Banghun ciang khensat ding? ~ Dimno’ Pa

Banghun ciang khensat ding? ~ Dimno’ Pa

Pasian nasem Pastor khat khutdawhngen kineih in zingsang khat biakinn mai-ah hong ding hi. Tua ni zingsang pen amahmah tua biakinn ah pawlpi kem Sia dingin a kisan ding ni ahi hi. Kikhawm dingin aom mipite’ lak ah akhut dawh kawm sa-in akileh kawikawi hangin kuamah in thudon lo-in amu lo kineih lel uh-a, mi (3) bekbek in,‘hello’ ci-in na hopih uhi.

“Ka gilkial! Hong hehpih un la, ka an lei na’ng sum tawmkha hong khen un”, ­ci-in a awt-awt hangin khat bek nangawn in pialo uh hi.

Biakinn sung lut in sanctuary tung aa tutna ah hong tutphei leh upate hong pai-in, hih tutna pan pai khia-in biakinn nunglam aom tutnate-ah atutna dingin hong sawl uhi. A kituahpih mite maitai tak-in hopih in paupih ta leh kuamahta-in thusim lo-in koih lel uh-a, muhdahna mit tawh hem et gualgual sanlel uhi.

Tutna dingin a kisawlna biakinn nung tutphahte’ tungah hun kipat ding ngak in hong tu hi.

Hong kikhawm thak maitangthakte pawlpi mite-in limtak in vaimuak himah tase leh amah pen maitangthak ahih lam thei napi uh-in kitheih mawh bawlbawl uh-a, a kiim a tute’ kiangah maitangthak ahih lam atheihna dingun a ki lahlah hangin atello dan kineih sanlel uhi.

Tua laitak in pulpit mai-ah pawlpi makaite hong pai-in tangko na khat hong neih uh-a, “Tuni biakpiakna sungah i pawlpi hong makaih ding Pastor thak khat muakna neih ding i hih manin lungdam kipaak in Topa min i phat hi.”

“Siapa aw, hehpihna tawh hong ding to in,” “Vai muakna hong nei nuam ung,”ci-in hong tangko khia uhi.

Kikhawm mipi khempeuh nuihmai tek tawh khutbeeng kawm khuadak kawm sa-in hong ding to uh hi.
Tua leh biakinn nunga tu, khutdawhngen pa hong dingin pulpit lam manawh in hong pai-a, microphone mai atun ciangin tawmvei khawl in damtak in hih Lai Siangtho tang hong sim hi.

“Tua ciangin Kumpipa in a taklamah a om mite kiangah, ‘Ka Pa in thupha a piak mite aw, hong pai ta un. Leitung piancila kipanin note-a’ dingin a kibawlkholsa gamnuam hong luah un. Bang hang hiam cih leh ka gilkial laitakin an nong pia uh a,

ka dangtak laitakin tui nong pia uh a, khualmi ka hih laitakin zin nong do uh a, puan neiloin ka om laitakin puan nong guan’ uh a, ka cinat laitakin nong veh uh a, ka thongkiat laitakin nong hawh uh hi,’ a ci ding hi.

Tua ciangin mihoihte in, ‘Topa aw, cikin na gilkial hong mu-in an hong pia a, cikin na dangtak hong mu-in tui hong pia ka hi uh hiam?

Cikin khualmi na hih laitakin hong mu-in zin hong do a, cikin puan neilo na hih laitakin hong mu-in puan hong guan’ ka hi uh hiam?

Cikin cina na hih laitakin hong mu-in hong veh a, cikin thongkia na hih laitakin hong mu-in hong hawh ka hi uh hiam?’ a ci ding uh hi.

Tua ciangin Kumpipa in amaute kiangah, ‘Note kiangah kong genin-ah: Hih ka sanggamte a neupen khat nangawn na limbawl uh ciangin kei tungah a hong bawl na hi uh hi,’ ci-in a dawng ding hi.

Hih teng hong sim khit ciangin amah leh amah hih pawlpi akem ding Pastor thak ahih lam kipulak khia-in, zingsang a athuak thuteng zong bantak in hong genkhia ngiatngiat hi. Mipi tampite maizum kawm in dakto ngam lo uh-a, khitui luangsa in kun gai uhi.

“Tuni in mitampi tak biakinn ah akikhawm hong mu ing. Ahi zongin i Topa Zeisu’ nung a zui ding mi hong mu keng.”
“Leitung ah meigong tagahte pampaih in nawlkhin in, alanglam angat san, adon nuamlo mi, kicing tak in om khin zota hi!”

“Ahi zongin i Topa Zeisu gen bangin zui-in ama’ nung azui ding, mitampi kisam lai hi!” “Bang hun ciangin Zeisu nungzuih ding khensat ding na hi uh hiam?” Hih thuteng agen khit ciangin biakpiak hun mansak hi. Dimno’ Pa (April 27, 2016, Ref: Pastor Present)