Tong Luansiam Lia Zozam – 6
Khuado sakholh honpi khat pua kawma a ciahna lampi vuah tung sunni sa in lei keu mahmah a, tong luansiam Lia Zozam leh a nu zong luitui naam na peuh ah khawl in a dangmawn uh a kawtsak zel uh hi. A tonpih tangvalno leh mi honpi pawlkhat te in cim manlo in ngaih Zozam a ciamnuih den uh hi. Khua ah a kikholhpih tangvalte, a ciah ding uh ciang khuamual tan a kha tangvalte…. abanban in ciamnuih uh a, Zozam lah Zolia lak pan kamsiam leh kamnem, kam khial ngeilo lah kuamah nolh ngeilo, kuamah lah lungkiasaklo ahih manin a no, a ciamnuihte bang a nusiat uh Khuado tangval te sangin a ngaizaw na kisa man pahpah uh hi. Tua zaha kamsiam leh melhoih Zozam hampha mah si e maw!
Khua a tun uh ciang a pa in sangkil pan a van uh na dawn a, a seng tung vuah thopi leng naunau ahih manin lamdang asa hi. A khuhna puan a hon leh Voksa thau pak sitset a mu a, a nam zong za viauviau ahih manin ‘shih’ a ci kha liang hi. “Pasal pipi kilawm kei si e” ciin a zi in na hap phei pah a, amah zong a zatep hup daldal in a gim zalo kineih in tapkha kual ah a tu suk hiat hi.
Veng leh pamte hong lengla in khut kilen in a kino ngeingai uh a, Zozam zong a kisil kawmin puansawp ding teng tawi in tuikhuk lam a zuanpah hi. A tuikhuk uh lui ahih manin a khuavengte un na ‘luikhuk uh’ ciin a ciamnuih thei zel uh hi.
Puansawpteng lusuan in hong tunga, a puansilh khempeuh kawt ningniang in kongbiangah a nu in na dawn hi.
“Nu, ka puansawp tamlua, ka pumpi, a vek in kawt khin”
“Bange, a vek in kawtkhin bang maw?”
“Ka pumpi, ka pum kawt khin ve…”
“Ahih loh a, na puansawpte a tui kang nailo hiven… pho mengmeng inla, nitak ann ne ni. Khuazing leh lengla khawng nei kha leng…”
“Aw, ann hong thuk pah daidai ning maw”
(zop lai ding)
Hau Za Cin
Phuitong Liim
Comment piaknop aomleh...