COVID-19 Natna leh D.C Area Zomite dinmun

COVID-19 Alert VIII: COVID-19 Natna leh D.C Area Zomite dinmun – kidawm tek ni…. RED ALERT

Tulai tak ko omna Washington D.C Area om Zomite lak ah COVID-19 natna ngah (positive) mi 20 val ki om ta hi. Nakna pen mun tuamtuam pan akingah hi aa, D.C area Zomite sungah natna ngah atamzaw pen nasepna leh omna apartment te pan akilawh to to ahi hi.

Natna kilawhna “HOT SPOT” mun pen mun 2-3 bang om hi. Tualo mundang tuamtuam pan zong akilawh pawlkhat kiom hi. Tua hi aa, D.C Area sung om Zomite akua mapeuh i kidawp ciat ding hun hi ta hi.

Athupi mahmah khat in kilawhna mun (hot spot) te ah ateeng leh na asem khempeuh in zong kidalna van (protective equipments – maituam, khuttuam) cih te i zat tek den ding leh akisap leh quarentine bawl in eima Siavuan (primary care doctor) te tawh zong i kimuh zel ding zong thupi mahmah ding hi. Ei sung teng i kidawp kei aa, i kidal ciat kei leh natna kilawh maang ding I hih manin akua mapeuh in tavuan (mawhpuak) aa i neih tek ding hi ta hi.

Abeisa hun aa I pulaak zeel mah bangin hih natna pen Zum huai natna hi peuh mah lo aa, ei mawhna tawh akingah nakna zong hi tuanlo hi. Ahih hangin nasia tak in akilawh thei Pulnatna lahuai mahmah ahih manin I kidal ciat ding, kidawp ciat ding thupi mahmah hi.

Tua hi aa, Natna i neih leh zong ei leh ei kipulaakkhia lel in adang te I kidawpsak pah ding leh I kibawl pah ding ahi hi. Hi ci bang in kong pulaak khiat na in akua mapeuh I kidawp theih ding leh ei sung natna I kilawh loh nang deih sak na tawh hong kipulaak khia ahi hi.

Zomite atam pen teenna D.C Area huam sung Maryland State sungah tuni ciang natna nei mi 17,766 leh asi mi 797 pha ta aa, zato kituaksak in isolation akibawl sak mi 1165 pha ta hi. Topan D.C Area om Zomite hong ompih den in natna ngah te zong amanlang in adam siang nang uh leh hih pulnatna pan amanlang in i suahtak nang Topan hong huh ta hen. Thomas On Sian Mung (Thomas Mung Guite) Washington D.C April 25, 2020