Dikna thu ahi, Diksakna le Diktanna
Dikna Thu (Justification)
Hih dikna (Justification) thu pen tatkhiatna (Redemption) thu bek tawh a piang thei hi a, tua tatkhiatna pen Jesuh Khrih le a Singlamteh thu bek tawh a piang thei ahi hi. Mi khempeuh dikna Thu kisam hi. Banghang hiam cih leh mikhempeuh migilo mimawh mikhialte ahi uh hi. Dikna ih ngah theih nadingin Diksakna Thu ih kisam masa uh hi. Hong diksak Pasian hi a, a diktang pen thu-ummite ahi uh hi.
Diksakna pen pia hi cih lahna kammal hi a, diktanna pen ngah hi cih lahna kammal ahi hi. Diksakna pen piakna thu hi a, diktanna pen ngahna thu ahi hi. Ngahna le sanna a pian theih nadingin piakkhiat kul masa hi. Diksakna ih ngah theih nadingin hong kipiakkhiat kul masa hi. Tua ong kipiakhia diksakna ih ngah theih nadingin Upna kisam sak hi. Pasian in midikin ahong ciapteh theih nadingin mihing lam panin Upna ih kisam masa hi. Lai Siangtho in tua upna nangawn Pasian’ letsong na ci hi (Eph.l 2: 8,9). Upna thu pen a um nuam lote’ adingin mawhsak nading thukhenna hi a, a um mite adingin Upna pen diktanna ahi hi (John. 3: 16-18). Upna tawh diktanna pen hehpihna hanga Jesuh’ ong tatkhiatna thu tawh a piang ahi hi. Mangpau in tatkhiatna pen Redemption ci uh a, Dikna pen Justification ci uh hi.
Tua dikna (Justification) thu sungah thu lian mahmah nam nih kihel hi. Tuate gel in Diksakna thu le Diktanna thu ahi hi. Diksakna le diktanna pen a khiatna a kibat lian loh hangin a kikhenkhia thei lo meii le guah a bang uh ahi hi. Pasian in ong diksak ciang bekin dik a kitang thei ahih mah bangin diktanna pen diksakna hang bek ahi hi. Diksakna om lo pi-in diktanna piang thei lo hi. Ei le ei dik ih kisak hangin Pasian mai ah belpuansia a bang lai ih hi uh hi. Ei le ei dikkisakna pen gitlohna ahi ta hi.
Lai Siangtho sungah kuamah midik om lo ci hi (Romans. 3: 10-12). Eite mimawh ih hi kei ih cih leh a zuau phuak ih hi a, Pasian zuaphuak dingin a bawltawm ih hih manin eite’ sungah ama’ Thu om lo cihna ahi hi (1 John 1: 10). Lai Siangtho sungah mikhempeuh in zuau a gen zongin Pasian in thumaan gen veve ding hi, na ci hi (Rom. 3: 4). Mawhnei mi ka hihi, na cih leh thumaan a gen na hizaw hi. Tua ahih leh tua mawhna panin dikna Thu na kisap lam na thei nuam hiam?
Evan. Suang Dal
Comment piaknop aomleh...