ZAM Thupuak :: 12 Aug 18 (Zomi Khuado 2018)

MAPANG KHAWM NI ZOMI KHUADO 2018 :: Zomi Khuado pawi bawl ding tawh kisai in 08 August 2018 (Wednesday) ni-in ZAM zum ah thudotpi te tawh kikup khopna kinei in, Zomi Ngeina Khuado Pawi limtak bawl dingin thukimna kinei hi. A mun dingin Zomite Khuado Hall, Chin Woo Stadium mah ki kipsak hi. Khuado pawi nasiatak a bawlna dingin sum leh pai tampi hong kisam ahih manin muanna leh lametna lianpi tawh Khuado Committee in anuai a bangin mapang khawm dingin kong zawn uh hi. 1. Khua kipawlna pan RM200 pan a tungsiah, 2. Biakna pawlpi khat ciang RM300 pan a tungsiah leh 3. Khua kipawlna leh Pawlpi panbek hilo in, mimal in zong ma ih pan khop na dingin kong ngen uh hi. Khuado ni dingin 15 October 2018 (Monday) ni dingin kikip sak hi.

Zomi te kumkhen Khuado pawi ah Malaysia leitang tung a om Zomite khempeuh khatzong pelemlo a, ih kihel kim theih nading deihna tawh kong theikhol sak uh hi. Tuasung ah Zomite maban ding thugenna, Zomi Idol Malaysia 2018, Laam tuamtuam, lasaknate a kipan kivakna/talent show tuamtuam zong om ding a hihmanin khuahun sia leh thusia tuamtuam te tawh kipelh nadingin thungen ciatni. Zomi Khuado pawipi muakna in ih neihngei sa mah bangin in Zomi League kimawlna zong om ding hi. By: Khuado Committee 2018

Zomi Khuado 2018 Committee teng

• 1. President : Sia Daniel Vum Khan Mung
• 2. Vice President 1 : Rev. Go Za Suum
• 3. Vice-President 2 : Rev. Thang Do Khen
• 4. Secretary : Sia Kap Za Khup
• 5. Joint-Secretary : Tg. Thang Lam Cin
• 6. Treasurer : Sia Joseph Tuangpu
• 7. Assist-Treasurer : Sia Pau Sian Piang
• 8. Accountant : Rev. Thang Za Cin
• 9. Accountant 1 : Rev. Rev. Tuang Lian Khai
• 10. Auditor : Rev. Gin Khan En
• 11. Auditor 1 : Rev. Khen Za Dal

Members

• 1. Rev. Gin Do Khup 8. Rev. Dai Sim Mang
• 2. Rev. En Cin Pau 9. Sia Gin Go Mang
• 3. Pa Thang Za Khai 10. Sm Lucy Ciin Za Cing
• 4. Sia Thomas Piang 11. Sia Cin Hau Tuang
• 5. Rev. Ngin Khat Thang 12. Sia Kam Sian Mung
• 6. Rev. Thawng Khan Sut 13. Sia Hau Thang
• 7. Sia Pau Khua Muan Lal

ZOMI IDOL : Kumsim ih neih ngei sa om mah bangin Zomi Idol zong tukim kinei ding a, hih Zomi Idol tawh kisai in hong makaih sak dingin

• (1) Rev. Thawng Khan Sut – 016 6443 011
• (2) Rev. Gin Khan En – 017 3342 760 te muanna tak tawh kiseh hi.

ZOMI LEAGUE : Ih bawl ngei a om mah bangin Zomi League 2018 zong nopci tak in kibawl ding hi. Hih Zomi League ah hong makaih sak dingin

• (1) Sia Pau Sian Piang – 016 3185 296
• (2) Sia Thomas Piang – 018 3566 881
• (3) Sia Gin Go Mang – 018 2021 216
• (4) Sia Kam Sian Mung – 018 3122 957

Zomi League tawh kisai min sazian pia nuamte in kipia thei ta a, a tunga siate kiang ah kipia thei ding hi. Dot nop tuamtuam te zong kidong thei ding hi.

MIPI KIMUH KHOPNA KINEI DING

Zomi Innkuan USA (ZIUSA) Executive Director Dr. Do Khan Khup pen Malaysia om Zomi te hong van dingin hong pai ding ahihmanin Malaysia om Zomi te tawh kimuh khopna leh kam kikupna a nuai a hungelna bangin kinei ding hi. Hih kimuh khopna leh kam kikup na ah Pawlpi sia te, Khua makai te leh mipi a lunglut khempeuh nong pai kim ciat na ding uh kong sam uh hi.

• Ani : 16 August 2018 (Thursday)
• Ahun : 1:30 PM – 5:00PM
• Amun : ZAM Hall

UN CARD RENEW TAWH KISAI

August kha ni khat ni pan kipan in UNHCR zum ah Card renew (Tettan tuu) na pai ciangin ih gengen sa om mah bangin teelna nam (2) sung pan khat hong telsak ding uhhi.

