Vaimim gap thum tungpan thalakna ~ Dong Mung

Vaimim gap thum tungpan thalakna ~ Dong Mung

Leitung i nuntakna sungah na khempeuh neu ngaihsut ding leh neu muh ding bangmah omlo hi. Na lianpipite pen neucik pan hong kipankhia hi-a, a piang theilo om loin a piang nailo bek om hi. Tua ahih manin tutung i thalak nadingin vaimim gap thum thu lungngai khawm dih ni…

Hun khat lai-in Siapipa khat kiangah kum thum sung vilvel pilna, siamna sinin a om mi thum om hi. Kum thum vilvel a om khit uh ciangin inn lam zuanin hong ciah ding uh hita ahih manin a Siapipa un amaute khat ciat tungah citpiat(letsong) tun khat(thoh 1) ta a pia hi. Tua kawmin amaute kiangah, “Tu-in na mailam nuntakna dinguh nomau khut sungah om hita hi,” ci-in a vaikhak hi.

Tua mi thumte zong amau khua le tui lam hong ciah uh-a, inn a tun uh ciangin a Siapipa uh citpiak(letsong) bang hi peuhmah hiam. Ci-in honga a et uh leh, Vaimim Gap Thum ahi hi. “Van gil pipi ding sa hang e, Siapipa zong vaimim gap thum peuh citpiak(letsong) a hong pia sese,” a ci ciat uh hi.

A khatna pa in tua vaimim gap thumte huan in a innkuanpihte tawh ne uh hi. Lim sa mahmah uh ahih manin a Siapipa tungah lungdam mahmah hi.

A nihna pa in tua vaimimte huan ah ciin ding hong khensat hi. Tua bangin a vaimimte hong ciing takpi a, kung 10 hong po in vaimim gap 50 hong ngah kik hi. Tua a ngah vaimim-teng amau innkuan ading huanin a nek ban vuah, a veng a pamte zong a hawm hi. Tua bangin amau innkuan bek thamlo, a veng a pam nek theih dingin vaimim gap a pia a Siapipa tungah a lungdam mahmah hi.

A thumna pa zong a nihna pa mah bangin tua vaimimte hong ciing hi. A limci mahmah vaimim gap 50 hong gah khia hi. Tua vaimim gaute a muh ciangin keekin em a nek ding iplah huai, lo in an a huan ding iplah huai mahmah hi. Ahi zongin vaimim gau khempeuh lo het loin gap khat bek lo-a, tua lo a dangteng a cii dingin a kem hi. Tua khit ciangin leitang awng mun khat kawmin tua vaimim cii-te a a ciing kik hi.

Lim takin tui buakin a puah hi. Tua tungtawn in vaimim gap tul val ding khawng hong ngah hi. Kum simin tawm ta ne-in adangte a cii dingin koih a, a ciingto zel hi. Vaimim pawlkhat zuak a, tua pan a angah sumte sungpan za ah 3 pen leitang kawm manin pia a, adang za ah thumte a khol hi. Kum 10 khawng hong hih ciangin leitang ecra 100 a dim vaimim cinna neipa hong suaka, mi haupi khat hong hi ta hi. Vaimim gap thum a pia a Siapipa tungah a lungdam mahmah hi.

Thalakna

1. Mikim in hamphatna kingah

– I taangthu gen mah bangin hih leitung in eite nuntakna ah akibangin hamphatna hong pia hi. Mikim in ni khat in nai 24 i ngah ciat hi. Hih i ngah akibang hamphatna pen mi tampite’n thupha lianpi in sang thei uh ahih manin Pasian tungah lungdam ko kawmin pilvang tak leh tupna, ngimna, lunggulhna kician tawh zang uh hi. Tua bangin a zang thei mite in hih nai 24 sungin na tampi le na lianpi semkhia bawlkhia thei uh a, ama ading le mite ading thupha lianpi suaksak uh hi. Ahi zongin i phattuampih dan kibanglo hi. Pawlkhatte in tua hun sungin khantohna le mainawtna in zang thei uh-a, pawlkhatte adingin bangmah phattuampih hetlo hi. Pawlkhat leuleu bel a khantohna uh kem in khantoh behbeh uh hi.

2. Meet bawl siam ding kisam

– I taangthu i et ciangin i ngah hamphatna i meet bawl theih ding hong phawksak hi. A khatna pa’n huan in ne pah lel a, beimang pah hi. A nihna pa’n ciing tei napi zom to nawnlo a, ahih zawhna ciang tawh lungkim ziau hi. A thumna pa’n bel ciing in pungsak a, ciin’ beh toto in, kum 10 bang khit ciangin mi haupa hong suak hi. Pasian hong piak i talent pen i meet bawl theih leh i lawhcin nading ahi hi. Bangzah takin maipha ngahin, hamphatna i ngah phial zongin meet bawl thei kei le’ng sawtpi kiphattuampih khollo a, muibun takin ki nuntakpih thei khollo hi.

3. Thaman pia in ngakzawh ding kisam

I taangthu i et ciangin a khatna pa in ne tum pah hi. A nihna pa in khatvei bek sem hi. A thumna pa in bel kum simin ciing behbeh in behlap toto ahih manin kum 10 bang khit ciangin hong hauh lawh hi. Na khempeuh ah hun piak zek mah kisam hi. Pilna sinna ah zong thuakzawhna tawh ngakzawh ding kisam a, sum zon pai zonna ah zong thuakzawhna tawh ngak ding kisam hi.

Na khempeuh in thaman nei ciat ahih manin thaman piak ding i lunghiang hetloh ding ahi hi. Thaman piakna tawh tha khat thu inzong i deihzah kingah pahlo lai ding ahih manin ngakzawhna I neih ding kisam hi.

• Noah Webster in Webster Dictionary minthang mahmah a zawh nadingin kum 36 sung sawt hi.
• Michael Angelo in The Last Judgment kici lim minthang mahmah khat kum 8 sung a sun a zanin buaipih hi.
• Thaman pia in ngakzawhna tawh kalsuan ni..

Thukhupna

Kong it lawm le gualte aw, tulaitak i dinmun i et ciangin mite sangin thanem zaw, bangmah hilo kisa kha thei ding hihang… Ahi zongin tulaitak a i pimuh mahmah mite, i een mahmah mite mah bangin Pasian in ei zong hamphatna hong pia hi. Amaute’n zong ni khat in nai 24 ngah uh-a, eite’n zong ni khat nai 24 sung mah i ngah hi.

Hipen Pasian hong piak i thupha lianpi khat ahi hi. Hih hun manpha, hih i thupha lianpi pen meet bawl siamin zeek dan siam peuh leng pilna kibehlapna, siamna kibehlapna, picinna kibehlapna hong suak toto dinga, a tawpna ah tu-a i een mahmah mi lawhcingte mah bangin ei zong a lawhcing, a muibun mi khat i suak ding hi. Lungdam, Dong Mung