Delhdelh.. kua hiam i delhdelh mi

Mi khat a nung panin i delhteh a phazolo cihna hi aa, i delh mipa a hatzaw a gualzozaw cihna hi. Ahi zongin a nung panin a delh mipa in gensia kawmkawm leh phunsan kawmkawmsa in delhdelh hi.

Gensiatna phunsanna mi khempeuh in thuak khalo hi. Hong phawk kha mi, hong kinmi ten i thu hong theihna dingin kantel uh aa, ama’ sangin a sangzaw in hong muhteh hong gensia bek hi. Awl mawh tham i saklo mite ki awlmawhlo in ki gensia ngeilo hi. Ih gensiatloh mi khempeuh awlmawh thamlo cihna hi khinsamlo hi. Khasia pahken cihna sungah, “Hong ki hazat leh mi lawhcing hiteh, hong ki gensiat leh hong ki phawk den cihna hizaw hi”,cihi.

Saul in David thah dingin delhdelh hi. Ahi zongin David in a lauhman leh a guallelh manin a taitai hilo aa, Pasian sathau nilhpa a suk khaklohna dingin David a tai hizaw hi. David in thatnuam hileh thahna ding hun tampi nei-in thatzo lualel ding cihna hi. Guallel dan khat in i taitai hangin a gualzolua ki hi thei hi.

Tai ki demna khat ah a nung panin a delh delh mipa a hatzaw hi ngeilo hi. Leitung nuntakna sungah khantohna ding, ahoih nuntakna ding tawh ki sai-in Tai ki demdan tawh ki bang hi. Tua sungah hong ki gensia leh hong zahpih mi aom leh i nung panin hong delhdelh mipa suak hi. A ki samlopi in ko siatna leh hoihlohna mite’ hong genna tawh thanem in vulding hilo hi. Topa tungah lungdamko in maban limcii i neihte zomto ditdiit ding hizaw hi.