Dandelion akici gamlak pak
Dandelion akici gamlak pak no te in vantung a et kawm in “waa … vantung pen dum in zai taktak ei maw, vantung ah ei ih lengto thei tam maw nu” ci in hong dong uh hi.
Anu in zong “ leng thei e maw … hong gol mengmeng le uh cin tua teh leng theih pah ding” ci in gen hi.
“Tua hi leh en mun khempeuh mu thei pah ding mateh … nak nop ding hiven”
Gamlak pak te pen huih nunna zui in alam kawm un agol hun ding uh lam-en in ngak uh hi.
Phalbi hong tun ciang in naipak (yellow) mel apua hih gamlak pak te pen akang (white) in hong kikhel hi. Alen khiat ding hun uh ahong tungta ahi hi. Anu un anuih kawm in huih hong nun ciang huih tung tuang in koi ci len ding, koi lai ah khawlnga ding, tua pan koi lam ah leng ding cih te no le no thu in ngaihsun khol un ci in vaikhak khol hi.
Ahihang in khat hong leng khia nuamlo in akung hong len teta hi.
“Bang hang in huih hong nun ciang ei Dandelion te leng ih hia? Ei hi lai ah tawmvei bekbek zong ki om thei nawnlo ding maw” ci in hong dong hi.
“Om thei lo … na om dandan un huih in hong len ding hi. Huih om kei leh Dandelion pak te koi mah tung thei lo ding hi. Lui gei, gun gei, singkung nuai, lampi gei, tua pan hua mual sang te tung ah huih in hong puak ding hi. Huih tawh ton khawm peuh leng hang tuipi tung zong kantan zo ding hive hang.”
Huih pen ei nial theih hilo hi. Na tun nana mun uh ah nungta ding hi uh teh. Gam thak tun ding lau kei un. Khattang hih ding lau kei un. No ka ta te sung ah Dandelion pak tampi acipun theih nading in hih theihna na nei uh hi. Pai khia unla tampi pah ta un. Leitung mun tuamtuam ah kizel ding hi uh teh. Azenzen in hi mun pan paikhia nuamlo hi le uhteh lawm thak ngahlo in leitung ii hoihna te zong mu kha lo ding hi uh teh.
“Nu nong gen pen himah ei mateh … tua ahih leh pai vo va leng ta ni”
Mihing te zong Dandelion gamlak pak te bang in huih tawh ih leng khawm aa nosuahna, thatang, lam-etna, itna ngaihna cih te tawh mun tuamtuam ah ih ki theh thang hi.
Mihing te aading alunglut huai penpen na khat in ka mai kal khat khit ah bang piang ding cih ih theih kholh theih lohna thusim ahi hi. Hih thusim pen lungnopna zong na hi thei, lungkhamna, thanemna, lungkiatna te zong na hi thei hi. Hong gensia le hong khaktan mi aom mah bang in hong khutlet in, tha hong pia in lawm le gual hoih zong na om ding hi. Bang bang na tuak zong in lau kei in. Na omna na na din mun pan nunta in na khantoh nading hanciam in.
Lailet; Peter Suumpi
4. 2. 2015
Zingsol
Comment piaknop aomleh...