Teelna (1) Hih na teel leh 31 December 2019 dong na card hong renew sak dinga, ahi zongin 31 December 2019 pan kipan in UNHCR te mi kahinawnkei ding hi cih lungkimna suaikaih (Signature) hong hih sak ding uhhi. Kum khat leh kha 5 sung khawng UNHCR misuak lai ding cih na ahihi.

Teelna (2) Hih na teel leh appointment laidal hong pia pah ding uh a, tua zui in interview phi kik kul ding ahihi. Kawlgam ciah kik theih lohna, galtai hih na cih te amau thukhun a huam dingin ih phi theih ding kisam ding a, tua dan ih phi theih leh UNHCR card hong pia kik in gam 3 na lam kizom thei ding hi. Ahi zongin UNHCR card ih ngah cil hun lai ih interview tawh hong kibang khollo ding a, ei lam pan thu leh la tampi tak kician takin ih gelkholh ding thupi ding hi. Amau thukhun sungah ih lut zawh kei leh hehpih ngetna lai khat vei ki at thei lai ding a, tua ah zong ih lut zawh tuan kei leh UNHCR tawh kisai nawnlo kihi pah ding hi.

Ahi zongin hih sungah Pipe Line sung a tungsa te kihel lo ding hi. Zomi pih akua ma ciatin ih mailam ding hoih tak ngaihsun kawmsa in ei mahmah lungkim takin ih khentatna lampi mah ih zuih ding hong thupi ding hi. Midang khat khentatna tawh ih kalsuan ciangin kimawh sakna leh ki khasiatna tam thei ahih manin ei ma khentatna mah tawh kalsuan ding ih ki hanthawn hi.

ZAM FREE CARD KINGAH TA

ZAM in kumsim a manngenloin ih bawl zel mah bangin Malaysia Zomi khua kipawlna makaipite leh pawlpi kem Pastor te ading ZAM card free in kibawl sak ding hi. Tua ahih manin Khua kipawlna makaite leh pawlpi kem siate in August 1st-31st sungteng nisim 9:00am-6:00pm kikal hunngahni khat peuhah ZAM Free Card nong bawl nading un ZAM zum pan zahtakna lianpitawh kong zasak uhhi. A thei kha nailo a om leh MZCA, ZCMC leh kipawlna tuamtuam te pan nahilh sawnsak un.

MyRC CARD

MyRC card abawl nuamte in ZAM zum ah min sazian kipia khol thei lai hi. A bawl sawm te in a manlang thei in sazian piak kholh ding kisam a, ZAM card a tettan om lai te bek kibawl thei ding ahihmanin ZAM card te zong hoih tak ih et phat ding kisam hi. A sawtloin sazian ki-ap ta ding ahihmanin abawl nuam/alunglut te in a man lang in ZAM zum ah sazian hong pia-in na card te uh nong sit phat nading uh zong kong zasak uhhi.

CHAMPION FUTSAL COMPETITION OM DING

Champion Youth Conference muakna in Champion Futsal Competition kinei ding a, tua sungah team (16) kiciang tan ding hi. Lut man pen team khat ciangin RM 400 ta hi dinga Champion a ngahte RM1500, Trophy leh Medal (2) First Runner Up te RM 700 leh medal, Second Runner Up te RM 300 leh medal kipia ding hi.

• Kimawl ni ding – 25-09-2018 (Tuesday)
• Kimawl hun ding – 12:00 –6:00 PM
• Quarter Final – 02-10-2017 (Tuesday)
• Kimawl hun ding – 12:00AM-2:00AM
• Semi & Final – 05-10-2018 (Friday)
• – 12:00AM-1:30 AM
• Dotnop leh kizopnang : Sia Cinpi – 017 379 1327
• : Thangpi – 016 363 9096
• : No No – 018 290 2131

SEMINAR KIKAH THEI

7-8 August, 2018 ni (2)sung United States Embassy-Kuala Lumpur te panpihna tawh TechSoup Asia-Pacific leh Yayasan Salam te kipawlin a bawl uh ahi “Strength -ening digital technology capacities of NGOs working in Anti-Human Trafficking” seminar ah Malaysia gamsung a om NGOs makai tuamtuam te tawh kikah khawm a, ZAM pan in zong hih seminar sungah kihel thei hi. Seminar bek hi loin NGOs makai tuamtuam te tawh tulaitak ih dinmun tawh kisai zong kikamkum khawm thei in mailam ah sepkhop theih ding thute ah mapang khawmin sep khop ding zong lunggulhna a neihna te uh zong hong pulak khia uh hi.

