zungzung mai ing!
“ Lungdam, Lungdam bawl hong tun kal ding ngak lah zungzung ing!

Dim aw, tukum i dah i kah nate, i gentheih i haksatna teng tuin puan bangin suah khia in, lungdam kipak in hongsuak ding naungek ahi, ‘lamdang thulak Pa, Vanlian Pasian, Tawntung Pa, Nopsakna Kumpi,’ vadawn ni!

Ahi zongin tukum ko hitak ah bel sum mah deihin migam milei ah apai hiphotphot i hih manin kapute un “ tukum na Chirstmas uh nuamtak dawn un la, tuni tawlnga un” ci-in hong khawl sak kei buang le bel a tawlnga lo ding hi mawk ung ei! ‘ Tawlnga kei nung, Off kha kei nung’ ka cih hangin lungnop loh na-in na nei peuhmah kei un maw!

A tawlnga hit hiatding, Lungdam Bawl leh pawi tuamtuam ava bawl dinga gamdang ah ava pai hilo ka hih manin kei leh kei zong kizo mahmah ingh! Inn ah i Nu leh i Pa leh i khuazang in nuamtak leh lungdam takin na dawn thei peuh le uh cin pha zo! Ke’n hihtak ah nasem lo-in tawlnga in ka dawn sangin ka lungdamna, ka nopsakna zong lian zaw lai in cie!

Tawlnga thei leng bel a nuam penpen, a hoih penpen ding himah na ven, ahi zongin tua sangin a hoih zaw anuam zaw ding ah Jesu i lungsim ah suak sakin mun i piak ding a thupi hi zaw!

Dimno’ Pa
21 December 2011
By,
Paukap