Laisimna hanga kingah hamphatna te

Laisimna hanga kingah hamphatna te

…. Laisimna hangin hamphatna le hoihna tampi kingah hi. Laisimna hanga kingah hamphatnate thu a kicingtakin a gelh ding hi le hang, laibu golpi khat dimin gelh ding om kha ding hi. Ahi zongin laisimna hanga kingah hamphatnate i ngah theih nadingin a kisam thu masa khat om lai hi. Laisimna hangin hamphatna tampi kingah hi. Ahi zongin, laisim siam le siamloh tungah hamphatna a tawm a tam kilamdang ahi manin, laisim a siam lote in laibu tampi a sim phial uh zongin hamphatna ngah tampi ngah lo thei uh hi. Tua ahi manin, laisimna hanga kingah hamphatnate i genma in laisim siamna thu tawm khat gen huam hang.

…. Laisim siamna i cih in laimal gawmsiamna le laisim manlanna hi peuhmah lo hi. Laisim siamna i cih in, laibu telsiamna a gen nuam ahi hi. Mi khat in ama nuntakna tawh a kituak lo, a kizawitawn lo laibu khat a sim hangin hamphatna bang mah ngah lo ding hi. Bang hang hiam cih leh mi khat in, na khempeuh hihthei khin ding, telsiangkhin ding cih bang om thei lo hi. Leitungah laibu tampi om hi. Tawlnga loin i sim phial zongin tua laibute kisimkhin zo ngei lo ding hi. Tua ahi manin, hun ngah lopipi a laisim nading hun napiak ahi manin, na nuntakna na maban tawh kisai laibu hoihte na telsiam ding thupi mahmah ding hi.

…. Tuma kum tul tampi lai-in, laimal le laibu cih bang om loin mihingte in thu le la khatpeuh a theihnop uh ciangin thu le la a theite kam a kihon ding bek ngakin nei uh hi. Thu hoih la hoih khat a zak ding uh haksa mahmah ahi manin a zaksa thute sing le suangte tungah kuih theih kuih mawhin ciamteh uh hi. Ahi zongin tu hun ciangin thu khatpeuh i theihnop a om leh mipil misiamte kam le muk kihon ding ngak kul nawn loin amaute gelhsa laibute tungtawnin pilna le thutheihna tampi kingah thei hi. Tua bang danin, a beisa huna thupiangte khangthakte in a theihtel theih nadingun khangluite in laibu sungah gelhin na ciamteh uh hi. Bang hanga hih thute hong gen ka hiam cih leh mi pawlkhatte in laibu lui a kici sim nawn loin khang hun a kigelh laibute bek sim nuam uh hi. Kong gennop thu in, laibu khat kum nih a phak ciang, min a neih kei leh tua laibu simtak lo hi kici thei hi. Laibu hoih i cih in a kigelh kum hi loin a sunga thute a hing, a nungta cih tawh kigen zaw hi.

…. Laibu hoih laibu minthang a kici khempeuh simkhin kei in, ci-in, laigelh Siapi, Phay Myint in na gen hi. Midangte ading a hoih mahmah hangin na lungsim tawh a kituak kei leh sim dah lel in. Bang hang hiam cih leh lunglut lo a laisimna in laisim hong thadahsak thei hi. Tua bek tham loin lunglut lo ahi manin, tua lai sunga thute in laisimte ading phattuamna piangsak lo ding hi. Lunglut lo a laisimna in a sunga thute pangpan nopna lungsim hong neisak zaw ahi manin, na lungsim tawh a kituak lo ahi nak leh bang zahtaka minthang ahiphial zongin sim kei lel in.

…. Laisimna hang kingah hamphatna thu a gen ding hi le hang, hamphatna le hoihna tampite lakah lai a sim cih ciang bek hi loin ngaihsutna tawh lai a simna ngah ding hamphatna pawlkhat cih ding hi.

1* Laimai khat kal khat

…. Laisimna i cih in khualzinna tawh kibang hi. Laimai khat na sim simim na lungsim le na ngaihsutna khual a zinkhia hi pah hi. Laimai khat kal khat bang hi a, laibu khat ciangin mun khat, khuapi, khuano khat, cih bangin khual a zin kawikawi tawh kibang hi. Tua khualzinna ah na muh thute in na hamphatna hi pah hi. Bang dingin khualzin na hiam ? ( Bang dingin laisim na hiam?) Muhna tangzawisak nading tawh khualzin ( laisim) na hi leh tua hamphatna bek mah ngah pah ding hi teh. Ahi zongin phawk ding a thupi mahmah khatah, laimai khat le nih, ahikeh laibu khat le nih simna tawh khuamuhna tangzai na kisak khak ding kidawm in. Tedim gam sunga pheklek mi khat na hi phial zongin, Zogam sung, Chin pine sung, Kawlgam sung le leitung kimkot cih bangin a banbanin na kot kawikawi zawh nading hanciam den in.