UNHCR PAN APPEAL AT DING TAWH KISAI THEIH SAKNA

UNHCR pan in interview na man khit ciang appeal letter at ding hong piak leh at hamtang ding hoih zaw hi. Ih vai khat peuh pen a tawp dong mah ih zuih tang suakna in citakna khat zong hi a, mailam hun ah bang ci ding cih kigen theilo ahihmanin lungkia pah loin at tangtang in puak hamtang ni. Mi tampitakin at hang kilamdang tuan kei cih tawh at nawnloin kilak kik na om nawnlo uha, tua sangin ih at hamtang mah hoih zaw hi. At dan ding a tello leh a thei lote in ZAM zum ah hong pai un.

ZBCM biakinn Thak

Zomi khamangthang mi mangthang te kaih khopna ding a ki phuan khia ZBCM ah nong kikhopna dingin kong zawn uh hi.

• Ki khop hun :12:30PM
• Amun :152-1-10 Compleks Maluri Jalan
• Jejaka ,Taman Maluri 56100 KL
• Grab :Evangel Christian Assembly
• Bus :U 420 YPC International College mai Meileng : LRT/MRT Maluri buta

WELCOME TO ZAM

Kawlgam, Vaigam, tuipigal leh gam tuamtuam pan Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah nong hawh/phak hamtang nading un itna lianpi tawh kong zawn uh hi.

Na UN Vai Nakan Nuam hiam?

Na UN vai lunghimawh in kannop dotnop khat peuhpeuh nanei hiam? UN Department tuamtuam ah laigelhsak nop na neih leh ZAM Member te ading mangenlo in ZAM zum pan lai kigelh sak theiden hi.
ZAM member I cihpen ZAM Card bawl ngei cihbek hi loin UN card a neih khit hang in a renew/hingsak den te pen member hiden cihna hi. Refugee na kicih sam hang UN Card naneih naikei leh UN ten kami hongci tuanlo hi. Tua a hih manin Zomi nahih leh ZAM card bawl in.

THONG LAM TAWH KISAI

Tanah Merah Ajil Camp a om Zomi thongtang mi (10) 08-08-2018 ni in Kawlgam lam zuan in ciah thei ta uhhi.

ZATO LAM BUAIPIH TENG

1. Niang Nem Tawi (Vangteh) HUKM

ZATO LAM TAWH KISAI : Zato lam tawh kisai in vai khat peuhpeuh na neih leh Contact :Sia Mungpi 018 3122 957

KIMAT KIHEN NA TUAK LEH : Zomi te sungah kimat kihenna na tuak zenzen leh hih phone no. te ah na hopih pah in. Nang a dingin a kibaih sa in om den ding uh hi. Sia Tuang Pu : 016 254 4093, Sia Go Mang : 018 202 1216

ZOMI TE ADING NASEP :

• Subang ah Factory Store general Worker pasal citak 3 ki nawh deih hi.
• Omna pia-An pialo.
• Nasep hun-Monday to Friday 8:00am to 7:00pm/Saturday 8am to 5pm Nai khatsung khawlhun
• Off day- Every Sunday
• Khasum-Rm1400
• Pau – English or Malay
• Na sep hahkat te khasum khan toto.
• Nasep waitress or Kitchen Helper numei (or) pasal 1 a manlang-in kinawh deih.
• English (or) Malay Pau, Pauthei hamtang ding.
• Nasep Hun- Nai11
• Omna pia-Ann vak
• Off day-Kal 1 khatvei off
• Khasum-Rm1600.00
• A mun -Bundar Sunway, Sunway Pyramid pam deuh. Ei Zomi a sem pawlkhat zong omhi.
• Uptown Puchong Nigh Bazaar ah na semding pasal 2 ki nawhdeih hi.
• Nasep hun-Nai 10 sung
• Khasum-Basic Rm1200 tawh kipanding
• Omna pia- Anvak
• Offday-kal1 khatvei off
• Amun-Puchung
• Nasep tawh kisai :Sia Khuppi – 016 3838 014, 011 3563 2059

LUNGDAM KOHNA

ZAM zum leh nasepna te adingin mapan khopna hong pia a nuai a te tungah lungdamna lianpi kong pulak khia uh hi. Zomi te itna veina taktawh ih zumpi a dingin hibangin mapang khawm in nong dinpih na te hang mah uh tawh tuni ciangdong a kikalsuan toto zo ahihi. Mailam ah zong a piakhia zo semsem dingin TOPA’N thupha hong pia henla, a zahtampi in hong thukik tahen. Zomi te a dingin zong hong zang semsem lai tahen.

• 1. Pau Sian Muang (Kahgen) RM 50
• 2. Thang Lian Khup RM 50
• 3. Aung Nan Daw annsai RM 200
• 4. Gin Khen Mang RM500