University kahdingte bang Major hoihpen hiam? ~ Michael Pau

Bang Major hoihpen hiam? ~ Michael Pau

Tan 10 ongte College kah ding, sang ki-ap hun hong hita in, tan 10 ongthak sang naupangte le nulepate in sang koi ah kah ding, bang major la ding cih kibuai thei den hi. Neu pan kipan ngimna tupna kician tawh sangkah in tan 10 onga, matgawm tam ngahte, sum le pai kicinzote ahileh, amau ngimna, teelna tawh (akl) amau matgawm tawh kizui in, sang kah kiginsa telsa in nei uha, ngimna tupna kician nei khol mellote le sumlepai akipan hamsa asa piante kibuai phadeuh zel hi. Tua main mi tampi ahuam thei pen dingin major le sang teelzia ding kei muhna tawm kong hawm sawn nuam hi.

Tan 10 i on khit nak leh atungsiah Institude, College le University khempeuh pen Pilna sang sinna (Higher Education) kici khin hi. Hoih le hoih lo pen asang, a major tungah kinga lo hi. Na sin lai, hong hilhsiate siamna le deihsaknate tungtawnin nang mah teekteek i hanciamna tawh kisai zaw hi. Mi kimkhatte in, tan 10 onna matgawm tam ngah kisa pianin, tua in pilna a pia ding sa-in kisuanna peuhin nei thei mawk hi.

Tan 10 onna matgawm tawm taleh, tam taleh, a ongte a ong hi-in, Higher education (pilna sang) sinna-ah asang pen bang ciang tungzo, sinto suakzo cih hong thupizawta hi. Cihnopna ah na sang kahna inn (building) aneu alian in, pilna hong pia hilo hi. Na lak major in hong pilsak hanhan zong hituanlo hi. Na kahna sang pen bang ki-ukna Ministry nuai-ah om cih in zong pilna hong guan hipah tuanlo hi.

Pasian thugen siam Pastor pawlkhat in mi a zol uh ciang, na kikhopna pawlpi le biakinn in vantung gam hong tun ding hilo-a, na upna in vantung gam hong tun hizaw hi, a cih tawh kibang hi. Match/Phys/Chem major ka la hi ci’n kiphatsak nading om lo-a, Burmess, Hist, Zoo, Both major bek ngah ing ci’n zong lungneu ding hihetlo hi. Hong kihilh laite limtak hanciama na telsitset leh tua in pilna hong pia hizaw hi.

Na lak major bangciang lunglut takin sin zo na hiam? Bang level ciang sin zo ding na hiam cih thupi pen hi. Sang na zawh ciang, na ngah degree in bang degree hiam cih thupi pen hi. Bachelor maw Master ciang maw? Ph D ciang maw? Mi tampitak in tan 10 matgawm atamte bek i kah theih major hoih ci-a, a theih Major khat la in, Bachelor degree level ciang bek na ngah sangin, tan 10 onna ah matgawm tawm mahmah taleh, na lak major pen mite-in a niam in hong ngaihsutsak taseleh tua major ah asang pen Ph D ciang dong bang tungto zo lecin, hoih penpen hi.

Tua hi-in na tan 10 onna matgawm mite bangin a tam khol kei leh zong lungneu tuan kei in. Koi sang ah bang major la in sin ding cih na lungbuai lai hiam? Nulepate in zong asum apai ding hamsa sa in na lunggim uh hiam? Kei ngaihsutna pawl khat kong gen ding hi.

• 1. Ol na sak pen Major khat la in limtakin sin zaw in. Asang pen dong zawh sawm in.
• 2. Na uk pen Major (akl) na kingap penpen, na zawhthawh penpen major la in sin inla, zawh sawm/theihsawm mahmah in.
• 3. Kum tawm, hun tawm pen tawh Degree ngah theina teel in.
• 4. Sum bei pai bei tawm pen tawh sang kah theihna teel in.

Bang sang bang sang ah na kah zongin, bang major bang major na la zongin sang zawh dong na kahsuak nak leh na ngah ding degree (buaih) in BA, BSc, Btech, BCSc cihte hong hi dinga, tua teng khempeuh pen Bachelor level hi-a, avekin kibang, kikim hi. Apilzaw, atheizaw na uta, na hanciam leh tua tungsiah ah Master level hi-a, asang pen Ph.D (Doctor of Philosophy) hi. Bang major la ding ka hiam cih tawh na lungbuai sangin, asang pen bang ciang tung nuam ka hiam, tunzawh sawmding ka hiam cih ngaihsun zaw in.

Siavuan (MBBS) le Engineer (BE) pen paizia tuam hi-a tua nagawn zong Bachelor level ahileh Bachelor level mah hi veve a, adang major ah Master level khat sang zaw veve lai hi. Sang le major tawh kiteh lo in, Bachelor level maw, mas ter level mawh cih tawh kiteh zaw hi. Ei lam pan zong i ngah degree level tawh kituak pilna, theihna le siamna i neih ding athupi hi-a, sang man ciang nasep zonna le ngahna pen atuam khat hilai hi.

Tua manin atungah i gensa mah bangin Pilna Sang sinna ahinakleh Major khempeuh Hoih Khin hi. Mas ter level, Ph D level ciang dong i zawh ding thupi pen a, i ngah/i lak degree tawh kituak pilna/siamna le theihna i khuak sungah a om ding, i zatsiam ding thupi penpen hi. Major khempeuh “hoih khin” hi. Michael Suan Lian Pau (Consulting Editor, Siamsin Awging)