2* Mihingte thu a tel zawin thei

…. Laibu pen mihingte gelh ahi mah bangin mihingte tawh a kisai lo thu kigelh khol lo hi. Mihingte nuntakzia, kim le pam kep ding zia le mihingte lungsim le ngeinate laibu sungah kigelh ahi manin, laisim mi khat in a sim lo mi khat sangin mihing lungsim tel zaw tham hi. Khemna a tuak lo hi loin, khemzawhin om pakpak lo uh hi. Mite lungsim thei ahi manin, a galte le a lawmte teltakin kheltel thei a, a lawmte a it mah bangin a galte nawlkhin dan zong siam hi.

3* Muhna le ngaihsutna tangzai zaw

…. A tunga i gelhsa thu a om mah bangin laimai khat kalsuan khat bangin i gen hi. Lai tampi sim a, thu tampi a theite in thu khatpeuhah sau mi zawin tangzai muh zaw uh hi. Buaina lungzinna khatpeuh a tuak uh ciangin Laisim a thu theite in buaina le lungzinna vengsak baih zaw uh hi. Pelh theihte pel uh a, nawk nading munte ah kdawm siam uh hi. Laisimna in, na khatpeuh ah a hoih a pha hong tehkaksak thei hi. Laisimna sungah pumpi cidam’ng, sianthona le pumpi kep ding ziate thei ahi manin, cidamna zong thupisak thei pah hi.

4* Lungsim ngaihsut ding pia

…. Ngaihsutna sungah ngaihsut ding thu a om kei leh ngaihsutna hoih lo pawlkhat hong lut thei hi. Midangte thu peuh kingahsutsakin, midangte nuntakna tawh kibuai thei hi. Ahi zongin laisimna in tua banga lungsim zakzauna pan hong dal thei hi. Lai sungah thu om ahi manin lai a simte in ngaihsut ding thu nei uh hi. Lungkiatna a om ciang, a gualzosate dinmun hong phawksak, hong ngaihsunsakin lungkiat ding sangin hanciam ding a hoih zawkna hong ngaihsunsak thei hi.

5* Nuntakna khel thei

….. Laibu hoih khat in mihingte nuntakna khel thei hi. Laisiangtho tang khat a simna hangin nuntakna a hoih pen ding a hanciam nuam den zah donga kikhel ( Piangthak) mi a om mah bangin, mi pilte Paunak khat hangin a gamtat luhek a phatlawh mi tampi om uh hi. Laibu hoih khat a sim kha ngeite in tua laibu sunga thute manh teh thei lo ding uh hi. Sum zonna tawh kisai a kigelh laibute hangin a hauhlawh mi tampi om uh hi. Lungsim thapiakna laibute hangin lungkiatna pan lungkhauhna ngaha a gualzo mi tampi i za ngei hi.

6* Mi tawh kizopna siam

…..Laigelh siapite bek kampau mukpau a siam uh hi lo hi. Laisim a thahatte zong kampau mukpau sim in mi tawh kizop siam uh hi. Lai sung pan pilna tampi ngah ahi manin, a moi a ham, a zawng a hau, a pil a mawl ci loin mikim tawh kamkum khawm thei hi. Thutheih hau ahi manin, a lawm a gual mai ah zahlak ngei lo hi. Thu thei ahi manin, a khangual a lawmte thudotin om thei hi.

7* Ngaihsutna khuak hatsak

…..Laisimna in ngaihsutna khuak hatsak hi. Khuak i cih in thu ngaihsutna le lungngaihna hangin siatna piangsak lo hi. Thu ngaihsutna le lungngaihna in khuak hoihsak semsem zaw hi. Ngaihsutna le lungkhamna i khentel theih ding thupi hi. Sum bangci zon ding cih pen ngaihsutna hi a, laiba loh zo kei leng cih pen lungkhamna ahi hi. Lungkhamna in khuak bek siasak loin pumpi zong gimsak hi. Ahi zongin thu ngaihsutna in khuak hatsak semsem hi. Laisim a thahatte in a khuak uh zang den ahi manin laisim lote sang thu ngaihsut hat zaw uh hi.

8* Lungkiat natna dal

…..Lungkiatna i cih in natna khat hi a, sepna khatpeuh ah guallelhna hanga lungkiatna hi loin ommuan a lungkiatte a gennuam i hi hi. Laisimna in tua bang lungkit natnate pan hong dal thei hi. Nopna dahna ah lungsim puak zia hong siamsak thei hi. Lungsim tawng pan a pai khia hehna le kipahnate ah zong a kilawm ding bangin hong gamta siamsak thei hi.

…..Thu masa ah i gen mah bangin laisimna hanga kingah hamphatna tampi om hi. Ahi zongin laisim dah a siam le a siam lo zuiin hamphatna kilamdang ding hi. A tunga thute in, laisim mawkmawkte ngah hamphatna hi loin thu hioh thu manpha a telsiamte le lunglut taka a sim mite ngah ding hamphatna hi cih kong gen nuam hi. Tuak peuhpeuh a simte sangin a sim ding a zong, a kante in hamphatna tam ngah zaw uh a, a simkhak thu peuh a nuntakpihte sangin a nuntakpih nop thu a zongte in hoihna ngah zaw ding uh hi.

Na Zomipihte na hawmsawn in. ( Share )

Lungdam
Job cinpi
Zomi Laisim Nuamte