Dimno’ Nu laikhak – 1

Dimno’ Nu laikhak – 1

Dimno’ nu, na damdam hia? Thangpi leh Dimno te unau e, damdam in teh maw! Kei zong nomau mah nong thungetsakna uh leh Pasian hong hehpihna tawh cidamin nasem thei sam ing.
Dimno nu aw, ka khualzin ma a i thu kikupte ka ngaihsut kik khak ciang khat veivei bang ka ihmut hun ding na ngawn mangngilhin khua hong vak thei zel! Ka nasepna ah ka gim mahmah zongin ka pai ding a nong kam vaikhakte in tha hongpia-in, ka tha hong dim kik sak zelzel! Hih sim leitung ah nang a om lo hi le cin, ka nuntakna tuikhu bangin van ah leng mang khinin um mawh mai ing!

Dim, tu laitak ka omna ah thu thang mahmah khat in: Lawmte pawl khat in inn lam sum khak in, innlam te’n van gil meel suah lo-in, tangvalnote tawh sun leh zan meel phawk lo liangin mawk bei sak, cih hi ven. Tua te lak ah zong na lawmnu Lunno (ka lawm Thangpu zi) zong nasia lua ci veh aw! Kei bangin lamdang sa peuh mah ing. Amah penpen tua danin a gamtat gawp dihdih! Ka om lai in hoih cihtak a, a hoih hi ven mataw! Ngaihsun zo mahmah kei mai ing.Tua ciang, kalawm Thangpu zong hihthu bangmah theisak nai kei ing. Hih thu teng kong gen hangin, nang tua ci niteh, ci-in a hong muangmawh, a hong muang zolo peuh hong sa kei in maw! Tua danin na om loh lam tak ding kong theih a, zong kong muang mahmah hi. Kong it mahmah leh kong muan mahmah lamtak nang zong na theih khit sa hi. Ke’n zong ka omna peuh ah na vang tang in ka om den lamtak kong theihsak sa ban ah hong theisak behbeh nuam lai ing.

Dimno, tu laitak ka lungsim sung ah hong suak khat hong gen le’ng: “ I pu i pate’ hun pek a kipan, tangthu a i gengen Dahpa Khuang ee.” Tu laitak tua Dahpa Khuang a nei hi leng pawh, deihtak khat vei tumin, “ ih khua (Pyidawtha ) taw leipi gei ah hong tungsak in,” ci ning. Tua khit ciangin leipi pan in khuamial ngakin khuamial kuan sanggam meelmak hun ciangin khuanawl zui-in hongciah ning. Ih innkong kong tunciangin nidang kongciah cianga ka lut ngeimah bangin inn nung lam kahlei pan hong kah to in, kongkhak hongsim khiankhianin hong en sim ning.

Nidang a ka khualzin ma mah bangin an nekding ciang sabuai kiim tengah i tate nih tawh kuang umkhawnin an nek ma Pasian kiangah lungdam ‘na ko masa lai uh tam, cih hong ensim masa pen ning! Tua khit teh i tate lai simsakin a laite limtak simpihin nasit lai tam, cih hong en sim leuleu ning…tuabang dan in i tate pantahin na na omlai a leh bel… i tate laisimpihin na ki-umkhop laitak un, na nunguh pan damdam hong paisim khiankhain in i tateteng tawh thakhatthu-in na vek un hong kawi vatin hong nam ning….

Ahi zongin tuabang dan hilo-in hilam a ka thuzakte mah bangin nalawm Lunno tawh kong sum khak sunsun teng na-ut bang un zanghin i tate na ngawn phawk nawn lo-in, khangno vakvai teng tawh…beer…sapit wine …cih te dawnin na na om takpi vua le bel…………………………………………………………………

kei bang ci’n na mai vuah hong kilaak ngam peuhmah ding…..inn nunglam kahlei panmah damtakin tuaksuk kik khialkkhial in ……. kua ma muhloh ding mahin khuanawl mah ah pai kik in…… “ka om nalui mah ah hong kha kik oo……, ci-in ka Dahpa Khuang mah tum kik ning………………………….

Bangbang ahi zongin Dimno’ nu…tu-in ahih leh i gengen hang, Dahpa Khuang lah a om hi nawn lo a maw…. i sunmang teng bekmah hi lo dia.

Kha khat a khat vei kong hopih ciang bek tawh ka kilungkimsak kul mai ta vem maw… i veng i paam leh i khua sung teng a, a om nupi teng a sia gai phial zongin nang na siat loh lamtak ding hong thei ka hih manin ka thu zakzak te a hoihlo vive a hih hangin ka lungnuamin lungmuang takin om den ing.Nang kongmuan mahmah lam zong, kong gen sa ban ah hong gen behbeh nuam lai ing.
Hongit den,
Na U Tuang
Tuipi Galkhat pan
27 July 2010

By,
Pau Khan Kap