Pautaang (Common Language) neihhoih ~ Pau Tun Thang

Pautaang (Common Language) neihhoih ~ Pau Tun Thang

Kawlgam leh India gama om Zomite gamkhat ukna nuaia omkhawm ding pen i ut teisam hangin ngaihsut hak mah mah lai hi. Tua ahih manin Cultural Unity bekmah hong kipumkhatsak thei suak tadih phawt hi. Lai kibang, pau kibang leh ngeina kibang nei thei hi leng a hampha ding midang hi lo in eimah ciat ihi hi. Tua ahihmanin hi lamah akuama ciatin lungsimza tak i puak ding uh kitangsam hi.

Pautaang (common language) neih theihlohna pen Zomite adingin i khanmohbawk khat uh ahi hi. Tua ahih manin pautaang neih ding hoih hi. Pautaang hong bangci pian hiam? cih gen leeng:

1. Evolution Method: Hi pen ama thua hong kipan leh hong piang ahi hi.Pau nam tuam tuam zangte hun sawtpi hong awm khawm uh ciangin apau uh hong kihel a, tuapan a sawm uh zong ahi lo pau thak khat hong piang thei hi. Hibanga pau dang a pian theih nangin hun sawtpi kisam hi.

2. Mixed Language: Hizong pau nam tuam tuam gawmkhawm mah ahi hi.Ahizongin hi pen hanciamna tawh piansak sawmna hi deuh hi.Pau nam tuam tuam pana pau thak bawltawm hi mai hi. Europe khawmualpi ah Esperanto ciin na din ngei uh hi. Mi tampi in siam manin ahizongin lawhcing zolo hi. Hi method pen eia dingin zong haksa kha ding hi.

3. Language Borrowing Method: Midangte’ pau va kawm cihna hi pian hi. Pau namnih namthum siamna tawh kihopih theihdan lampi zonna ahi hi. Switzerland gamah pau nam thum; German,Italian leh French kizang hi. Mi khatin pau a tawmpen nam nih bang siam uh ahih manin mikim kihopih thei ciat lel uh hi.Switzerland ah bel hi method lawhcing mah mah vanglak hi. Chin State sung bekah zong pau nam 32 bang awm cileng, hi method zong a haksa ding thu khat hong hi leu leu hi.

4. Revolutionary Method: Hi pen a picing hamtang dinga ngaihsut ahi hi.Hi method ah bel pau namkhat pautaang dingin kikipsak ziau lel hi.Sang laisimbu te ah kisin sak pah ahih manin kum 10 sungin picing zo hi.Hi pen pautaang neihdan baih pen ahi hi.

Zosuan pau khat peuh peuh i zang zongin gamdang pau laklut (imported language) hi loin eima pau (indigenous language) mah ahi hi. Kei ngaihsut pakna ah Tedim pau houh a kicing pen mai tam aw cih khat awm (ka ngaihsut khialh leh hong theisiam unla). Tedim pau hong pian dan upa ten a gen uh ciangin Zosuan pau tuam tuam zangte’ pau kihelkhawm pana piang dan in gen uh hi. Tua ahih man ai diama kammal zong kicing vanglak hi. Tedim District pen Chin State district khempeuh lakah a zai pen ahih banah mihing zong a tam pen ahi hi. Kum 1962 in Tedim kampau zang mihing 84000 cing khin hi. Chin State sung ban ah Kalay Valley, Tamu Valley etc. ah zong Tedim pau pen a zang tam mah mah hi. Pau in gamgi nei lo hi. Tuhun ciang India ah zong Tedim pau ki nakzat mah mah ta hi.

Pautaang neih hoihna tam mah mah ding hi, tamlo cik gen dih ni:

Pautaang neih pen kipumkhat sem sem nangin hoih hi. Pau kibang zangte pen pau kibanglo te sangin kingaina zaw hi.I pau a kibat loh ciang ki midang muhkhak zel hun awm mawk hi. Zosuan tengin pau namkhat zangkhawm thei lian leng tu sangin i kithutuak zaw tham dinhg hi. Pau a kibat loh ciang “no/ ko” cihna lungsim awm thei zel hi. Naga nam te pen a pau uh a kibat loh hang ki thutuak mah mah uh hi kici hi. Ahizongin amau a gen uciang pau kibatlohna hangin haksatna tampi na tuak veve uh hi ei. Pau kibat lohna pen tualgal nangawn a piangsak thei hi ta zen hi. Tua ahih manin pau kibang zangthei te pen hampha mah mah uh hi.

Pautaang nei thei hi leng lailam nasepna ah nuamtuam mah mah ding hi. Lailam ah i khantoh theihlohna hang khat pen i tawm man ahi hi. I tawm banah pau tuam tuam zang lai i hih cianga masawn theilo hi hang. Pautaang nei leeng, laibu bawl, thucinbu hawm etc. te nekzonna tak hong suak ding hi. Music leh Film lamah nekzonna takin lampi hong ki hong lai ding hi. Cassette leh film lama lunglut te adingin market hong tangzai sem sem ding hi. N. Pau Tun Thang, Mumbai, India