Dahna Pulakna: Mangpha Sia Thang Lian Khup (Khupsan)
Florida Gamkee, Jaclsonville khuapi a teng, Zogam ah Tedim khualai veng a khangkhia, Naulak beh, Khupsan kici Sia Thang Lian Khup in damlohna hang tawh March 23, 2015 ni mual hong liapsanta hi. Sia Thang Lian Khup pen tu kum sungin kum (47) phapan a khangcing nailo hi napi, a it mahmah azi Siama Do Suan Vung leh a tapate gel, Tg. Lian Gin Sang leh Tg. Go Suan Khai nusia in mual ahong liapsan ahih manin nakpi takin kikhasia a, kidah mahmah hi.
Sia Thang Lian Khup hong nusiatna hangin adah akap, lungleng khuangai a om azi a tate leh meeltheih tanaute, khuapih tuipihte, Pawlpimi pihte, Zomi Innkuan kipawlna sung a Pawlmi pihte tawh akibang in Zomi Innkuan USA Executive Committee pawlzong kidah mahmah hi.
Sia Thang Lian Khup pen a thunuam, a thunem, a gualheu, mi pivang mahmah khat hi a, Pasian nasepna lam ahzong a kipiakhia zo thu-um tuucing muanhuai khat ahi hi. US gam sung ah Kansas City, Nashville khuapi cihte ahzong peemta a kikhuasak kawmin khuapih tuipite panpih a, Pawlpi a makai zo Sia kician khat ahi hi. Sia Thang Lian Khup pen apa, ahong nusiakhin, Prime Minister U Nu hun lai in Member of Parliament leh Chin Affairs Minister asem ngei Pu Son Cin Lian mah suunin gam leh minam a it mahmah mi thupi khat ahi hi.
Sia Thang Lian Khup pen ZIUSA Genvai Thukhun pom, Jacksonville Zomi Innkuan kipawlna Pawlmi kician khat ahih manin, ZIUSA kipawlna in luangphamna/kivuina sum dingin Dollar Tul Sawm kipiakhia a, dahna pulakna in paakkual khattawh kikha hi. Sia Thang Lian Khup tawh hun nunung pen March 28, 2015 ni in kizangta ding a, tua panin hanmual ah kikha ding hi.
Sia Thang Lian Khup hong nusiatna manin adah akap, lungleng khuangai a om, a zi a tate a kipan, laizom u leh nau, nu leh pa, lawm leh gual khempeuh, anungta Pasian in hong hehnem henla, a damlai teng cidam takin nisim mabante ah thupha leh thathak tawh a kalsuankik zo dingin ahong siamna dingin thu ka ngen uhhi.
Dahna tawh;
Executive Committee
Zomi Innkuan USA
Tulsa, Oklahoma
March 27, 2015
Comment piaknop aomleh...