ZTK-2 ah Manglai hilh dinkhawlna leh ahilh te kiciahkiksakna vai

ZTK-2 ah Manglai hilh dinkhawlna leh ahilh te kiciahkiksakna vai

ZTK-2, Manglai hilh dinkhawlna leh ahilh aa ong paite kiciahkiksakna tawh kisai lungnoplohna tampi om ahihlam ka theihciang athu theih bangbang akician zawdeuh aa genkhiat ding kong hanciam dinghi.

Athu pianzawh sawt khin himah taleh, inn lam (Kawlgam) ah i omciang gamdang aa thupiangte bangmah kiza hetlo ahihman in ZTK tawh kisai genna tuamtuam, upmawhna tuamtuam, gensiatna, ko na tuamtuamte zakhalo kisuak aa migi ong tangsak tuam bilbelhi.

Manglai hilhna tawh kisai in:
1. Kua mah mawhsak khakloh ding kong thum nuamhi. Makai vaihawm lam pan kibaih ngahsut lua kha hizaw hi. Democracy kalsuanna tawh kikalsuan gige kim lai naa-le-hmuh tawh kingah lel ding sakha ihihman in ei mawhna ahihi. Kuhkalna, cihtakna, thuman gamtatna gending kimlai gamtat lui zia zongsang lua kha hizaw hihang.

Ong paiding mimal zah thu kiza khol in, hunlap in ngetna lai phahkhol lehang ahiding kimlai ol ngaihsut lua kha hihang. Mailam ah hibang vailianpi i neihciang naa-le-hmuh bek suang aa kalsuan nawnloh ding ong theisak hipahhi.

2. “Kal nih sung Manglai hilh hang bangmah siam manlo ding” cihbel mikim theihsa ahihi. Makaiteng cidam aa kimuh ding mah zong athupi hi aa kalkhat sung kimu kithuahna pan vai tampi mah kivaan man ihihman in muhtheihloh metna tampi omkhin lel hi.

3. Hibang aa huntung nailopi a sun azan aa aciah na tungtawn in naupangte bek hilo nu leh pa, khua leh tui lungtang, hehpihna kinaak ngah mahmah ahihman in, hunlopi aa aciah uh mipi lungsim kingahzaw hiam cihzah ding ahihman in kisum hetlohi.

4. Mipi mahmah inzong Zomite Zogam pan kihawl khia aa, Meiteite aa kipan minam dangte banghang kihawlkhia lohiam ong cizaw ta uh ahihman in minam vai khanlawhna tampi ong omsakhi.

5. Kawl ulian thuneite mahmah in, “No leh no kikhia, kihek se kei le uhteh, ko ong awlmawh himahmah kei ung, tu mahmah in Tedim khuasung zongphei lehang tampi a omlam zong thei ung” ong ci uh aa zum huai mahmah ihihlam ong musakhi.

6. Hibang aa mihek kua hithei ding cih mipi upmawh kibang kawikawi ahihman in, gamsung gampua mikheltatte numei naupang aa kipan mipi in athei gige hitah cih ong theisak aa, tuabang mipi gim neih lak aa i kihelkhaakloh, lungdamna lian mahmahhi.

7. Lamdang kasak mahmah thukhat kaza kha kawikawi hi. Numei naupang aa kipan athangpai, a lainat, Zomi kalsuanna tha apia peuhmah in, “Hibang aa Zomi kalsuanna nawngkai sakte thuhilh ding kisamta hi” ong ciciat uhhi. ZIS in ahihleh, ZTK kipatma Ni 40 sung tatsatlo Thungetna kineito ahihman in mihing leh mihing thuhilh ding kisamlohi kacihi. Tuabang dinmun i tun khaak ding a deihhuai hetlo ahihna zong ka genpihhi.

8. Mi tampi in hibang aa mikheltat kua taktak hiam cih kitheinuam ciat hi. Atom in genpak ding hilehang, Zomi kalsuanna tha pialote, Zomi kalsuanna amau sepbek sep a sa, min deih honkhat hilelhi.

Agamtatzia uh pilvai bilbel kasakna omhi.

Amau lian in thupuaklo in Ygn aa Kuh-muh-dra mediate thupuak masa in Ygn pan Tedim Special Branch (SB2) te thu dong sak uhhi. Tedim aa Special Branch te’n mediate’ dot ahihman in patau uh aa tungsiah ah zaksakloh pha mawh hi ong cihi.

Tedim aa Special Branch te’nbel no leh no mah hilel uhteh ong cipahlel uh aa, a mi nangawn dong lehang ong gen lelding dan ahihi. Tuabel theinuam nawn dah hang!

Kuamah in lungnoplohna. khasiatna in na nei kei un. Hih tungtang ah supna sang metna tamzaw hi. Mipi’ lungsim i ngahdan bel hazat huai liang hi. Tuabek zong hikei, mipi mahmah ki khanglo tuam mahmahhi.

I tup i ngimna sang muibun zaw ding aa Pasian ong gelsakna ahihi.
Ong hek tetung lungdam koh huai zaw ong suakhi.
hkl